Тұрғын үйлерді күтіп-ұстауға бизнес өкілдері тартылмақ
Бұл туралы облыстық табиғи монополияларды реттеу департаментінің өкілдерімен болған кездесуде айтылды. Анықталғандай, келер жылдан бастап бірқатар коммуналдық қызметтердің тарифі төмендейді.
Нақтырақ келтіргенде, 1 қаңтардан әлеуметтік маңызы бар 46 нарық субъектісі тариф құнын түсірмек ниетте. Мәселен, «Шығысэнерготрейд» тұрмыстық қызметке арналған тарифтің мөлшерін ҚҚС-сыз кВт/сағат электр энергиясына 9, 719 теңгені белгілемек. Бұл қуат көзінің 6,5%-ға арзандайтынын көрсетеді. Әйтсе де өзге санаттағы тұтынушыларға оның бағасы өзгеріссіз кВт/ сағатына 12, 936 теңге көлемінде қала береді. Сол секілді «Водоканал» кәсіпорныда судың бағасын ҚҚС-сыз текше метріне 50, 14 теңгеден 47, 63 теңгеге дейін төмендетуді жоспарлауда. Ал суды тарту қызметіне байланысты соманың мөлшері (ҚҚС-сыз) 42, 12 теңгені (қазіргі құны 44,34 теңге) құрамақ. Бірақ жылудың ақысы сол күйі қалатыны айтылды. Мұның себебін энергетиктер өтемдік тарифпен байланыстырып отыр. Оның мерзімі 2019 жылдың 31-ші маусымында аяқталатын көрінеді. Сол уақытқа дейін қызмет бағасын түсіруге негіз жоқ деп есептейді «Жылукоммунэнерго» басшылығы. Мекеменің техникалық директоры Расылхан Жолдасов көмірге 408 млн. сондай-ақ қызметкерлердің алдындағы қарызды қайтаруға 378 млн. теңге жетіспей тұрғанын атап өтті. Шаһардың бас энергетигі РК-1 және 1-ЖЭО-дағы жаңғырту жұмыстары біткен соң, тарифті қайта қарастыруға болатынын да жасырмады. Өйткені қос нысан толық қуатына көшсе, өз қажеттіліктерін өтеуге қауқарлы екен. Тиісті құрылыс жұмыстары наурыз айында аяқталады деп көзделуде. Десек те тұрғындар өз өтініш-тілектерін білдірді. Атап айтқанда, бір айлық жылудың ақысы 20 мың теңгеге дейін жуықтапты. Бұл семейліктердің қалтасына әжептәуір салмақ түсірген.
Сонымен қатар кездесуде тағы бір қордаланған мәселе қаралды. Ол тұрғын үйлерді күтіп-ұстауға қатысты еді. Жылыту науқаны басталысымен, Семейдегі көпқабатты баспаналар қысқы мезгілге дайын болмай шығады. Бұл, бірінші кезекте, әбден тозығы шыққан ішкі желілерге байланысты. Қоғам белсенділері түйткілді проблеманы шешуге «Жылукоммунэнерго» кәсіпорнының мамандарын жұмылдыруға ұсыныс тастады. Десек те аталмыш мәселені мәселені реттеудің механизмін жергілікті билік басқаша көріп отыр.
– Тариф белгілеудің ашықтығына тоқталсақ, бүгінде Семейде 16 тұрғын үй қанатқақты жобаға ілінді. Оның ішінде 13 үйді электронды есептеуіш құралдармен қамтып үлгердік. Оған GSM модемдері орнатылған. Сәйкесінше, есептеуіштегі көрсеткіштер «Е-шаңырақ» бағдарламасы арқылы Астанаға жіберіледі. Тиісінше жауапты министрлік кез келген тұрғын үй бойынша қажетті мәліметпен қамтылады. Осы құрылғымен жылудың мөлшерін, сол секілді жарық пен судың көлемін анықтауға болады. Бұл бірқатар мәселенің шешілу жол ашады. Сервистік қызметтерге «Жылукоммунэнергоны» тартқан жөнсіз болар, неге десеңіз кәсіпорын жылыту маусымы аяқталған бойда келесі науқанға дайын тұру қажет. Осы мақсатта жаз мезгілінде инженерлік желілерді реттеумен шұғылданады. Десе де бұл мәселемен айналысуға кәсіби сервистік компаниялардың қауқары жетеді деп ойлаймын. Бұған шағын және орта бизнесті тартуға болады. Ниет танытқан кәсіпкерлер де жоқ емес. Келер жылдан бастап осы мәселені қарастырамыз, – деп нақтылады қала әкімінің орынбасары Николай Ушаков.
Жақсылық Мұратқали
Семей.
