Телевизиялық пікірсайыс өтеді
Ел Президенттігіне кандидаттардың сайлауалды пікірталастары төрт раундта өтеді. Бұл туралы Орталық сайлау комиссиясының кезекті отырысы кезінде белгілі болды.
– Пікірсайысқа қатысушылар өз бағдарламасымен сөз сөйлеуге, қарсыластарына сұрақтар қоюға, сайлаушылардың сұрақтарына жауап беруге, сондай-ақ сайлаушыларға үндеу жасауға мүмкіндік алады, – деді ОСК мүшесі Анастасия Щегорцова.
Сайлауалды пікірталастарға қатысу үшін кандидатураларды ел Президенттігіне үміткерлердің қолдау штабтары ұсынды. Телекөпірге Қарақат Әбден, Нұрлан Әуесбаев, Жигули Дайрабаев, Мейрам Қажыкен, Ерлан Қошанов, Салтанат Тұрсынбекова қатысады.
Пікірсайыс 11 қараша күні сағат 20.00-де «Хабар» телеарнасында тікелей эфирде өтеді.
Бірінші раунд – «Сайлауалды бағдарламаның тұсаукесері», онда әр қатысушы өз сайлауалды бағдарламасын үш минут ішінде ұсынады.
Екінші раунд – «Пікірталас сессиясы», онда қатысушылар қарсыластарына екі сұрақ қояды, сонымен қатар екі сұраққа жауап береді. Сұрақ қоюға 30 секунд, жауапқа екі минут беріледі.
Үшінші раунд – «Сайлаушылардың сұрақтары». «Хабар» агенттігінің базасында «Үміткерден сұра!» өтінімдер қабылдау науқаны басталды. Сайлаушылар кез келген кандидатқа жеке сұрақ қою мүмкіндігіне ие. Олардың әрқайсысына эфирде бір сұрақ қойылады. Жауап беру уақыты – екі минутқа дейін.
Төртінші раунд – «Сайлаушыларға үндеу». Әр үміткерге екі минут беріледі. Жалпы уақыт – кем дегенде 80 минут.
Сонымен қатар ОСК отырысы кезінде оның төрағасы Нұрлан Әбдіров «Қазақстан Республикасындағы сайлау туралы» Конституциялық заңның жекелеген нормаларының қолданысқа ену мерзіміне тоқталды.
– Заңда соңғы конституциялық өзгерістер көрсетілген, оған сәйкес Президент бұдан былай жеті жыл мерзімге бір реттен аспайтын мерзімге сайланады. Бір жетіжылдық президенттік мерзім туралы норма алғашқы ресми жарияланғаннан кейін 10 күнтізбелік күн өткен соң, яғни 2022 жылғы 17 қарашада қолданысқа енеді. Осылайша, алдағы 20 қарашада жалпыхалықтық дауыс беру барысында сайланған Қазақстан Президентінің қызмет ету мерзімі жаңа конституциялық норма бойынша есептеледі, – деді ол.
Айгүл Биданова
