Тарихты бұрмалауға жол берілмейді

Өскемен қаласында Ұлы Жеңістің 70 жылдығына арналған «Ұлы Отан соғысы: тарихы, әдіснамасы және заманауи көзқарас» атты халықаралық ғылыми-тәжірибелік конференция өтті.
Оның жұмысына «Нұр Отан» партиясы облыстық филиалы төрағасының бірінші орынбасары Нұрлыбек Шерубаев, Мәдениет және спорт министрлігінің мұрағаттық іс және құжаттама департаментінің директоры Әлия Мұстафина, Қазақстан, Франция, Ресей, Өзбекстанның ғалымдары, облыстағы ЖОО-ның ректорлары, соғыс және тыл ардагерлері, атқарушы биліктің, мемлекеттік емес ұйымдардың өкілдері, студент жастар қатысты.
Конференция жұмысы басталмас бұрын оның қатысушылары мен соғыс және тыл ардагерлері Ұлы Отан соғысында шейіт болған шығысқазақстандықтарға арналған Жеңіс монументіне гүл шоқтарын қойып, майдан даласынан оралмаған боздақтарды бір минут үнсіздікпен еске алды.
Айтулы шараны ашқан С.Аманжолов атындағы Шығыс Қазақстан мемлекеттік университетінің ректоры, экономика ғылымдарының докторы Әлібек Қуандықов кіріспе сөзінде бүгінгі конференцияның басты мақсаты – соғыс ардагерлерінің ерліктерін ұмытпай, ұрпақтан ұрпаққа жеткізу, оқиғаларға дұрыс баға беру екенін айтты. Соғыс кезінде болған оқиғаларды осы күндері кейбір мағынасыз түсіндірулер бізден Ұлы Отан соғысына деген жүйелі де шыншыл көзқарасты, баға беруде адалдық пен жауапкершілікті талап етеді. Шындықтың бәрі мұрағаттық құжаттарда, олар өткен шақтың үнсіз куәгерлері, бүгінгі ұрпақтың міндеті сол қағаздарды «сөйлету» болмақ.
– Біз адамзаттың өміріндегі ең қанқұйлы соғыстың қалай басталғанын үнемі есімізде сақтап, содан сабақ алуымыз керек, өйткені, бұл тақырып өзінің өзектігін бүгін де жойған жоқ. Бұл қасірет қайталанбауы керек. Ұлы Жеңіске жетудегі біздің мемлекетіміздің рөлі мен соғысқа заманауи көзқарас әдіснамасын жасауға Ұлы Отан соғысының мәселелерін зерделеудегі қалыптан тыс ғылыми шешімдер мен тың жаңалықтар өз үлесін қосады деп сенемін, – деген «Нұр Отан» партиясы облыстық филиалы төрағасының бірінші орынбасары Нұрлыбек Шерубаев облыс әкімі Даниал АХМЕТОВТІҢ конференция қатысушыларына арнаған құттықтауын оқып берді.
Онда Ұлы Отан соғысының тарихын бұрмалап көрсетуге жол беруге болмайтыны, оны оқып-зерделеуде жүйелілік қажет екені айтылған. Ұлы Жеңістің 70 жылдық мерейтойы қарсаңында облыста соғысқа қатысты үш кітап жарық көріп, деректі фильм түсірілген, ардагерлерге жәрдемақылар төленуде. Ұлы Жеңіске барлық ұлттардың бірлігі мен бүкілхалықтық ерліктің нәтижесінде қол жеткенін ешқашан ұмытпауымыз керек.
Мәдениет және спорт министрлігінің мұрағаттық іс және құжаттама департаментінің директоры Әлия Мұстафина жиналғандарға Мәдениет және спорт министрі Арыстанбек Мұхамедиұлының құттықтауын жеткізді.
Халықаралық конференцияның пленарлық бөлімінде облыстық мемлекеттік мұрағатының директоры Алдияр Әубәкіров шығысқазақстандықтардың Жеңісті жақындатуға қосқан үлестері жайында жан-жақты мағлұмат берді. Мысалы, Белоусовка кеніш басқармасының ұжымы 1941 жылғы еңбек жоспарларын 123 пайыз артығымен орындапты, ал әр жұмысшыға шаққанда еңбек өнімділігі 148 пайыз артқан. Механика цехының теміршілері төрт айдың ішінде өздеріндегі құрал-жабдықтардың тоқтаусыз жұмыс істеуіне қажетті барлық қосалқы бөлшектерді дайындауды үйреніп алады. Өндіріс орындарына майданға аттанған ер-азаматтардың орнын басуға қыз-келіншектер шыға бастайды. 1941 жылы зауыттарда бар болғаны 488 әйел жұмыс істесе, соғыс кезінде олардың қатары 2213 қыз-келіншекпен толыққан.
Ресейлік ғалым Ольга Шевцова «Өлмейтұғын полк» қозғалысы туралы әңгімеледі. Барнаулдықтар акция барысында көшеге соғысқа қатысқан аталары, әкелері, апаларының суреттерін алып шығады. Осындай шерулер тұрғындардың соғыста қаза болған туыстарын іздеуге, олар турасындағы мәліметтерді жинауға, жас ұрпақтың Ұлы Отан соғысына деген қызығушылығын тудыруға көмектесіпті. Жас буын өкілдерін патриоттыққа тәрбиелеуде мұндай шаралардың маңызы зор, дейді ресейлік қонақ.
Франциядағы Гавр университетінің профессоры, саясаттану ғылымдарының докторы Пьер Шабаль «Ұлы Отан соғысының қазіргі көзқарас» атты баяндамасында Ұлы Отан соғысына еуропалықтардың беретін бағамдарына жіліктеп тоқталды.
Жиын барысында С.Аманжолов атындағы Шығыс Қазақстан мемлекеттік университетінің студенттері «Жеңістің 70 жылдығына – 70 қайырымды іс» акциясы шеңберінде түсірген деректі фильм көрсетілді. Студенттер зұлмат соғыста ерлікпен шайқасып, бүгінгі күнді жақындату жолында жанкештілік танытқан ардагерлерге тағзым етіп, гүл шоқтарын сыйлады.
Конференция аясында сонымен қатар, Ұлы Отан соғысына арналған көрме, «Жаңа тарихтың өзекті мәселелері: зерттеу әдіснамасы және заманауи көзқарас» атты дөңгелк үстел ұйымдастырылды.
Шара соңында «Менің отбасымның Ұлы Отан соғысына қосқан үлесі» атты патриоттық акцияның қорытындысы шығарылып, жеңімпаздар марапатталды.

Айна Ескенқызы