Тарбағатай жасыл желекке бөленеді

Соңғы үш жылда Тарбағатай өңірінде жасыл белдеу құрылды. Бұрын -соңды бұл өңірде өспеген-өнбеген жасыл шырша мен қылқан жапырақты ағаштың 20 мың түбі отырғызылып, жерсініп үлгерді. Шағын ауылдардың мектептері мен саябақтарында отырғызылған жасыл шыршалар көріктеніп-ақ келеді. Үш жылда аудан орталығынан 5-6 шақырым жерде орналасқан ауылдардың, күре жолдың бойында егілген қайың мен үйеңкі ағаштары шағын орманға айналып келеді. Биыл да сол дәстүрмен ауданда абаттандыру жұмыстары басталып кетті.

Ауылдардағы аулалар мен көшелерде көң-қоқыс тазартылып, былтырдан қурап қалған шөптер тазартылып, шағын саябақтарға арықтар тартылып, абаттандыру жұмыстарына қауырт кірісті. «Биыл абаттандыру жұмыстары жылдағыдан ерте басталды» оған ауа райы да себеп болып тұр», – дейді аудандық сәулет және тұрғын үй-коммуналдық шаруашылық бөлімінің басшысы М.Қарғабаев.

Биыл Тарбағатай өңіріндегі 17 ауылдық округ пен 60-тан астам шағын елді мекеннің барлық тұрғындары тайлы-таяғы қалмай абаттандыру жұмыстарына кірісті. Алдымен мекемелердің қасбеттері боялып, оған 123 бюджеттік мекемелер атсалысып отыр. Ағаштар мен гүлзарлар отырғызудың жобалары сызылды. Аудандағы 53 мектептің барлық аулаларында биыл 50 түптен шырша отырғызылатын болды. Ауылдың көркін келтіретін шыршаның тянь-шань тұқымдары жыл сайын Зырян, Күршім , Риддер, Зайсан орман шаруашылықтарының тұқым бақтарынан әкелінеді. Биыл аталған тәлім бақтардан 10 мыңнан аса түп шырша әкелініп, оның 2700 түбі Ақсуаттағы орталық саябақтарға, бес мың түбі Ақжар ауылына ортырғызылса, шағын ауылдарға да шырша көшеттері жеткізілді. Жыл сайын көктем шығысымен ауылдық округтер мен ірі елді мекендерде 10000 мыңнан астам түп гүл отырғызылады. Осы жылдарда аудан кәсіпкерлері гүл өсіретін екі тәлім бақ ашып, ауданды гүл тұқымдарымен қамтамасыз етіп отыр. Қазір гүл өсіретін тұқым бақта 20 мың түп раушан гүлі мен питунья гүлдері дайын тұр, олардың барлығы мамыр айында мекемелер мен мектептердегі саябақтарға отырғызылатын болады. Биыл аудан бойынша 50 мыңға жуық қарағаш, қайың ортырғызылады, дәл осындай ағаш тұқымдары осы жылдан бастап тау бөктерлерінде орналасқан бақша өнімдері өсірілетін алқаптардың жан-жағына отырғызылады. Осылайша, Тарбағатай өңірі жасыл желекке бөленеді.

Қадырбек Кәкімұлы
Тарбағатай ауданы