Таңбасыз малды жайса айыппұл салынады
Азамат Темірбеков
Глубокое ауданында қараусыз жайылған малды уақытша қамайтын арнайы орындар шаруа қожалықтарының аумақтарында жасақталады.
Бұл туралы кент және ауылдық округ әкімдерімен теміржол учаскелерінде қараусыз жайылған малдардың мәселесіне қатысты өткізілген кеңесте айтылды. Шара барысында құқық қорғау және мемлекеттік органдар өкілдерінің ақпараты тыңдалып, кент және ауылдық округ әкімдеріне тапсырмалар берілді. Соңғы уақытта ауданда автомобиль жолдары мен теміржол учаскелерінде қараусыз мал жаю, оның ішінде сәйкестендірілмеген белгілерсіз мал жаю жағдайларының жиілеп кеткенін алға тартқан әкімдік бұл апаттық жағдайлардың туындауына әкеп соғатынын еске салды.
Атап айтсақ, жергілікті басшылық иесіз жүрген төрт түлікті уақытша ұстайтын орындарды жасақтау үшін шаруа қожалықтарымен, жеке кәсіпкерлермен және басқа да ұйымдармен осыған дейін жасалған меморандумдарды жаңартып, аудандық жұмыспен қамту орталығы арқылы аулаларды аралаушылардың штаттық бірліктерін бөлуге берілетін өтінімдерді пысықтауы қажет. Сонымен қатар ветеринарлармен бірлесе отырып, анықталмаған ауыл шаруашылығы малдарын анықтау және оларды таңбалау үшін аулалық аралау жүргізуі керек.
Осы орайда аудан әкімдігі таңбасыз малды жайған адамға еліміздің Әкімшілік құқықбұзушылық туралы кодексіне сәйкес 5 айлық есептік көрсеткіш мөлшерінде айыппұл салынатынын ескертті.
