Әскерге шығарып салдық

10.05.2017

Биылғы көктемде ел Қарулы Күштерінің қатарын 1 271 шығысқазақстандық толықтырады. Өскемендегі Республика алаңында Отан алдындағы борышын өтеуге аттанған жас жігіттердің бір тобын салтанатты шығарып салу рәсімі ұйымдастырылды.

Айта кетейік, бұл күні әскерге аттанған 21 жерлесіміз алдағы бір жыл бойы Әуе қорғаныс күштері қатарында азаматтық борышын өтейтін болады. Жас сарбаздар алдымен Алматы облысына, кейін Қарағанды қаласындағы Кеңес Одағының Батыры Нүркен Әбдіров атындағы Әскери-әуе күштерінің 50185 әскери бөліміне (610-шы әуе базасы) жеткізілмек. Бұл туралы облыстық қорғаныс істері жөніндегі департамент бастығының орынбасары Айдар Мүсірепов мәлім етті.

– Өздеріңіз білесіздер, бүгінде елімізде Қарулы Күштердің техникалық жарақтандырылуына ерекше көңіл бөлінуде. Елбасы, Жоғарғы Бас Қолбасшы Нұрсұлтан НАЗАРБАЕВ тапсырғандай, ең алдымен армияның білімі мен біліктілігіне жіті мән берілу керек. Біздің Қарулы Күштер қатарында заман талабына жауап беретін кәсіби мамандар қызмет етуі тиіс. Сол себепті, әскерге бірінші кезекте жоғары не орта білімі бар азаматтарды шақырудамыз, – деді ол.
Оның айтуынша, биыл өткен жылдың күзімен салыстырғанда әскерге шақыртылғандар саны біршама артқан. Жоғарыда айтқанымыздай, 2017 жылдың көктемгі шақырту науқанында қарулы күштер қатарын 1 271 шығысқазақстандық толықтырса, былтырғы күзде 260 адамға кем болыпты.
Екі медициналық комиссиядан, сондай-ақ, психологиялық сынақтан іркілмей өткен болашақ жауынгерлер енді таңдаулы Қарулы Күштер қатарында әскери борышын өтемек.

– Жылда біздің облысқа үміткерлерді таңдап алу мақсатында бірнеше әскери бөлемшенің өкілдері арнайы келеді. Биыл да солай болды. Әскерге шақырылған жігіттердің физикалық, психологиялық жағдайын, білімін тексерген олар сыннан сүрінбей өткендерін өз қатарларына қабылдады, – дейді Айдар Мүсірепов.

Әдеттегідей, бұл күні Отан алдындағы борышын өтеуге аттанған жас жігіттерді шығарып салу салтанатына олардың ата-аналары мен туған-туыстары қатысты. Сонымен қатар, шара барысында облысымыздың аудан-қалаларынан келген «Шығыс ұландары» кадет сыныптары оқушыларының шеруі өтті. Айта кетейік, бүгінде аталмыш кадет сыныптары өңіріміздің барлық қаласы мен ауданында бар. Республика алаңында өткен салтанатты шараға 400-ден астам кадет қатысты.

Сонымен қатар, алаңға жиналған қауым алдында 27943 әскери бөлімінің сарбаздары мен 5518 әскери бөлімі кинологиялық қызметінің мамандары өнер көрсетті.

Нүркен Әбдіров атындағы 610-шы әуе базасы командирінің орынбасары, полковник Қасымбек Кенжебаев әскерге аттанғалы тұрған жігіттерді осынау датамен құттықтай келе, жас шығысқазақстандықтар өз міндеттерін абыроймен орындап шығатынына сенім білдірді. Жақындарының арасына аман-есен оралуын тіледі. Сонымен қатар, Қасымбек Кенжебаев бүгінде Қарағандыдағы әуе базасында әскери борышын өтеп жүрген қатардағы жауынгер жерлесіміздің анасы Гүлжанат Рүстемоваға командир алғысын жеткізді.

Нұржан Кенжеұлы

10.05.2017

Қоғам

Әскерге шығарып салдық

10.04.2013

Кеше Өскемендегі этносаябақта «Әскерге шақырылғандар күні» аталып өтті. Жастарға патриоттық тәрбие беруді, әскерилердің мәртебесін жоғарылатып, жағымды имиджін қалыптастыруды мақсат тұтқан салтанатты шараға облыс Әкімі Бердібек САПАРБАЕВ қатысты.

– Отанды қорғау – әрбір азаматтың міндеті, ел алдындағы асыл парызы. Бұл әрбір азаматқа үлкен жауапкершілік артады. Сондықтан біз тәуелсіз мемлекетімізді көздің қарашығындай сақтап, қорғауымыз керек. Бүгін міне, жастарымызды жылдағы дәстүрге сай әскер қатарына аттандырып отырмыз. Ертеңгі күні сіздер сарбаз атанғанда ата-аналарыңыз бен білім берген ұстаздарыңызды, туған ел-жұртты ұятқа қалдырмай, Отан алдындағы борыштарыңызды абыроймен атқарып, елге оралуға тілектеспін, – деп өзінің ізгі ниетін білдірген облыс Әкімі Бердібек САПАРБАЕВ бүгінгі күні мемлекет тарапынан әскерилерге үлкен қолдау көрсетіліп жатқанын тілге тиек етті.

Шығыс Қазақстаннан жыл сайын әскер қатарына екі мыңға жуық азамат қабылданып келген. Биыл да сарбаз атанатындар саны осы шамадан аз емес көрінеді. Ал көктемгі шақыртумен біздің өңірден бүгінде мыңға жуық азамат әскер қатарына алынды.

Қорғаныс министрлігінің ресми дерегіне жүгінсек, республика бойынша «Көктем – 2013» әскери науқанына он бес мыңнан астам қазақстандық іліккен. Олардың жеті мыңы аталмыш министрліктің бөлімшелерінде, қалғаны республикалық гвардия мен өзге қызметтерде борышын өтемек.

Мамандардың айтуынша, әскерге қабылданатындардың жеке тұлғасы жіті зерттелген. Шақыру комиссиясының өкілдері олардың біліміне, мамандығына, әскери дайындығына, моральдық-іскерлік сапасына баса назар аударған. Жастарды әскерге іріктеу кезінде психологиялық тестілеу шарасы да өткізілген.

Облыстық жастар саясаты мәселелері басқармасы мен жастар орталығы тізе қосып ұйымдастырған этносаябақтағы ерекше шараның барысында заманауи қару-жарақтар көрмесі, түсінік жұмыстарын жүргізетін келісімшарт бойынша үгіт бұрышы жұмыс істеді. Көпшілікке арнап дәм татуға жауынгерлердің қолымен әзірленген «Сарбаз ботқасы» ұсынылды. Этносаябаққа жиналған бір қауым жұрт сондай-ақ, кейінгі жас буынның патриоттық рухын көтеріп, жігерін жанып, намысын оятатын өршіл әндер шырқалған концерттік бағдарламаны тамашалады.

Әрине, мәпелеп өсірген баласын әскерге шығарып салып тұрған ата-аналардың, сүйген жігітімен қоштасуға келген қыздардың, тай-құлындай тебісіп өскен достардың дәл сол сәтте қандай күйде болғанын, жүрек түкпірлерінде қандай сезімнің бұлқынғанын түсіну қиын емес еді. Дегенмен аймақ басшысы айтқандай, қазір бұрынғыдай аумалы-төкпелі кезең емес, бейбітшілік салтанат құрған, тұрақтылық пен татулық ірге тепкен мамыражай шақ. Мемлекетіміз өзінің қарулы күштеріне жете көңіл бөліп, мықты қолдау білдіріп отыр. Мұны «Шығыс» өңірлік қолбасшылығы әскерлерінің қолбасшысы, генерал-майор Василий Рысбаев та атап көрсетті.

– Құрметті ата-аналар, келешек сарбаздар! Бүгінгі таңда жастардың әскери борышын лайықты етіп өткеруіне барлық жағдай жасалған. Уайымдайтын түк те жоқ. Баяғыдай аумалы-төкпелі заман емес қазір, жауынгерлерге қажетті техникалар жеткілікті, тәлім-тәрбие беретін білікті офицерлер де көп, – деді ол.

Сонымен бірге бозбалаларға сәттілік тілеп, жүрекжарды лебіздерін жеткізушілер қатарындағы Ұлы Отан соғысының ардагері Дмитрий Москальцев, Ауған соғысының ардагері Қадырғазы Баймұратов сынды аға буынның өкілдері жастарға тағылымды сөздерін арнады.

– Осындай салтанатты жиын өткізіп, жастарға ерекше көңіл бөліп жатқан басшылыққа ата-аналар атынан ризашылығымды білдіремін. Ал біздің балаларымыз еліміздің қай өңірінде борышын өтеп жүрсе де, туған жерінің атына кір келтірмей, Отан алдындағы қасиетті парызын адал орындайды деген сенімдемін, – деді Көкпекті ауданынан келген Рахат Аринова.

Айта кетейік, іс-шара аясында «Жауынгердің ағашы» атты акция бастау алды. Тұңғыш рет тұсауы кесілген акцияның мақсаты – Қарулы күштер қатарына алынған болашақ жауынгерлер осы этносаябақта жыл сайын өз атауларымен көшеттер отырғызу арқылы қаланы көгалдандыруға үлестерін қосып, кейінгі өсіп келе жатқан балаларға өнеге қалдырады. Өскеменнен бастау алған мұндай шаралар өңіріміздің өзге де аудан-қалаларында жалғасып таппақ.

Серік Әбілхан

10.04.2013