Өскеменге өзгеше реңк беретін жобалар қолға алынады

Алдағы жылы Өскеменге өзгеше реңк беретін абаттандыру жұмыстары жүргізіледі. Еліміздің өзге қалаларында жоқ әсем субұрқақ, көрікті аллея, балақайлардың ойын алаңқайы бәрі де тамаша үйлесім тауып, шаһардың көркін аша түспек. Бүгінгі таңда әзірленіп жатқан осындай жобалармен облыс әкімі Даниал АХМЕТОВ танысты.
Аймақ басшысы алдымен қаланың орталық алаңын абаттандыру жұмыстары қалай жүргізілуі керектігіне мән берді. Жоба авторларының айтуынша, ол жердегі бұрынғы субұрқақтың орнына сәні мен салтанаты келіскен, жарықтандырылған түрі орнатылмақ. Жарықтандырумен айналысатын астаналық компанияның өкілдері облыс әкімдігінің екі жағында тұрған еңселі қос ғимараттың қасбетін ойнамалы шамдармен безендірмек. Хәкім Абайдың қара сөздері жазылған тақта тастар алаңның төрінен орын алмақ. Сондай-ақ, облыс басшысы жерге төселетін тақта тастарды, адамдар отыратын орындықтарды сапалы әрі сәнді етіп жасауды ескертті.
– Абаттандыру жұмыстарында сапаға ерекше мән беру керек. Орнатқан күнқағарлар мен орындықтар бір-екі жылдан соң өңі кетіп, қирап қалмауы тиіс. Әрбір заттың эстетикалық мазмұны ескерілсін. Қауіпсіздік мәселесін де қаперден шығармау керек. Өйткені, балалардың ойын алаңын жасағанда қолданылатын заттар олардың денсаулығына зиян келтірмейтін болсын, – деді аймақ басшысы Даниал АХМЕТОВ.
Өзен вокзалынан Ауған соғысының құрбандарына арналған Даңқ мемориалына дейінгі Ертістің жағалауы да болашақта өскемендіктер мен қала қонақтарының жиі барып демалатын орнына айналатыны сөзсіз. Себебі, мұнда бұрын-соңды болмаған субұрқақ орнатылып, мемориалдың айналасы абаттандырылады. Көз тартар көрікті шамдарды да осы жерден көруге болады.
Облыс орталығының ажарын аша түсетін тағы бір жоба – Металлургтер мәдениет үйімен басталатын Гагарин бульварындағы аллея. Аллеяның мәдениет үйіне қарама-қарсы жақ басында кішкентай балақайларға арналған ойын алаңқайы болады. Алаңқай әткеншектен бастап, балдырғандардың қызығына жарайтын барлық ойын құралдарымен жабдықталады. Бұған қоса аллеяда жастар қыдыратын, үлкендер жағы шүйіркелесіп отыратын орындар да қарастырылған. Қысқасы, адамдардың алаңсыз демалып, көңіл сергітуіне, серуендеуіне барынша жағдай жасалады.

Серік Әбілхан