Қоғам

Өскемендік ғалым ұлттық ойыншықтар шығарады

Өскемендік ғалым ұлттық ойыншықтар шығарады


«Balausa» стартап-жобасының авторы, С.Аманжолов атындағы ШҚМУ физика және технологиялар кафедрасының шебері Нұрлан Досмұрат «Stratup Bolashak: Менің арманым» стартап-жобалардың ұлттық байқауында финалға шықты.

Жас ғалым ұлттық ертегілер мен мультфильмдер негізінде табиғи материалдардан ыдыс-аяқ, жиһаз, ойыншық және киім-кешек өндіруді қолға алғалы отыр.

– Менің жұмысымдағы негізгі технология – ЧПУ станогы. Ол – сандық бағдарламамен басқарылатын аспап. Мен бұрыннан осы станокпен жұмыс істегенді ұнатамын, сол себепті 2017 жылы өзімнің алғашқы лазерлі ЧПУ станогымды сатып алдым. Сосын ақырындап станокпен түрлі заттар жасай бастадым. Өзім педагог әрі үш баланың әкесі болғандықтан, тәрбие мәселесі әрқашан ойымда жүреді. Елімізде ұлттық бағытта тәрбие беретін ойыншықтар жоқтың қасы, сол себепті өз мүмкіндігімді пайдаланып, ойыншықтар шығаруды қолға алдым. 2017 жылы ақпан айында өткен «STARTUP BOLASHAK: Менің арманым» ұлттық байқауы арманымды жүзеге асыруға түрткі болды. Қазір кішігірім цех құрдық. Бұйырса, бір айдан кейін байқаудың финалына барамыз. Айтпақшы, байқау басталғанда 500 жоба қатысқан болатын, соның тек 34-і финалға жолдама алды, – дейді Нұрлан.

Нұрлан Досмұраттың айтуынша, жобаның артықшылығы – ұлттық бояуды қолдануда. Жобаның мақсаты – ұлттық тәрбиелік рөл атқаратын балалар өнімдерін шығару, «Balausa» брендін қалыптастыру, балалар тәрбиесіне бренд-өнім арқылы үлес қосу.

– Жобаны қиялдау оңай, ал жүзеге асыру қиын екен. Бірақ жобаға деген қызығушылығым қиындықты жеңуге күш берді. Жобаны бастағаннан бері демалған емеспін, күніне 15 сағат жұмыс істеймін. Менің қарбалас тірлігіме балаларымның үйренгені соншалық, сәл демалып отыра қалсам, үш жасар қызым «әке, неге жұмыс істемейсің, жұмыс істесеңші» дейтінін қайтерсіз, – деп күледі Нұрлан Досмұрат.

Қазір жоба аясында цех құрылып, станоктармен толығып жатыр. Алғашқы өнімдер сатылымға шығарылған, өнім көлемін арттыру үшін инвесторлар мен мемлекеттік гранттар қарастырылуда. Өндіріс арқылы мүгедек жандарды жұмыспен қамтуға болады.

– Жоба енді ғана жүзеге асып отырғандықтан, кейін бәйтеректей алып болсын деген үмітпен «Балауса» деп қойдық. Жоспар – жыл аяғына дейін Өскеменде толыққанды цех құру және өнімдерді бүкіл Қазақстанға тарату. Қазіргі уақытта бізде шағын болса да өндіріс бар. Енді соны ұлғайту жұмыстары жасалып жатыр, – дейді жас кәсіпкер.

Ержан Әбіш

Осы айдарда

Back to top button