Өскемендегі драма театр қашан ашылады?

Облыс әкімі Даниал АХМЕТОВ Өскеменде салынып жатқан облыстық драма театрының құрылыс жұмысымен танысты. Сондай-ақ, аймақ басшысы салынып жатқан қан орталығында болып, осыған қатысты құзырлы мекемелерге бірқатар тапсырма жүктеді.

Нысанда жұмыс күші жеткіліксіз

Облыс әкімі алдымен бүгінде Шығыс Қазақстандағы ең ірі құрылыс нысандарының бірі саналатын облыстық драма театрына ат басын тіреді. Айта кетер жайт, мердігер компания мәдениет ошағын өткен жылдың соңына дейін тапсыруы керек болатын. Алайда, белгілі бір себептерге байланысты нысанның қолданысқа берілу уақыты бірнеше рет шегерілген.
Театрға келген облыс әкімі Даниал АХМЕТОВ бірінші кезекте нысанның макеттерімен танысып, спектакльдер қойылатын, сондай-ақ, түрлі салтанатты шаралар өткізілетін залдардың, дәліздер мен холдардың дизайнына ерекше назар аударды. Театрдың ішін мұқият аралап көрген аймақ басшысы мұндағы бірқатар сәулеттік шешімге көңілі толмайтынын айтып, құрылыс жұмыстарының қарқынын сынға алды. Мәселен, 600 көрерменге шақталған үлкен залдың фойесі тым кішкентай екен. Сондай-ақ, ғимаратта кәріз құбырлары да жеткіліксіз көрінеді. Аймақ басшысы бұл екі мәселеге қатысты жобалаушылар мен мердігерлерге тиісті тапсырмалар жүктеп, олардың орындалуы жіті қадағаланатынын ескертті.
– Мұндай театр Қазақстанның өзге еш өңірінде жоқ. Бұл жерде қазақ труппасы да, орыс труппасы да қызмет ететін болады. Қос өнер ұжымына бірдей жағдай жасалады. Енді театрдың дизайнына көңіл бөлу қажет. Жаңа өнер ордасының табалдырығын аттаған кез келген көрермен салтанатты, қайталанбас атмосфераға енуі тиіс. Ал ол үшін көрермендер залын ғана емес, бүкіл дәліздер мен фойелерді заманауи нақышта әрлендіруіміз керек. Әр қабатты, әр фойені жарық, адамға ерекше көтеріңкі көңіл күй сыйлайтын түске бояу жағына ден қойыңыздар. Бұл ғимарат бірінші кезекте қарапайым көрермен үшін жасалатынын естен шығармаңыздар, – деді облыс әкімі Даниал АХМЕТОВ.
Облыстық драма театрын еліміздің үздік театрларының біріне айналдырып тұрған нәрсе деп оның соңғы үлгідегі жаңа сахна кешенімен жарақтандырылуын айтуға болады. Мұндай заманауи кешен Қазақстандағы екі-ақ өнер ордасында бар көрінеді. Оның бірі Алматыдағы Лермонтов атындағы театр болса, екіншісі – Астанадағы опера және балет театры екен. Қазір шығысқазақстандық театр актерлеріне тың шығармашылық қырларымен танылуға мүмкіндік беретін жаңа сахна кешені мен аппаратураны Ресейден келген мамандар орналастыруда. Дегенмен, мұндай техникамен жұмыс істеу үшін білікті мамандар – инженерлер мен механиктер қажет. Облыс әкімі Даниал АХМЕТОВ мұндай мамандарды қазірден іздестіре беру керектігін еске салды.
Сонымен қатар, аймақ басшысы нысандағы жұмыс қарқынын еселеу керек екенін қадап айтты. Ол үшін мұнда жергілікті құрылыс компанияларын да тарту қажет.
– Дәл осындай зәулім нысанда бір мезетте кем дегенде 200 адам жұмыс істеуі тиіс. Әйтпесе, театрды қолданысқа жуық арада бермейтініміз анық. Сондықтан келесі аптаға дейін нысанды қажетті мөлшердегі жұмыс күшімен қамту мәселесін шешіңіздер, – деген аймақ басшысы театр биылғы 1-мамырда ашылуы керек екенін ескертті.

Электр қуатымен қамту
мәселесі шешімін таппақ

Аймақ басшысы Даниал АХМЕТОВ сонымен қатар, облыстық қан орталығында болып, нысан басындағы жұмыс қарқынымен танысты. Облыстағы ең «сақалды» да даулы құрылыс нысандарының бiрi болып тұрған қан орталығында бүгінде айтарлықтай шаруа тындырылыпты. Қазір мұнда ғимараттың ішкі бөлмелерін әрлеу сияқты ұсақ жұмыстар ғана қалған екен. Болашақта облысымыздағы іргелі медициналық мекеменің біріне айналатын қан орталығына бас сұққан аймақ басшысы құзырлы органдар өкілдеріне жұмысты ширатып, нысанды тезірек пайдалануға беру керектігін айтты.
Естеріңізге сала кетейік, облыстық қан орталығының құрылысы басталғанына осымен алты жыл болыпты. Бірнеше рет ауысқан мердігер компаниялардың жауапсыздығынан аталмыш нысанның құрылысы сағызша созылып кеткен. Ал қазіргі мердігер компанияның мамандары қан орталығы көктемде пайдалануға беріледі деп сендіріп отыр. Дегенмен, бұл нысанда да түйткілді мәселелер бар екен. Және оның ең негізгісі ғимаратты электр қуатымен қамтуға қатысты.
Қазір облыс орталығында электр энергиясының тапшылығы сезілуде. Осыған байланысты қаланың жаңадан бой көтеріп келетін ықшамауданындағы қан орталығын электр қуатымен қамту жағы қиындық туғызып отырғанға ұқсайды. Мамандардың айтуынша, медициналық мекеменің толық қуатта жұмыс істеуі үшін бір мегаватт көлеміндегі электр энергиясы қажет. Ал «ШҚ АЭК» АҚ болса, бұл мөлшердің жартысын ғана ұсынуға әзір.
Аймақ басшысы Даниал АХМЕТОВ бір апта ішінде қан орталығын қажетті мөлшердегі электр энергиясымен қамту мәселесі шешімін табатынына сендірді.
Сонымен қатар, бүгінде мұнда медициналық құрал-жабдықтарға қатысты мәселенің де түйіні тарқамай тұр. Келтірілген дерек бойынша, қан орталығына 415 миллион теңгенің құрал-жабдығы сатылып алынуы керек-тін. Алыс шетелден әкелінетін аппаратарға алдын ала төлем жасалу қажет. Ал мұндай қаражат қазірде жоқ екен.
– Қан орталығының ресурстарына қатысты негізгі мәселелер шешімін тапқанын білемін. Дегенмен, қолымызда медициналық мекеменің бүгінгі жағдайын сипаттайтын құжаттар болуы керек. Жауапты тұлғаларға апта соңына дейін осы құжаттарды әзірлеуді тапсырамын, – деген облыс әкімі құзырлы органдардың басшылары құрылыс нысандарында атқарылған жұмыс туралы апта сайын есеп беріп отырулары керек екенін де ерекше атап өтті.

Нұржан Кенжеұлы