Өскеменде толық циклді жаңа зауыт салынады

Облыс орталығының іргесіндегі Арматура зауыты орналасқан маңайды бұдан былай индустриялды аймақ деп атауға болады. Бұл жерде жеті бірдей индустриялды жоба іске асырылмақ. Соның алғашқысы – жуықта бұл жерде базальтты жылу сақтағыштар мен сендвич пакеттер өндіретін толық циклді жаңа зауыт бой көтереді.
Өнімділік қуаты жылына 30 мың тонна болатын жаңа зауыт өскемендік «Техстройиновация» ЖШС және Чехия Республикасының «Фридлантские стройирны» Расл и сын» компаниясы арасындағы келісімнің аясында салынбақшы. Чехия жағы жаңа зауытқа қажетті құрал-жабдықтарды сатып алу үшін құны 8 950 000 евро көлемінде инвестиция құйып отыр. Жобаның жалпы құны 22 млн. евроны құрайды.
«Ертіс» әлеуметтік кәсіпкерлік корпорациясы индустриялды аймаққа жер телімін, инфраструктура, жол және теміржол тұйығын ұсынып отыр. Қалған жұмысты Қазақстан мен Чехия республикаларының қос компаниясы бірлесе атқармақшы. Чехиялық «Фридлантские стройирны» Расл и сын» компаниясының атқарушы директоры Яна Дворжакованың айтуынша, жаңа зауытта заманауи құрылыс материалдары өндірілетін болады. Шатыр астын, қабырға арасын қымтауға арналған жылу сақтағыш материалдар қазір де үлкен сұранысқа ие. Бүгінгі күні жүргізіліп жатқан ауқымды құрылыстардың барлығына осындай жеңіл де жылы және бағасы арзан материалдар пайдаланылады. Сонымен қатар ол отқа жанбайтын, суға төзімді және экологиялық жағынан таза болып келеді екен.
Осы жылдың қараша айынан бастап қолға алынатын зауыт құрылысына 100-ден астам адам тартылмақшы. Ал зауыт өз жұмысын бастағаннан кейін бұл жерде 200-ден астам тұрақты жұмыс орыны ашылады екен. Зауыт толық циклді болғандықтан өнімге қажетті шикізат маңайдағы 15 шақырым қашықтықтан әкелінетін көрінеді.
– Шикізаты жанында тұрған зауыттың өнімділік қуаты мол болуға міндетті. Біз зауыт құрылысын ең қысқа мерзімде аяқтап, зауыт шығынын 4-5 жылдың ішінде ақтаймыз. Ең бастысы, бұл жерде өте сапалы және бағасы қол жетімді құрылыс материалдары өндірілетін болады, – дейді Яна Дворжакова.
Дәстүрге сәйкес жаңа нысанның алғашқы іргетасына символикалық капсула бірге қаланды. Облыс әкімінің орынбасары Нұрлыбек Шерубаев және Чехия Республикасындағы Пльзень аймағының гетманы (басшысы) Вацлав Шлайс капсуланы бетон ішіне салтанатты жағдайда салды.
– Үлкен құрылыстың алғашқы кірпіші осылай қаланып жатыр. Ертең бұл аумақта үлкен инновациялық жобалардың жалғасын тауып жататынына сенімім мол. Қос компанияның жұмысына сәттілік тілеймін, істеріңіз ілгері баса берсін,-деді облыс әкімінің орынбасары Нұрлыбек Шерубаев құттықтау сөзінде.
Бұл – жоғарыда айтып өткен жеті жобаның біреуі ғана. Мемлекет өнім өндірушілерге қажетті жер телімі мен инфраструктураны қажетінше ұсынып отыр. Теміржол мәселесі де шешілген. Аталмыш зауыттан басқа алдағы уақытта бұл инустриялдық аймақта шаруашылыққа арналған қағаз өнімдерін шығаратын, сапалы гипсокартон жасайтын, сондай-ақ, отын брикеттер және тау-кеніші машиналары мен оған қажетті құрал-жабдықтар өндіретін бірнеше зауыт қатар салынбақ.

Дарын Нұрсапаров