«Өскемен қаласының Құрметті азаматы» атанды

Әріптесіміз, облыстық «Дидар», газетінің бұрынғы қызметкері, қазір республикалық Егемен Қазақстан газетінің шолушысы болып жүрген Сұңғат Әліпбай «Өскемен қаласының Құрметті азаматы» атанды.
Ол 1990 жылы облыстық «Дидар» газетіне жұмысқа келді. «Дидар» газетінде 15 жылға жуық еселі еңбек етті. Қазір ол еліміздің бас газеті – «Егемен Қазақстанда» шолушы болып қызмет атқарып жүр. Сұңғат Әліпбайдың қозғайтын негізі тақырыбы – экономика саласы. Ол «Егемен Қазақстан» газетінде Елбасының шетелдік сапарларын жұртшылыққа жеткізетін журналистердің қатарына алынған. Сұңғат Әліпбай Президентпен бірге Америка, Қытай, Жапония, Йордания, Бельгия, Германия, Австрия, Малайзия сияқты көптеген мемлекеттерге барып, Елбасының іссапарыынан мақалалар жазды.

Еңбек жолын Зайсан аудандық «Достық» газетінен бастаған журналист аудандық радио хабарларын ұйымдастырушы, облыстық «Коммунизм туы» (қазіргі «Дидар») газетінің Зайсан, Марқакөл аудандары бойынша меншікті тілшісі қызметтерінде болды. Тәжірибесі толысқан сәтте облыстық газеттің редакциясына жұмысқа алынып, алғашында тілші, одан кейін аға тілші, экономика бөлімінің меңгерушісі қызметтерін атқарды.
-Бүгін міне, менің ұзақ жылғы журналистік еңбегім еленіп, құрметке бөленіп отырған қуанышты шағым. Адамның өмірінде мұндай бақытты сәттер өте сирек болады. Құрметті атақ алуыма қолдау көрсеткен облыстық «Дидар» газеті редакциясының ұжымына алғысымды айтамын,-дейді журналист Сұңғат Әліпбай.

Дарын Нұрсапаров