Шығыстың кереметіне шетелдіктер де тамсанды
«Нұртау» тау шаңғы кешенінде кезекті қысқы демалыс маусымы ашылды. Өскеменнің түстігіне қарай 35 шақырым қашықтықта орналасқан курортта ұйымдастырылған шараға облысымыздағы демалыс базаларының өкілдері, мектеп оқушылары мен студенттер, «Үміт» балалар үйінің тәрбиеленушілері, бірқатар мемлекеттік органдардың ұжымдары, қала тұрғындары мен қонақтары келіп, шаңғы, сноуборд теуіп, көңілді демалып қайтты.
Қысқы демалыс маусымының ашылуына, сонымен қатар, Парламент Сенатының депутаты Сергей Плотников пен Мәжіліс депутаты Светлана Ферхо, сондай-ақ, бір топ шетелдік қонақтар шақыртылыпты. Атап айтқанда, Шығыс Қазақстанның әсем табиғатын өз көзімен көріп қайту мақсатымен облысымызға АҚШ, Канада сияқты қысқы туризм саласы жақсы дамыған елдермен қатар, қардың өзі таңсық болып көрінетін Ямайка, Кения және Оңтүстік Африка сынды мемлекеттердің азаматтары ат басын тіреген екен. Олар тұмса табиғаттың сұлулығына тамсанып, тебіреністерін жасыра алмады.
– Бұл жердің табиғаты керемет екен. Мен таныстарымнан Шығыс Қазақстанның көрікті жерлері көп екенін еститінмін. Сол себепті, сіздерге арнайы келуге, Алтайдың табиғатын өз көзіммен көруге бел будым. Тамаша әсер алдым. Осындай шара ұйымдастырып, бізді шақырғандары үшін ұйымдастырушыларға көп алғыс айтамын, – деді АҚШ-тан келген Рональд Родригес.
Ал Оңтүстік Африкадан келген Кэролайн есімді мейман өз сөзінде Шығыс Қазақстанның демалыс базаларындағы қызмет құны Еуропадағы, атап айтқанда, Швейцария, Австрия, Италия мен Франция сияқты елдердігіден әлдеқайда арзан екенін ерекше назарға алды.
«Нұртаудағы» шараны ұйымдастырған облыстық туризм және сыртқы байланыстар басқармасы мен «БИПЭК Авто-Азия Авто» компаниялар тобы осы шетелдік туристерді тарту мәселесіне айрықша мән беріпті.
– Қазір облыс аумағында «Нұртау», «Алтай Альпісі», «Изумрудный» сияқты бірнеше демалыс базалары жұмыс істейді. Олардың әлеуеті бір маусымда 40 мыңға жуық адамды қабылдауға жеткілікті. Алдағы уақытта өңірдегі өзге демалыс орындарының жағдайын жақсартып, онда туристер тарту жағына ден қоятын боламыз. Бүгінде біздегі туристік әлеуетті толықтай пайдалануға қолбайлау болып отырған басты проблема деп Шығыс Қазақстандағы демалыс базаларының дұрыс жарнамаланбауын айтар едім. Осы олқылықтың орнын толтыру мақсатында биылғы қысқы демалыс маусымының ашылуына жеті мемлекеттің өкілдерін шақырып, оларға біздегі табиғат пен сервистің артықшылықтарын көрсетуге тырыстық, – дейді облыстық туризм және сыртқы байланыстар басқармасының басшысы Ержан Сембинов.
«Нұртауда» өткен жаңа демалыс маусымының ашылуында да қысқы туризмге бет бұрған жерлестеріміздің қарасы көп екені байқалды. Жас демей, кәрі демей келгеннің бәрі таудан шаңғы, сноуборд және стьюбпен сырғанауға асықты. Одан қалғандары қар атысып, ойнап-күліп, уақыттарын көңілді өткізді. Ұйымдастырушылар Өскемендегі «Үміт» балалар үйінен келген бір топ жеткіншекті де назардан тыс қалдырмады.
Облыстық туризм және сыртқы байланыстар басқармасы атынан үміттік балаларға бағалы сыйлықтар мен тәтті тағамдар табыс етілді.
Нұржан Кенжеұлы
