Шығысқазақстандықтар ерекше белсенділік танытты

Кеше елімізде тарихи маңызды оқиға – Президент сайлауы болып өтті. Яғни, еліміздің әрбір азаматы өз конституциялық құқығын орындап, өз болашағын таңдады, мемлекеттің келешек бағыт-бағдарын айқындап, билікке баға берді. Шығыс Қазақстанның тұрғындары осы аса маңызды сайлауға бір кісідей атсалысып, айрықша азаматтық белсенділік танытты.
Облыс орталығында дауыс беру бүкіл еліміздегідей жергілікті уақыт бойынша таңғы сағат 7.00-де басталып, 20.00-ге дейін жалғасты.
Өскемендегі гуманитарлық колледжде орналасқан №79 сайлау учаскесіне сағат 7.00-ге таман барғанымызда біршама тұрғынның жиналып, учаскенің ашылуын күтіп тұрғанын көрдік. Сайлау учаскесінің жұмысы ресми түрде еліміздің Әнұранымен салтанатты түрде ашылды. Учаскенің төрағасы Ерлан Құдайбергенов жиналған қауымға дауыс берудің тәртібін түсіндіріп, көпшілік алдында бюллетеньдерді шығарып, дауыс берілген бюллетеньдерді салатын жәшіктерді мөрледі.
Бұл сайлаудың ерекшелігі сол, сайлау учаскелеріне таңертең ерте келіп, дауыс берген азаматтарға, тұңғыш рет дауыс берушілерге және балаларымен келген отбасыларға естелік сыйлықтар үлестірілді.
Сағат 9.00-ден бастап барлық сайлау учаскелерінде концерттік бағдарламалар және кішігірім сауда-саттық орындары ұйымдастырылды. Мәселен, біз барған №40 сайлау учаскесінде Оқушылар шығармашылық үйінің, ал №8 сайлау учаскесінде «Үміт» балалар үйінің шығармашылық ұжымдары жұртшылыққа арнап концерттік нөмірлер ұсынды.
№40 сайлау учаскесінде де дауыс берушілер саны көп болды. Бюллетенін жәшікке салып жатқан 73 жастағы Күшайра Нұрмұқанова өмір бойы сайлаулардан қалмай дауыс беріп келетінін айтады, ал келесі болып өз таңдауын жасаған ШҚМУ студенті, болашақ тәржімашы Роман Королев алғаш рет дауыс беріп тұр екен. «Тұңғыш рет дауыс беруім өмірімдегі елеулі сәттердің бірі болып есімде қалары сөзсіз, мемлекет басшысын сайлау – ел тарихындағы аса маңызды оқиға, менің ойымша жастар осы науқаннан қалыс қалмай, белсенді атсалысулары тиіс» дейді ол. Ал Радим Ходжамжаров өзінің зайыбы Маликамен және екі жасар қызы Арзумен бірге үшінші рет дауыс беруге келіпті. Жалпы, саяси науқанға отбасымен келген өскемендіктер аз болған жоқ. №8 сайлау учаскесінен шығып келе жатқан қала тұрғыны Тоқтамұрат Мағзұмов болса, бізге сайлауға өте жақсы көңіл күймен келіп тұрғанын айтты, бұрынғыдай ерте тұрып дауыс беруге үйреніп қалған ол түстен кейін отбасының да сайлауға келетінін жеткізді.
Сондай-ақ, сайлау учаскесіне келген тұрғын өзінің аты-жөнін тізімнен таба алмаған жағдайда, комиссия тез арада Халыққа қызмет көрсету орталығының базасы арқылы анықтама қағазын шығарып, кедергісіз дауыс беруге мүмкіндік жасады.
№8 сайлау учаскесінде халықаралық бақылаушылардың саяси науқан туралы пікірлерін білдік. Олардың айтуынша, өңірде президенттік сайлау барысы жоғары қарқынмен өтуде. ТМД бақылаушылар миссиясының өкілі Петр Фризен таңертеңнен бері бірнеше сайлау учаскелерін аралап үлгергенін, әзірге ешқандай заңбұзушылық байқалмағанын жеткізді.
Өскеменге іргелес Ресей Федерациясының Алтай өлкесінен бірқатар бақылаушылар тобы келген болатын. Барнаул қаласынан келген халықаралық бақылаушылар Президент сайлауын бақылау барысында аталған саяси оқиғаның еліміздің ынтымағы мен бірлігін тағы бір паш етіп жатқанын ерекше атап өтті.
– Мен бірқатар сайлау учаскесін араладым. Бәрінде ұйымдастырушылар қызметі, ондағы дауыс беру үрдісін жүргізуге жасалған жан-жақты дайындық маған ерекше әсер етті. Екіншіден, біз сайлау учаскелеріндегі комиссия өкілдерінің сайлауды өткізуге тыңғылықты дайындықтары барлығын байқадық. Олармен әңгімелесу барысында қандай да бір көңіл толмаушылық, көздеріне түскен құқықбұзушылықтар туралы сұрадық. Әзірге ондай келеңсіз оқиға тіркелмеген екен. Кандидаттардың сенімді өкілдерімен де сөйлестік. Олар да дауыс беру барлық заң талаптарына сай өтіп жатқанын атап өтті. Өңір тұрғындарында бірлік пен ұйымшылдық бар екені айқын аңғарылады. Өйткені, таңертең сайлау учаскелерінің алды толып тұрды. Халық әлі де кезек-кезегімен дауыс беріп жатыр. Бұл қазақстандықтардың өз келешектеріне жауапкершілікпен қарайтынын, азаматтық тұрғыдан белсенді екендігін көрсетеді. Сонымен бірге, бүкіл отбасымен, бала-шағасымен келіп жатқан тұрғындарды көргенімде, Президент сайлауы елдегі маңызды оқиғалардың бірі ғана емес, салтанатты мерекелерден де кем түспейтінін аңдадым. Көптеген учаскелерде концерт ұйымдастырылып, сауда-саттық алаңдары жұмыс істеп жатыр. Сондықтан сайлауда мерекеде жүргендейміз. Халық жайдары да көңілді қалыптарымен бізге де қуаныш сыйлады, – дейді ол.
Сайлау учаскесі комиссияларының мүшелері денсаулығына байланысты үйлерінде отырған ардагерлер мен зейнеткерлердің де дауысын жинады. Айталық, Жібек маталар комбинаты ықшамауданының тұрғыны Шернияз Жаманбаев пен Шолпан Кәбдікәрімова өз таңдауларын жасады. Сәтпаев даңғылындағы 14/3 үйде тұратын оларға №3 сайлау учаскесі комиссиясы төрағасының орынбасары Рулан Нысаинов келіп, қос қарияға дауыс беру бюллетеньдерін ұсынды.
1932 жылы Тарбағатай ауданындағы Шорға ауылында туған Шернияз ақсақал аталған ауданның Крупская атындағы колхозын құруға атсалысқан, ауданның құрметті азаматы. 1936 жылы Ақжар ауылында дүниеге келген зайыбы Шолпан Қабдікәрімова 30 жыл бастауыш сынып оқушыларына ұстаздық етіпті. «Алтын алқа» иегері атанған әже сегіз баланы дүниеге әкеліп, 12 немере мен төрт шөберенің қызығын көріп отыр, дербес зейнеткер. Қол ұстасып ғұмыр кешкендеріне жарты ғасырдан асқан қос қария да – тыл ардагерлері.
– 1954 жылдан бастап дауыс беріп келемін. Бұрын сайлау учаскелеріне өз аяғыммен барып дауыс беруші едім. Биыл денсаулығым жарамағандықтан, сайлау учаскесіне өтініш жаздым. Балаларымыздың бүгінгі бақуатты да берекелі тұрмыстары мен келешегі үшін таңдауымызды жасадық, – деді Шолпан апа.
Комиссия төрағасының орынбасары Рулан Нысаинов кешке дейін өз учаскелеріне тиесілі осындай елу шақты қарияның үйіне барып, дауыстарын жинап үлгеру қажеттігін жеткізді.
Расында да, Өскеменде Президент сайлауы өзгеше өтті. Мәселен, №23 сайлау учаскесінде мерекелік шара ұйымдастырылды. Аталған сайлау учаскесінің төрағасы Нұрлан Байжігітұлының ұйытқы болуымен сайлау учаскесі аумағына киіз үй тігіліп, дауыс беруге келген адамдар тегін тамақтандырылды. Жұрт назарына шаһардың танымал өнерпаздары концерт ұсынды. Сондай-ақ, ата-аналарымен еріп келген бүлдіршіндер үшін үлкен батут қойылды.
Балалардың көңілін көтеру үшін клоундар да шақырылған екен. Сайлау учаскесінде ересектер де ескерілген. Яғни, тұрғындар дауыс берген соң ұтыс купондарына ие болды. Ұтысқа флешкадан бастап шаңсорғыш, қысқа толқынды пеш, ұялы телефон, планшет сынды бағалы тұрмыстық техника ойнатылды, ал басты жүлде теледидар болды.
– Мен осы учаскеге ертелетіп келіп дауыс бердім. Сол кезде осы ұтыс купонын алған болатынмын. Бірақ Президент сайлауына келіп, теледидар ұтып аламын деп мүлде ойлаған емеспін. Күтпеген бір сыйлық болды, – дейді бас жүлдені ұтып алған қала тұрғыны Гүлшат Күдедаева.
Сайлау учаскесіне жиналған жұрт дауыс берген соң концертті тамашалады. «Сайлауға орай өткізілген мұндай тамаша мерекені бірінші рет көріп тұрмын» деді қала тұрғыны Әсем Тойымбаева таңданысын жасыра алмай.
Атап өтерлік тағы бір жайт, өскемендіктер осы күні қоғамдық көлікпен тегін жү¬рді. Қаланың тасымалдаушылары сайлауға дауыс беруге баратын тұрғындарға осындай тосынсый жасады. Яғни, дауыс берушілер қалалық автобустар мен трамвайларда сағат 14.00-ге дейін тегін қатынады.

Семейлік сайлаушылар таң бозынан сайлау учаскелеріне жарыса келді десек артық емес. Таңғы сағат 7-ден бастап қала ішіндегі барлық бағыттағы автобус, бағытты таксилер тұрғындарға тегін қызмет көрсеткендіктен, сайлауға белсенділік ерекше болды. Азаматтардың маңызды науқанға қатысу белсенділігін арттыру мақсатында жолаушылар тасымалымен айналысатын кәсіпорындар басшылығы тегін тасымалдайық деген шешімге келген екен.
Осылайша, олар азаматтардың өз сайлау учаскелеріне еш кедергісіз жетуін қамтамасыз етіп, саяси науқанды ұйымдастыруға үлес қоспақ ниеттерін білдіріп, бұған жергілікті халық риза болды. Көтеріңкі көңіл күйде, таңмен таласа, сайлау учаскелеріне келгендердің ең алғашқысы №42 мектептің оқушысы, 18 жасқа енді толған Нұрсұлтан Назарбаев болды. Таңғы сағат 7.00-де №164 сайлау учаскесінде дауыс берген Нұрсұлтан Назарбаев бұл өзінің тұңғыш рет дауыс беруі екендігін айтып, қуанышымен бөлісті.
– Отбасымызбен сайлауға белсене қатысамыз деп нақты шешім қабылдадық, – деді Нұрсұлтан Назарбаев. – Анам Күләнда Төкенбаева екеуіміз, міне, осы себепті сағат таңғы жетіден алғашқы боп сайлау учаскемізге келіп дауыс бердік. Мұнда барлық жағдай жасалған, әуезді ән, үлкенді сыйлап, кішіге ізет көрсету сияқты әдептіліктің барлығы сақтауға тырысып жатыр. Әркім өз таңдауын жасауда. Бұл – еліміздің болашағы. Мен, әрине, өзімнің аты-жөнім Нұрсұлтан Назарбаев болғандықтан, бұл сайлаудың халық болашағы үшін маңызды екендігін толығымен ұқтым. Мектептегі ұстаздарым да, әсіресе, дене тәрбиесі пәнінің мұғалімі Батыр Мырзабеков сайлаудың мән-мағынасын біз сияқты жастарға кеңінен түсіндірді. Сондықтан да, міне, өздеріңіз байқасаңыз, сайлауға қатысушы 18-19 жастағы жастардың да қатары мол. Мен өз дауысымды – Елбасы Нұрсұлтан НАЗАРБАЕВҚА бердім.
– Әркім өз қалауынша дауыс беруде. №160 сайлау учаскесіне ең алғашқылардың бірі болып «Қазақстан барысы» Айбек Нұғымаров кіріп келгенде, дауыс берушілердің барлығы риза болып, қол соғып, қошеметтеді. Тек ел алдында жүрген танымал, беделді адамдар ғана емес, демалыс үйлерінде, емханаларда, қатынауы қиын елді мекендерде жатқан қарапайым еңбек адамдарын да осы сайлауға атсалысулары үшін ұйымдастыру шараларын тыңғылықты жүргіздік. Барлық мәселе жан-жақты қарастырылған. Сондай-ақ, ауру-сырқаулы, жүріп-тұруы қиын адамдар үшін көшпелі жәшіктер жұмыс істеді. №160 сайлау учаскесіндегі бірнеше кабиналарда ешқандай іркіліс, кідіріс, бөгет жоқ, – деді «Ақылдастар» деп аталатын Семейдегі ардагер-ақсақалдардың қоғамдық ұйымының төрағасы, ардагер Сағындық Бейсенбаев.
Сондай-ақ, біз болған №22 мектепте орналасқан №175 сайлау учаскесінде де сайлаушылардың қатары толастамады. Солардың бірі – облыстық Абай атындағы әмбебап кітапхана қызметкері Шолпан Үбіғожақызы сайлауға белсене қатысушылардың бірі ретінде осындағы ұйымшылдыққа риза екенін атап көрсетті.
Абай ауданы
Абай елінің тұрғындары да таң сәріден тұрып, өз таңдауларын жасауға асықты. Аудан бойынша жалпы жиыны 13 сайлау учаскесі бұл күні жұмыс істеді. Мәдениет ошақтары мен мектеп ғимараттарында орналасқан учаскелік комиссия құрамында 7 адамнан құралған топ халықтың дауыс берулеріне тиісті жағдай жасап, таңдау парақшаларын ұсынды.
Әрбір сайлау учаскесінде ашылу салтанатынан кейін әнұран орындалып, одан соң сайлау науқаны толассыз ағылған сайлаушылармен қыза түсті.
Көше-көшеге бөлінген сайлау учаскелері тұрғындар арасында белсенділік танытқан сайлаушыларды ынталандыру шараларынан да шет қалдырмады. Мәселен, ең қарт сайлаушы, ең бірінші дауыс берген сайлаушы және ең жас әрі алғаш рет дауыс беруші тұлғаларды арнайы марапаттап, сый-сияпат жасады. Жалпы, ауданда 9154 сайлаушы тіркелген болса, соның 8731-і сағат 14.00-ге дейін, яғни, 95,3 пайызды өз таңдауларын жасап үлгерді.
Сондай-ақ, осы күні халықтың көңіл-күйін көтеру мақсатында Мәдениет үйінің алаңында арнайы жәрмеңке мен «Қаламқас» халық ән-би ансамблінің концерттік бағдарламасы көпшілік назарына ұсынылды.
Аягөз ауданы
Бұл күні Аягөз ауданының халқы шын мәнісінде мерекедегідей ерекше көңіл күйде болғанын айта кеткен жөн. Таңғы сағат 7.00 болмай, сайлау учаскелерінің алдына ең белсенді деген сайлаушылар келе бастады. Аягөз аспанында әсем ән әуені шалықтап, сайлау учаскелеріне қарай ағылған жұртшылыққа қуаныш пен шаттық сыйлады.
Аудандық аумақтық сайлау комиссиясы төрағасының орынбасары Мүфтиғазы Бейсенбаевтың айтуынша, аудан көлемінде 40 923 сайлаушы бар. Олар 57 сайлау учаскелерінде қалаған кандидатына дауыс берді.
Таңғы 7.00-де мемлекеттік Әнұран ойналып, митингіге аудандық мәслихаттың депутаты Нұрланбек Тоқтабаев қатысып, қарт әже жиналғандарға бата берді. №317 Жамбыл сайлау учаскесінің төрағасы Бейбіт Шумаков ешқандай тәртіп бұзушылықтың болмағанын, сайлаушылардың белсенділігінің өте жоғары екендігін айтып өтті. Бір атап өтерлігі, барлық сайлау учаскелерінде тұңғыш дауыс берушілерге, ерте келген, ең қарт сайлаушыға шағын сый-сияпат ұсынылды. 10 баланың анасы, жасы 75-ке келген Аманғайша Жакупова:
– Президенттің кезектен тыс сайлауы болады дегеннен бері бұл күнді асыға тосқанымды несіне жасырайын. Еліміз Тәуелсіздік алғаннан бері мемлекетімізді нығайтуға барынша атсалысып келе жатқан жан үшін дауыс бердім. Қазақстан деген мемлекетіміз биіктерді бағындырып, алар асулары молая берсін деп тілеймін, – деді.
Айта кетерлігі, барлық сайлау учаскелерінде арнайы бақылаушылар жауапты шара барысын қалт жібермей қадағалап отырды. Сайлауға бақылау жасау республикалық қоғамдық комиссиясының мүшелері Майра Жақманова, Жанна Исанованың айтуынша сайлау ешқандай дабырасыз, жақсы көңіл күйде өтті.
Бесқарағай ауданы
Аудандағы барлық 36 сайлау учаскесі, оның ішінде біреуі жабық түрдегі, таңғы сағат 6.00-ден бастап ашылды. Барлық учаскелерде сайлау комиссияларының мүшелері жұмыс істеді.
Аудандық ішкі саясат, мәдениет және тілдерді дамыту бөлімінің басшысы А.Ариновтың берген ақпаратына сүйенсек, бюллетеньдерге жауапты тұлғалар анықталып, телефондар мен интернет желісінің дұрыс жұмыс істеуі ұдайы тексеріліп отырды. Учаскелерде «Нұр Отан» партиясынан 35, еліміздегі сайлауларды бақылау бойынша республикалық қоғамдық комиссиядан 35 байқаушы қатысты.
Сонымен қатар, Қазақстан Республикасы Президенттігіне кандидаттардың сенімді өкілдері де саяси науқанынан тыс қалған жоқ. Бұл күні өңірдің барлық елді мекендерінде қоғамдық-саяси жағдай тұрақты болды. Сайлаушылар да белсенділік танытты.
Бородулиха ауданы
Аудан жұртшылығы сайлауға қатысуда ерекше белсенділік танытты. Аудан орталығындағы Мәдениет үйінде орналасқан сайлау учаскесіне бір отбасының өзінен 5-6 адамнан келгендер де болды.
Дауыс беруге алғашқылардың бірі болып Иощенколар отбасы келді. Сондай-ақ, ауданның ең қарт тұрғыны Галина Фоминых та бұл күні сайлау учаскесінен табылды.
– Тәуелсіздік жылдарындағы бірде-бір сайлау науқанынан тыс қалған жоқпын. Мен еліміз үшін тарихи маңызға ие осындай күнде сайлау учаскесіне келіп, өз дауысымды беруді, азаматтық борышымды өтеуді бақыт деп білемін. Қазақстанымыздың бұдан былай да тек қана алға баса бергенін қалаймын, болашақ үшін дауыс бердім, – дейді Г. Фоминых.
Айта кетер жайт, бұл күні сайлау учаскесіне дауыс беруге келген ең алғашқы дауыс берушілерге арнайы естелік сыйлықтар табысталды.
Глубокое ауданы
Глубокое аудандық аумақтық сайлау комиссиясының мәліметіне сүйенсек, кеше сағат 16.00-ге дейін аудан халқының 90 пайызы дауыс берген. Сайлауға қатысуда әсіресе, Черемшанка, Секисовка ауылдық округтері белсенділік танытты.
Сайлаушылардың 10 пайызынан астамына дауыс беру жәшігі үйлеріне жеткізілді. Олар негізінен – мүгедектер мен қарттар және науқас азаматтар. Соған қарамастан, өздерінің конституциялық қўқығын пайдаланып, ел болашағы үшін дауыс беру үшін алдын ала арыз жазған болатын. Олар үшін сайлау комиссиясының мүшелері мен бақылаушылардан тўратын топ жасақталды. Сондай-ақ, барлық елді мекендерде шалғай көшелерде тўратын халықты сайлау учаскесіне дейін жеткізетін арнайы көліктер шығарылды. Ауданның барлық сайлау учаскелерінің жанында концерттік бағдарлама ұйымдастырылып, мерекелік сауда-саттық жәрмеңкелер өткізілді.
Зайсан ауданы
Президент сайлауы Зайсан ауданында да үлкен жауапкершілікпен ұйымдастырылып, жергілікті тұрғындардың саяси науқанға белсенділікпен қатысуы аудандағы барлық 37 сайлау учаскесінде байқалды.
Мәселен, аудандағы дауыс беру құқығына ие 21 861 сайлаушының 20 780-і кешкі сағат жетіге дейін өз таңдауларын жасаған. Бұл сайлаушылардың 94 пайыздан астамын құрайды.
– Аудан бойынша сайлау учаскелері бір уақытта – таңғы жетіде ашылды. Бұл ретте ауылдық округтердегі тұрғындардың белсенділігін атап өткен орынды. Сайлау күні күндізгі екіге дейін ауылдардағы сайлаушылардың 95-98 пайызы дауыстарын беріп, өз таңдауларын жасап үлгерді. Түстен кейін аудан орталығы Зайсан қаласындағы сайлаушылар да бұл межеге жақындады. Бәрі де алдын ала жоспарлағандай, ұйымшылдықпен, жоғары деңгейде өтті,-дейді Зайсан аудандық аумақтық сайлау комиссиясының төрағасы Сабыр Әндірбаев.
Айта кетейік, Зайсан ауданындағы бұл маңызды саяси шараны екі шетелдік бақылаушы да бастан-аяқ қадағалады. Олардың бірі көршілес Ресей Федерациясынан болса, екіншісі Испания мемлекетінен келген. Шетелдік бақылаушылар тарапынан сайлауға қатысты ешқандай заңбұзушылық фактілері тіркелмеген.
Зырян ауданы
Зырян аудандық ішкі саясат бөлімінің берген мәліметтеріне сүйенсек, ауданда барлығы 81 сайлау учаскесі болса, оның 24-і Зырян қаласында орналасқан. Медициналық мекемелер жабық сайлау учаскелері саналатындықтан, ауруханаларда ем алып жатқандар өз дауыстарын сол жерде берді.
Жастары ұлғайған немесе жүріп-тұрулары қиындаған сайлаушыларға өздері тіркелген сайлау округтерінің қызметкерлері өз таңдауларын үй жағдайында жасауларына мүмкіндік туғызды. Барлық сайлау учаскелері өз сайлаушыларына таңертеңгі сағат 6-дан бастап есіктерін айқара ашты. Жергілікті көркемөнерпаздардың күшімен мерекелік концерттер мен басқа да түрлі конкурстар ұйымдастырылды. Зыряндықтардың белсенділігіне келетін болсақ, сағат 15.00-дегі мәлімет бойынша сайлаушылардың 75,3 пайызы өз таңдауларын жасап үлгеріпті. Ал сайлау науқаны аяқталғанға дейін тізімдегі азаматтардың барлығы дерлік дауыс беріп үлгерді.
Катонқарағай ауданы
Күн шықпай тұрып тірлігін қамдап үйренген катонқарағайлықтар Президент сайлауына таңнан бастап белсене қатысты. Сайлауға белсенді қатысу катонқарағайлықтар үшін ежелден бұлжымас қағидаға айналған. Мәселен, №849 Үлкеннарын сайлау учаскесі орналасқан Мәдениет үйінде таңғы жетіден бастап кісі қарасы мол болды. Әуеде әсерлі ән қалықтап, аулада арзан бағадағы азық-түлік саудасы қызды.
– Өмірімде бірінші рет саяси белсенділік танытуым Президент сайлауына дөп келгеніне қуаныштымын, – дейді №850 сайлау учаскесінде дауыс берген 18 жасар Асылхан Серасыл.
Ал еңбек ардагері Қарлығаш Смайылова ауылдастарының саяси науқанға бір кісідей жұмыла атсалысуын жақсылыққа балады.
– Жерлестеріміздің сайлауға зор ынтамен келуі мені қуантты. Барлығымыздың көңіл күйіміз тамаша. Біз тұрақтылықтың сақталып, дамуымыздың жалғасқанын қалаймыз. Екі балам да жоғары оқу орнын бітіріп, өмірден өз орындарын тапқан. Әрқайсымыздың даусымыз елдегі қоғамдық саяси жағдайдың бұрынғыдан да жақсара түсетініне әсер ететініне сенемін, – дейді ардақты ана.
Аудандық аумақтық сайлау комиссиясының мәліметіне сенсек, дауыс беруге құқылы катонқарағайлықтардың 98,38 пайызы өз таңдауын жасаған.
Көкпекті ауданы
Президент сайлауы күні көкпектіліктер тиісті учаскелеріне келіп, өз қалаулыларын білдірді.
Сайлау науқаны барысында аудан жастары зор белсенділік көрсетті. Сайлауға әсіресе, шалғайдағы шағын ауылдардың шопандары мен диқандары, қарапайым жұрт зор ынта, оң пиғылмен келіп, өз таңдауларын жасады. Сайлау учаскелеріне келушілерді сыпайылықпен қарсы алып, ауыл тұрғындарының дауыс берулеріне ыңғайлы жағдай қарастырылды. Ал, учаскеге келуге мүмкіндігі шектеулі қарт адамдар мен мүгедектерге, науқас адамдарға дауыс беру үшін урналар үйді-үйлеріне апарылып, сайлауға қатысуға мүмкіндік жасалды.
– Көкпектіліктер 26-сәуір күні таң бозынан мерекелік көңіл күймен өз учаскелеріне қарай ағыла бастады. Ел ертеңі үшін лайықты деп санаған үміткерлеріне дауыстарын берді. Олардың дұрыс таңдау жасағанына сенімдіміз, – дейді аудандық аумақтық сайлау комиссиясының төрағасы Руслан Бектасов.
Курчатов
Биылғы ел Президентінің сайлауы өңіріміздегі Курчатов қаласында да жоғары деңгейде ұйымдастырылды. Қала бойынша орналасқан төрт сайлау учаскесінде барлығы 7027 адам өз таңдауларын жасады.
Шығыс Қазақстан облыстық аумақтық сайлау комиссиясы төрағасының орынбасары Александр Рукиннің берген мәліметіне сүйенер болсақ, кешкі сағат алтыға дейін жиыны 5735 адам дауыс беріп үлгерген. Бұл барлық сайлаушылардың 81,6 пайызын құрайды.
Оның айтуынша, Курчатовта өткен сайлау науқанының барысын елдегі партиялардың, бұқаралық ақпарат құралдарының атынан келген барлығы 15 бақылаушы бақылаған.
Сайлау күні қалада мәдени шаралар, концерттік бағдарламалар, арзан бағамен сауда-саттық ұйымдастырылды.
Күршім ауданы
Сайлау учаскелері ашыла сала, дауыс беруге асыққан тұрғындардың белсенділігін, олардың мерекедегідей көңіл күйлерін аңғардық.
Біз есігін ашқан №720 сайлау учаскесіндегі жағдай да көңіл көншітерліктей екен. Қаптап келіп жатқан жұрттың бір-біріне арнаған шынайы құттықтауы, жарасымды әзілдері Күршім гимназиясының кең де жарық спорт залын шуаққа толтырып тұрғандай.
– Көпшілік бүгін ерекше ынталы, – дейді сайлау учаскесінің төрайымы Гүлнәр Шәкерова. – Бәрі заңға сәйкес, рет-ретімен жақсы өтуде. Түске дейін 1450 адам дауыс беріп үлгерді, бұл – біздің учаскеге қарайтын сайлаушылардың 85 пайызы.
– Ешқандай заңға қайшы әрекет, тәртіп бұзушылық байқалған жоқ, – деп өз бағаларын берді бақылаушылар Нұртазина Райгүл мен Нұриманов Жасұлан.
Аудандық аумақтық сайлау комиссиясымен хабарласқанымызда, Күршім ауданы бойынша түске дейін 16 500 адамның (54,7 пайыз) дауыс беріп үлгергенінен хабардар болдық. Сағат 15.00. Дәл осы уақытта №720 сайлау учаскесінің төрайымы өз учаскесінде сайлаудың толықтай аяқталғанын, сайлаушылардың 100 пайыз дауыс бергенін мәлім етті. Ал аудандық аумақтық сайлау комиссиясының төрағасы А.Рахман аудан бойынша барлығы 19 064 адамның дауыс бергенін, мұның өзі барлық сайлаушылардың 97,4 пайызы екендігінен хабардар етті.
Осылайша, Президент сайлауы Күршім ауданында барлық талаптарға сай, ұйымдасқан түрде айта қаларлықтай мереке болып өтті.
Риддер
Облыстық сайлау комиссиясы төрағасының орынбасары Александр Рукиннің айтуынша, сағат 15.00-ге дейін риддерліктердің 82,2 пайызы сайлау учаскелеріне барып, өз таңдауларын жасап үлгерді.
Яғни, қалада сайлау беруге құқылы 30 мыңға тарта тұрғын бар болса, соның 24 720-сы сайлауға келіп, дауыс берген. Одан кейін де Риддер қаласындағы 30 сайлау учаскесіне келіп жатқан қала тұрғындарының қатары азайған жоқ. Моноқалалар қатарына жатқызылып, әлеуметтік-экономикалық жағдайын жақсартуға ерекше ден қойылып отырған шағын шаһар тұрғындарының көпшілігі сайлау учаскелеріне таңертең ертемен келіп дауыс берді. Өнеркәсіпті қала халқының көңіл күйі көтеріңкі, болашаққа деген үміт-сенімдері мол. Облыстық сайлау комиссиясы төрағасының орынбасары осы жолғы Президент сайлауына риддерліктердің үлкен белсенділік танытып, түгелдей дерлік қатысып отырғанын айрықша атап өтті.
Тарбағатай ауданы
Аудан орталығы Ақсуатта ертемен ашылған сайлау учаскелерінде саяси науқан мерекелік көңіл күймен басталды. Осындағы «Училище» сайлау учаскесіне ерте келген 103 жастағы кейуана Гүлсім Салқынбаева дауыс беруді бастап, жас сайлаушыларға батасын берді.
Аудан бойынша орналасқан 55 сайлау учаскесінің барлығында мерекелік мәдени шаралар, жәрмеңкелер ұйымдастырылды. Аудан жастары мейлінше белсенді болды. 385 жас сайлаушы алғаш рет дауыс берді. Аудандық аудандағы аумақтық сайлау комиссиясының төрағасы А.Аққазинның айтуынша, 28074 электораттың 90 пайызы түске дейін дауыс беріп үлгерген, әсіресе, Ақжар, Көкжыра, Құйған, Құмкөл ауылдық округтері аса белсенділік танытты.
Ұлан ауданы
Қазақстан Президентін кезектен тыс сайлауға Ұлан ауданының тұрғындары да бір кісідей атсалысты. «Нұр Отан» партиясы аудандық филиалы төрағасының бірінші орынбасары Серік Асылбаевтың айтуынша, саяси науқанға барлығы 24 мың 560 адам қатысу керек болса, олардың 48,8 пайызы сағат он бірге дейін өз таңдауларын жасап үлгерді.
Халықтың тарихи таңдауын айқындайтын мереке Қасым Қайсенов кентінде митингпен ашылып, сайлау комиссиясының мүшелері, ардагерлер мен бірінші дауыс беруге келген сайлаушылар өз пікірлерін білдірді. Президенттік сайлаудың аудан орталығында бұрмаланбай, әділ өтуін Америка Құрама Штаттары мен Германиядан келген халықаралық бақылаушылар қадағаласа, басқа елді мекендерде Беларусь және ТМД елдерінің бақылаушылары, Президенттікке үміткерлердің сенімді өкілдері бақылау жасады.
Мереке кезінде арзан бағамен азық-түлік жәрмеңкесі ұйымдастырылып, сайлаушыларға ән мен жырдан тамаша көңіл күй сыйланды.
Үржар ауданы
Үржар аудандық аумақтық сайлау комиссиясының төрағасы Абзалхан Жұматаевтың айтуынша, аудан бойынша 44,913 сайлаушы бар. 78 сайлау учаскесі электоратты көтеріңкі көңіл күймен қабылдады. Мәселен, №1033 сайлау учаскесінің төрағасы Бауыржан Мырзабаев түске дейін 96 пайыз дауыс берілгенін атады. Сөйтіп, сайлаушылардың үлкен ықыласпен келіп жатқанын білдік. Мектептің алдына жәрмеңке ұйымдастырылыпты. Тағамдар арзан бағамен сатылуда.
– Еліміз Тәуелсіздік алғалы бері тек қана Нұрсұлтан НАЗАРБАЕВҚА отбасымызбен дауыс беріп келеміз. Сол кісінің арқасында ғана мемлекетіміз өркендеп, жылдан-жылға дамып келеді. Экономикамызды өркендетіп, халқымызды дүние жүзіне танытуда. Біз ол кісіге дән ризамыз, – деді көпбалалы ана Рәзия Кәбиева.
Үржар аудандық аумақтық сайлау комиссиясының төрағасы Абзалхан Жұматаев аудан бойынша сайлаушылар 100 пайызға дауыс бергенін айтты.
Шемонайха ауданы
Сайлаушылар мұнда сағат жетіден ағылып келе бастады. Сайлау учаскесінің ашылуына ауыл ақсақалдары мен 18 жасқа толған бірінші рет дауыс берушілер шақырылды. Оларға естелік сыйлықтар тапсырылды.
Белгіленген учаскеге келіп өз кандидатына дауыс берген Шемонайха қаласының тұрғыны Амантай Рахымжанов өзінің жұбайымен жјне балаларымен келді. Механизатор болып еңбек ететін, ол өтіп жатқан сайлауды қазақ елінің болашағымен байланыстырады.
Ал аудандық ішкі саясат бөлімінің басшысы Татьяна Степанованың айтуынша, түс ауа жергілікті тұрғындардың 80 пайызға жуығы өз дауыстарын беріп үлгерген.
– Сайлауға халық өте белсенді қатысты. Бұл – өте маңызды күн. Себебі, халық өз таңдауын жасады. Біз өз еліміз үшін, өз болашағымыз үшін дауыс бердік, – дейді Татьяна Степанова

Арнайы репортажды әзірлеген \”Дидардың\” тілшілер тобы