Шығыс жұлдыздары үздік үштіктен көрінді

Өскеменде көркем гимнастикадан «Шығыс грациясы» халықаралық турнирі аяқталды. Қазақстан мен Ресейден 200-ден астам үміткер бақ сынаған бәсекеде жерлестеріміз жалпыкомандалық үшінші орынды жеңіп алды.
Айта кетейік, турнирде бақ сынаған командалар ішінде медаль саны жағынан жарыс иелерінің алдына ешқайсысы түсе алған жоқ. Біздің құраманың қоржынына әртүрлі дәрежедегі 20 медаль жиналды. Жалпы есепте топ жарған Алматы мен екінші орынға табан тіреген Новосібір командаларының өзінде мұнша көп жүлде болмады. Олар тек алтын, күміс сияқты жоғары дәрежелі жүлделерді көбірек иеленудің арқасында басым түсті.
Сонымен, біздің гимнастшылардың еншісінде барлығы төрт алтын медаль. Оның үшеуі топтық жаттығулардағы жеңістің көрсеткіші болса, біреуін 2005 жылғы спортшылар арасындағы жекелей сында Айсана Ұлықпанова иеленді. Ал топтық жаттығуларда 2000, 2003 және 2008 жылдары туған спортшыларымыз биіктен көрінді.
Жекелей сында өнер көрсеткен жерлестерімізге келсек, Арина Лазарева (2009 ж.) күміс, Тамина Мағауина күміс, Тамила Тұрғанбаева қола (екеуі де 2008 ж.), Айша Жаныбекқызы күміс (2007 ж.), Айсана Ұлықпанова алтын, Томирис Сатыбалды күміс, Алина Чернышова қола (үшеуі де 2005 ж. «А» тобы), Назерке Шотанова күміс (2005 ж. «Б» тобы), Виктория Писикина қола (2004 ж. «Б» тобы), Виктория Никулина күміс (2004 ж. «А» тобы), Рената Жолдинова күміс (2003 ж.), Елизавета Демченко қола (2002 ж.), Александра Феоктистова күміс, Александра Медведева қола (екеуі де 2001 ж.), Әлия Молдахметова қола (2000 ж.).
Жекелей сындағы гимнастшыларымыздың ішінен Рената Жолдинованың шеберлігін ерекше атап өткен абзал. Барлық жаттығуларды жоғары деңгейде орындап, тобындағы мықты қарсыластарымен иық тірестіре өнер көрсеткен қызымыздың тек шешуші сайыста ұпайы сәл төмендеп қалды. Дегенмен Рената алтын медаль иегері барнаулдық Анна Ульнеровадан бар-жоғы 0,6 ұпайға кем түсті.
Сондай-ақ, топтық жаттығуларда тамаша өнер көрсеткен 2008 және 2007 жылы туған қыздарымыз күміс медальмен марапатталды.

Серік Әбілхан