Семейде жаңа аудан бой көтереді

Облыс әкімі Даниал АХМЕТОВ жұмыс сапарымен Семей қаласында болып, шаһардағы бірқатар құрылыс алаңдарының, кәсіпорындардың жай-күйімен танысты, қала басшылығымен абаттандыру мәселесіне қатысты жиын өткізді.
Аймақ басшысы ең алдымен Юность кентіндегі 1200 орындық мектеп салуға арналған жер телімін көрді. Жобаның құны – 1 280 миллион теңге. Мердігер ұйым – «Азия» фирмасы ғимарат құрылысын алдағы наурыз айында бастап, келер жылдың алғашқы жартысында аяқтауы тиіс. Қазіргі кезде «Семстройпроект» ЖШС нысанның бұрынғы жобасына өзгерістер енгізу үстінде. Өйткені, оқу орнының бастапқы бейіні ауысқан. Облыс әкімі жаңа жобаны жеделдете әзірлеп, осы айда мемлекеттік сараптамаға ұсынуды тапсырды. Әлеуметтік маңызы зор бұл нысанның құрылысы кестеден кешікпей жүргізілуі керек.
Бұдан соң аймақ басшысы №1 Семей ағаш өңдеу зауытына барып, кәсіпорынның жұмысымен танысты. Индустриаландыру картасының аясында үш жыл бұрын іргесі қаланған зауыт негізінен түрлі қалыңдықтағы тақтайлар шығарумен айналысады. Шикізатты Ресейдің іргелес өңірлерінен, Өскемен мен Павлодардан алуда. Ал дайын өнім солтүстіктегі көршімізге, сондай-ақ, Орталық Азия мен Таяу Шығыс елдеріне жөнелтіледі. Кәсіпорын енді инустриялық-инновациялық бағдарламаның аясында ламинатталған фанера шығаруды көздеп отыр, нәтижесінде екі жүзден астам жұмыс орны ашылып, жаңа өнімнің 70 пайызы экспортқа шығарылатын болады. Кәсіпорынның жоспарларымен жіті танысқан облыс әкімі жобаны тездетіп іске қосып, жұмыс қарқынын ширату қажеттігін айтты.
Облыс әкімі Даниал АХМЕТОВ «Азия» фирмасының темір-бетон өндіретін зауытына барды. Заманауи құрылғылармен жарақталған кәсіпорында бүгінде барлық жұмыс автоматтандырылған. Зауыт өнімдерінің басты ерекшелігі – шығарылатын бетондардың ұзындығы 15 метрге дейін жетеді. Елімізде мұндай көлемдегі бетон өндіру әлі қолға алынбапты. Олар тұрғын үйлердің төбелерін жабуға қажет. Зауыт ағымдағы жылдың шілде айында іске қосылып, халық игілігіне жұмыс істей бастайды.

28 мың адам тұратын болады

Семейдегі жаңа тұрғын аудандардың бірі – Қарағайлы. Мұнда қазір НАЗАРБАЕВ зияткерлік мектебінің құрылысы қарқынды жүріп жатыр. Оқу орнының қазығы былтыр қағылған, осы жылдың соңында ол толық аяқталуы тиіс. 720 оқушыға шақталған және 120 орындық тұрғын корпусы бар мектептің бастапқы құны төрт жарым миллиард теңгені құрайды.
Осы аумақта келешекте 28 мың адам тұратын жаңа шағын аудан бой көтермек. Бұл жердің таңдалынып алынуы кездейсоқ емес, мұнда коммуникациялық желілерді тартуға 2,2 миллиард теңге жұмсалады, ал оларды, айталық, Салқын бастау аумағына тарту үшін жеті миллиард теңге шығындалушы еді.
Құрылыс барысымен және ықшамауданның жобасымен мұқият танысқан аймақ басшысы атқарылып жатқан жұмысқа оң бағасын берді.
– Бұл ауданға тағы бір орта мектеп салуымыз қажет. Өйткені, тұрғындар саны 30 мыңға дейін өседі. Сондай-ақ, балабақша құрылысын да жоспарлау керек. Жалпы, жоба сауатты әзірленген, ең бастысы, қаржыны тиімді жұмсау жағына көңіл бөлініпті, – деді облыс әкімі.
Аймақ басшысы жедел медициналық жәрдем станциясының құрылыс алаңына барып, болашақ медициналық мекемедегі жұмыстардың сапасын бағамдады. Құрылысы 2013 жылдың сәуірінде басталған нысан алдағы жазда салынып бітуі тиіс. Алайда, қазіргі кезде мұнда жұмыстар тоқтап тұр. Себебі, мердігер компания – «РАЛИ-С» серіктестігіне қаржының кезекті бөлігі әлі түспеген. Облыс әкімі құрылысшыларға аздаған кідіріске бола жұмысты тоқтатпауды міндеттеді, қажетті қаржы осы айда аударылмақ. Жалпы, жұмыстар аяқталуға тақау, тек әрлеу және аумақты абаттандыру жұмыстары ғана қалған. Құрал-жабдықтардың бәрі жеткізілген.
– Жалпы, тендерлерді өткізу кезінде құрылыс компанияларының әлеуеті толық ескерілмеуде. Соның салдарынан, міне, осындай жағдайлар орын алады, яғни құрылыс кестеден кешігеді, әрі сапасы да сын көтермейді, – деді осы ретте аймақ басшысы Даниал АХМЕТОВ.
Бұдан соң облыс әкімі Семейдегі жедел медициналық жәрдем ауруханасында болып, осы мекеменің мәселелерін көріп-білді. Аурухананың проблемалары шаш етектен. 2013 жылы ғана пайдалануға берілген жаңа ғимараттың күрделі мәселелері бар. Аурухананың жалпы аумағы 51 мың шаршы метр болса, соның бар болғаны 12 мыңы ғана пайдалы аумақ. Ғимарат электр қуатымен жылытылады, осы мақсат үшін айына 60 миллион теңге кетеді. Сол себепті мұнда қатты не сұйық отынға негізделген дербес қазандық салу керек. Ауруханаға келетін ауызсудың сапасы нашар болған, бірақ қазір тазарыпты. Мекеме батпақты жерге салынғандықтан, мұнда тартылған электр кабельдері қыста қатып, істен шыға береді. Сондай-ақ, ғимараттың шатырынан су саулап, қабырғаларында көптеген жарықшақтар пайда болған. Бұл жайттардың бәрі жобаның сауатсыз жасалғанын көрсетсе керек.
– Бұл ғимараттың сапасыз салынғанын түсіну үшін сала маманы болудың қажеті жоқ, бәрі көзге анық көрініп тұр. Сонда сіз неге қабылдау актісіне қол қойып жүрсіз? Енді, міне, соның зардабын тартып отырсыздар. Екі жыл бұрын ашылған аурухана қазірдің өзінде жөндеуді қажет етеді. Ал бұл мекемені салуға қыруар қаржы жұмсалды, ол – мемлекеттің, яғни, халықтың ақшасы. Мен мұнда маусым айында тағы келемін, оған дейін барлық олқылықтар түзетілетін болсын. Мердігер ұйыммен кепілдік мерзім сегіз жылға дейін ұзартылсын, – деді облыс әкімі мекеме директоры Қайноллан Мусинге. Облыс әкімі тапсырмалар орындалмаған жағдайда мекеме басшысы қызметінен босатылатынын ескертті.

Қаланың орталық алаңы ажарлана түседі

Жұмыс сапары қаланы абаттандыру мәселесіне қатысты жиынмен аяқталды. Қалалық әкімдіктің алдында және фойесінде Семейдегі құрылыс материалдарын шығаратын кәсіпорындардың шағын көрмесі ұйымдастырылды. Мұнда «Тасоба», «Сәт-транс», «Жқұрылыс компаниясы» сияқты серіктестіктердің өнімі қойылды. Мәселен, «Жқұрылыс» компаниясының резеңке төсемелері – балалардың ойын алаңдарына және мал қораларына жаю үшін таптырмайтын материал.
Осы жерде облыс әкіміне Семейдің орталық алаңын жаңарту жобасы көрсетілді. Мұнда түрлі түсті әрі музыкалық субұрқақ салынып, шамдар ауыстырылады. Әкімдік, Абай атындағы театр және басқа да алаңдағы ғимараттар жарықпен безендіріледі. Сонымен қатар, Ертіс жағалауы да абаттандырылып, онда да субұрқақ жасалады. Жоспарда қаланың көлік ағыны көп көшелерінің біріне жолайырық жасау көзделуде.
Аймақ басшысы жаңғырту жұмыстарын мамыр айында бастап, тездетіп аяқтау қажеттігін ескертті.
– Семей – студенттердің, зиялы қауым өкілдерінің шаһары. Сол себепті оның сыртқы келбеті де заман ағымына сай болуы шарт. Былтыр қаланы гүлмен безендіруге 14 миллион теңге қарастырылыпты. Бұл өте аз. Осы жылы аталмыш қаржыны 100 миллион теңгеге дейін арттыру қажет. Сонымен бірге, Семейдегі бұрынғы тәлімбақтарды қайта жаңғыртып, гүлдерді сол көшеттіктерде өсіру керек, басқа өңірлерден дайын гүлдерді әкеп отырғыза саламыз деп ойламаңыздар. Орталық алаңды жаңғыртудың жобасымен жіті танысып шықтым. Бәрі дұрыс, бұл жобаға тағы 100 миллион теңге қосамыз. Жұмыстарды мамырда бастап кетіңіздер. Мемлекеттік-жекеменшік серіктестік шеңберінде әрқайсысы 250 орындық бес балабақша салу керек. Олар өзін-өзі бес жылда ақтайды. Мемлекет ол мекемелерді тапсырыспен қамтиды. Осы мақсатта істі қолға алатын бес кәсіпкерді анықтаңыздар. Қаладағы тұрғын үй құрылысына осы айда облыстық мәслихаттың сессиясын өткізіп, тағы екі миллиард теңге қаржы бөлеміз. Осы орайда, құрылыс жүргізілетін аумақтарды және мердігерлерді анықтау қажет. Қаланың кәріз суларын тазартатын станция құрылысы 2004 жылдан бері жүргізіліп келеді. Оны алдағы шілде айына дейін аяқтау керек. Жұмыстардың барысын алдағы наурыз айында тағы бір пысықтаймыз.
«Семейге ешкім көңіл бөлмейді» деген сияқты жаңсақ пікірлер айтылып жүргенін жақсы білемін. Олай емес. Оны нақты деректермен дәлелдеп бере аламын. Республикалық, облыстық бюджеттерден шаһарға қыруар қаржы құйылуда. Бірақ сіздер де ортақ іске атсалысуларыңыз керек, атқарылатын шаруалардың сапасын бақылау да семейліктердің міндеті деп есептеймін, – деп қорытындылады сөзін облыс әкімі Даниал АХМЕТОВ.
Іссапар соңында аймақ басшысы Невзоровтар отбасы атындағы мұражайда болып, ондағы экспозицияларды тамашалады.

Ержан Әбіш