Семейдің құрылыс әлеуеті жоғары

Облыс әкімі Даниал АХМЕТОВ жұмыс сапарымен Семей қаласында болып, өңірдегі құрылыс компанияларының шығарып отырған өнімдерімен және мүмкіндіктерімен танысты, сонымен қатар, келешек тұрғын ауданның жобасын көріп, атқарушы билік органдарының, мекеме-ұйымдардың жетекшілерімен, мәслихат депутаттарымен кездесу өткізді.
«Сәт транс» үй құрылыс комбинатының ауласында ұйымдастырылған көрмеде ондаған компания өз өнімдерін таныстырды. Мұнда шағын жеке кәсіпкерліктен бастап бүкіл ел аумағындағы құрылыстар үшін материалдар шығаратын ірі зауыттардың өкілдеріне дейін жиналды.
Құрылыс материалдарының сан алуандығынан көз сүрінеді. Семейліктер силикат және қыш кірпіштер, газблоктар, қаптама плиталар мен тас төсемелер, темірбетонды бұйымдардың түр-түрін, цемент, пластик терезелер мен құбырлар, полимерден жасалған бұйымдар, металпрофиль, жабынқыштар, есіктер, сондай-ақ, басқа да материалдар шығарады. Айталық, «Құрылыс» жауапкершілігі шектеулі серіктестігінің өнімдері өзінің бірегейлігімен ерекшеленді. Бұл кәсіпорын балалар алаңқайларына және спортзалдарына төселетін жұмсақ резеңке плиталар жасауды қолға алған. Аталмыш төсемелер ескі автокөлік шиналарын ұнтақтау арқылы өндіріледі және белсенді ойындар мен спорттық сайыстар кезінде балалардың жарақат алуына жол бермейді. Облыс әкімі Даниал АХМЕТОВ заманауи жүгіру жолдарын осы материалдардың көмегімен жасауды ұсынды.
Облыс басшысы ең алдымен құрылыс материалдарының бағасы мен сапасына көңіл аударып, оларды көп мөлшерде өндірудің мүмкіндіктерін қарастырды.
– Егер біз қаланы ауқымды құрылыс жұмыстарымен қамтитын болсақ, бағаны түсіресіздер ме? – деп сұрады облыс әкімі газблок шығаратын компания өкілінен. Құрылыс кәсіпорнының мамандары егер тапсырыс артса, міндетті түрде өнімнің құны да арзандайтынын жеткізді.
Атап өтерлік жайт, осы кәсіпорын газблоктардан бес қабатты тұрғын үйлер салу мүмкіндігіне ие. Десек те, мекеменің тұрғын үйлерге арналған жеке типтік жоспарлары жоқ. Ал бұл – кәсіпорын үшін үлкен кемшілік.
– Қаңтар айының ортасына таман біз жергілікті құрылыс компаниялары мен материал жеткізушілер арасында Семей қаласында баспана салуға қатысты тендер жариялаймыз. Осы ретте әрбір компания үйлердің дербес типтік жоспарларына ие болуы және ұтымды баға ұсынулары тиіс. Үздік деп танылған компаниялар 100 мың шаршы метрге дейінгі баспана салуға қомақты тапсырыс алады, – деді Даниал АХМЕТОВ көрмеге қатысқан кәсіпорындар өкілдеріне.
Облыс әкімі үй құрылыс комбинатының мүмкіндігіне айрықша назар аударды. Бұл кәсіпорын жұмыс істеген бір жылдың ішінде ауыз толтырып айтарлық табыстарға қол жеткізген. Аталмыш комбинат еліміздің түрлі қалаларымен жұмыс істейді, Өскеменде өзінің алғашқы үйлерін сала бастады.
Кәсіпорынның қуаты жылына 50 мың шаршы метр тұрғын үй салуға жетеді. Сондай-ақ, комбинат 13 мың тоннадай бетон шығарады. Мұнымен қоса, үй құрылыс комбинатының басшылығы әтүрлі тұрғын үйлердің және 140, 240 орындық балабақшалардың жеке типтік жобаларын алдын ала әзірлеп те қойған. Ол жобалар мемлекеттік сараптамадан сәтті өтіпті.
– Семейде өзі материалдар шығарып, өзі солардан үй сала алатын мұндай кәсіпорынның бар болуы өте керемет. Енді қолда бар типтік жобаларды мұқият қарап, жетілдіру қажет, әсіресе, үйлердің қасбеттеріне, аулаларды абаттандыруға көңіл бөлген жөн, – деді осы орайда облыс әкімі.
Семейдің құрылыс индустриясымен танысу барысында Даниал АХМЕТОВ «Силикат» ЖШС-де болды. Құрылыс материалдарын шығаратын еліміздегі аталған іргелі кәсіпорын осы жылы 60 миллионнан астам силикат кірпіш өндірген. Тауарлар негізінен Павлодар мен Астанаға жөнелтіліпті. Қазір зауыт қоймасында бес миллиондай кірпіш тұр. «Силикат» серіктестігінің бас директоры Борис Адиановтың айтуынша, олар көктем шыға, яғни, құрылыс маусымы басталған кезде тез сатылып кетеді. Сонымен бірге, келер жылдан бастап семейлік кірпіштер елордадағы «ЭКСПО-2017» нысандарын салуға жіберілмек.
– Жергілікті компаниялармен жұмыс істей отырып, біз оларға кірпішті арзан бағада сатамыз. Бірақ, жаңа жылдан бастап кірпіштің өзіндік құны өсе ме деген қауіп бар, өйткені көмір қымбаттап отыр. Алайда, өз өнімдеріміздің бағасын көтеру біздің жоспарымызда жоқ, – деп түсіндірді жағдайды Борис Адианов.
Облыс әкімі Даниал АХМЕТОВ Семей басшылығына құрылыс барысында жергілікті кәсіпорындар мүмкіндігін, құрылыс материалдарын барынша пайдалануды ескертті. Себебі, бұл өз кезегінде кәсіпорындарды тұрақты тапсырыстармен қамтиды.

Болашақ тұрғын аудандарға коммуникациялар тартылады

Аймақ басшысы Даниал АХМЕТОВ келер жылы ауқымды құрылыс жұмыстары басталатын екі ауданда болды, олар – Суықбастау және Қарағайлы. Келешек тұрғын үйлер салынатын жерлерге инженерлік коммуникациялар әлі тартылмаған екен. Мұнымен қатар, инфрақұрылым бойынша жобалық-сметалық құжаттама осы күнге дейін мемлекеттік сараптамадан өтпепті. Жоба бойынша тек Қарағайлыда 540 мың шаршы метр тұрғын үй, қазақ-түрік лицейін, зияткерлік мектеп, балабақша мен оңалту орталығын салу жоспарлануда. Ал Суықбастауда 64 көпқабатты үй салу және жеке үй тұрғызуға арналған 820 телім қарастыру көзделіп отыр.
– Жылу энергиясымен және сумен қамту бойынша барлық жобалық жұмыстар алдағы жылдың алғашқы тоқсанында аяқталады. Сондай-ақ, келер жылы электрмен қамту және канализациялық желі тарту жұмыстары толық бітеді, – деді қала әкімі Айбек Кәрімов.
Алайда, аймақ басшысы қала әкімдігінің қай жерден үй салу тиімді болатынын анықтамағанын, бұл бағытта жүйелі жұмыс жүргізбегенін сынға алды. Жергілікті атқарушы органдар ең алдымен Суықбастау ауданына үйлер салу қажеттігін айтса, облыстық құрылыс басқармасының басшысы Серік Төленбергенов Қарағайлы ауданына коммуникация тарту арзан болады деп санайды.
– Құрылысты қалалық инженерлік инфрақұрылымдарға жақын жерден бастау қажет. Сіздерде жоба бар да, оны іске асыратын аумақтың жоқ болғаны ма? Мемлекет басшысы 100 мың шаршы метр тұрғын үй салу туралы тапсырма берді, оны қалай орындамақсыздар? Қай аумақта үйлерді салу тиімді екенін тиянақты зерделеу керек, – деп талап етті облыс әкімі Даниал АХМЕТОВ.
Жұмыс сапары соңында өткен кеңесте Даниал АХМЕТОВ Семейдің әкіміне бір айдың ішінде құрылысты қай ауданда бастауды анықтау туралы тапсырма берді. Мұнымен қатар, шаһардың ішінен Қазақстан ипотекалық компаниясы арқылы тұрғын үй салу үшін бос учаскелер іздестіру керек.
Облыс әкімі салынып жатқан зияткерлік мектептің орналасқан жеріне қатысты да ескертпе жасады. 120 орындық интернаты бар 720 оқушыға шақталған мектептің ғимараты қаланың солтүстік бөлігінде, кеніштің шетінде орын тепкен. Тұрғындардың айтуынша, мұнда балаларға жету қиын болады, себебі, қалалық автобустар бұл жаққа қатынамайды.
– Неге осындай іргелі оқу орны қаланың шетіне, иен далаға салынады? Енді балаларды осы маңға жеткізу мәселесін шешу қажет қой. Сонымен қатар, мұнда коммуникация бойынша да мәселелер бар, – деп қадап айтты Даниал АХМЕТОВ.
Аймақ басшысы Семейдің перинатальдық орталығында да болып, сондағы қызметкерлер мен облыстық денсаулық сақтау басқармасының басшысы Вадим Овсянниковке көпшілікті толғандырып жүрген сұрақтарды қойды.
– Заманауи құрал-жабдықтары, білікті дәрігерлері бар Шығыс Қазақстанда неге ана мен бала өлімі көп? Егер қандай да бір аппаратура алу керек болса, не болмаса мамандарды біліктілікті арттыру курстарына жөнелту қажет болса, айтыңыздар, көмектесеміз, – деген аймақ басшысы аталмыш мәселелерді шешудің жолдарын анықтау керектігін баса айтты. Әлбетте, орталық дәрігерлерінің еңбегін де атап өткен орынды, олар осы жылы жаңа туған жеті нәрестеге күрделі ота жасап, өмірлерін сақтап қалған.

Тапсырмалар мерзімінде орындалуы қажет

Семей әкімдігінде кеңес өтіп, аймақ басшысы Даниал АХМЕТОВ қала әкімінің есебін тыңдады және жергілікті атқарушы билік пен қалалық мәслихат депутаттарына бірқатар жаңа міндеттер жүктеді.
Айбек Кәрімов өз баяндамасында бірнеше негізгі мәселеге жеке-жеке тоқталды. Солардың бірі – Семей әуежайының ұшу-қону алаңнын жөндеуге қатысты. Оның жобалық-сметалық құжаттамасы қазір мемлекеттік сараптамадан өтуде, жұмыстар келесі жылы басталады.
Сондай-ақ, Семей қаласының әкімі кәсіпкерлердің несие алу барысындағы мәселелеріне баса тоқталып өтті. Бұл бағытта қала әкімдігі мен «Даму» қоры, банктер де бірлесе жұмыс істеуде.
– Жеке және заңды тұлғалардың электр қуатына берешегі туралы айтсақ, мұнда басты борышкер қалалық су арнасы мен «Теплокоммунэнерго» АҚ болып отыр. Мәселе аудиторлық тексеруден кейін шешіледі, – деді Айбек Кәрімов.
Даниал АХМЕТОВ Семейдегі жылумен қамтушы ұйымдардың шығындарына назар аудартты. 15 жыл бойы жыл сайын қала әкімдігі Үкіметтен қазандықты жаңартуға кезекті миллиардты сұраумен келеді, бірақ одан нәтиже көрінбейді, қазандықтар әлі де сол шығынмен жұмыс істеуде.
– Мен үш айдың ішінде шығындарға мұқият талдау жүргізуді тапсырамын. Энергияның өзіндік құны мен оның тарифі арасындағы айырманы есептеу қажет. Басқа да қандай технологиялық себептер бар екенін анықтаған жөн. Бұл тәсіл Үкіметтен қосымша қаржы сұрамай, мәселені қалай жүйелі шешу керектігін көрсетпек, – деді аймақ басшысы.
Сонымен қатар, қала әкімі жөндеуді талап ететін инфрақұрылымдар мен инженерлік желілерге жасалған талдау турасында айтты. Қазірдің өзінде Семейдің су арнасы және Суықбұлақ, Қарағайлы аудандары бойынша қос жоба бар. Оларды іске асыруға қаражат не республикалық, не облыстық қазынадан бөлінбек. Ол, мұнымен қоса, аймақ басшысының өткен сапарында көтерілген мәселе туралы да мәлімет берді. Су тазарту құрылғыларын іске қосу келесі жылдың 1 шілдесіне жоспарланып отыр. Қазір жобаның құны есептелуде.
– Сонау 2004 жылы басталған және құрылысына бір жарым миллиард теңге қаржы жұмсалған аталмыш нысанды іске қосу – сіз бен біздің парызымыз, – деп қадап айтты бұл ретте облыс әкімі.
Жиын соңында аймақ басшысы барлық міндеттер мерзімінде орындалуы тиіс екенін ескертіп, жиналғандарды алда келе жатқан Жаңа жыл мейрамымен құттықтады.

Ержан Әбіш