Семей – Қарауыл жолының сапасы сын көтермейді

Өңірдегі автокөлік жолдарына жүргізілген жөндеу жұмыстарының сапасы әр жыл сайын негізді сынға жиі ілігіп келеді. Енді жолдарды жөндеудің уақтылы аяқталуын және сапалы атқарылуын депутаттардан құралған арнайы комиссия бақылайтын болады. Оның құрамына Д.Серікбаев атындағы ШҚМТУ-дың мамандары да енгізілмек.
Мұндай шешім облыстық мәслихаттың кезекті ХХІІ сессиясында қабылданды. Бұған дейін де жазғанымыздай, өңірдегі автокөлік жолдарының ұзындығы республиканың өзге аймақтарының ішінде бірінші орынға, ал қатты жабындысы бар жолдардың ішінде алтыншы орынға ие. Дегенмен, олардың сапасына тұрғындар көңілі әрқашан да тола бермейді.
Жыл сайын бюджет қаржысынан жолдарды жөндеуге тұрақты түрде қомақты қаржы бөлініп келеді. Алайда, жөндеу көрген жолдар бір жылдан соң бұрынғы қалпына қайта түсіп жатқанын көргенде, бөлінген қаражаттың желге ұшқанына еріксіз куә боласың.
Мәселен, 2017 жылы жолдарды жөндеуге 46 млрд. теңге бөлініп, 357 шақырым жол жөнделген. Ал биыл облыстың автокөлік жолдарына барлық қаржы көздерінен былтырғыға қарағанда бір жарым есе артық қаражат, яғни 62 млрд. теңге бөлінбек. Соның ішінде облыстық және аудандық маңыздағы жолдарды жөндеуге 19,3 млрд. теңге бағытталмақ.
– Облыстық маңыздағы жолдарға аталған сомадан 7,3 млрд. теңге арналып отыр, оның 4,5 млрд. теңгесі 236 шақырым жолға орташа жөндеу жүргізуге бағытталған. Ал 2,8 млрд. теңге 3186 шақырымды ұстап тұруға жұмсалады, – деді сессияда жолдардың жөнделу барысы жайында баяндаған облыстық жолаушы көлігі және автокөлік жолдары басқармасы басшысының міндетін атқарушы Әсет Сұлтанов.
Депутаттар одан ұзын сонар баяндама оқығанша, нақты сұрақтарға жауап берумен шектелуін сұрады. Сондықтан облыс жолдарының жөнделуіне қатысты қойылған сұрақтар да аз болмады. Жиында Үржар ауданының Мақаншы, Келдімұрат ауылдарының, Жанай, Егінсу елді мекендерінің жергілікті жолдарын жөндеуге қаржы бөлінсе деген де сауалдар болды.
Қазіргі уақытта өңірде жалпы ұзындығы 236 шақырым болатын 14 учаскеде жөндеу жұмыстары жүріп жатыр. Оның ішінде екі жол учаскесі Мақаншы – Жалаңашкөл, үш учаске Дмитриевка – Бородулиха – Шемонайха, екі учаске Көкпекті – Самар – Васильев өткелі және жеті учаске Семей – Қарауыл бағытында. Алайда, облыс басшысы соңғы айтылған Семей – Қарауыл жолының жөнделуіне көңілі толмайтындығын айтып, жолдың сапасын сынға алды.
– Біз аталған мақсатқа облыстан ғана емес, республика бюджетінен де қомақты қаржы бағыттап отырмыз. Жұмыс жүруде, дегенмен кей бөліктерде кемшіліктер бар түзетіледі. Алайда, Семей – Қарауыл жолынан мұндайды еш күтпеген едім. Мен өзім бұл учаскенің барлық 180 шақырымын жүріп өттім. Сонда көргенім, жұмыстың ең төменгі сапада атқарылып жатқандығы. Асфальт алдын ала дайындалмаған жерге жайылып жатыр. Қарап тұрыңыздар, екі жылдан соң бұл жол бұрынғы кейпіне қайта түсетін болады, – деді Даниал Ахметов.
Аймақ басшысының айтуынша, дәл осы жолға бөлінген қаржы облыстағы басқа жолдардың ешбіріне берілмеген. Өткен жылы да жолды жөндеуге қомақты қаржы салынған, биыл тағы Семей – Қарауыл жолын орташа жөндеуге екі миллиард теңге қарастырылған. Өкініштісі сол, мұндағы жағдай «баяғы жартас – сол жартастың» күйін кешіп тұр.
– Жолдарды жөндеудің сапасыз атқарылғандығына қашанға дейін төзуге болады. Жағдайды түзетуге облыстық жолаушы көлігі және автокөлік жолдары басқармасы мүлдем қауқарсыз. Жұмыстардың атқарылу барысы бекітілген кестенің мерзімін қатаң түрде сақтауы тиіс болған. Ал бұл бөлікте үлкен кешігумен келеді. Енді тек нақты шара қолдану ғана қалды, – деді облыс әкімі.
Айтылған кемшіліктердің орынды екенін мәслихат депутаттары да бірауыздан қолдап, өзге де жолдардағы сапасыздыққа жол берілген кемшіліктерді нақты мысалдармен ортаға салды. Мысалы, Семей – Шемонайха жолының кей учаскелері жол деп атауға да келмейді.
Сондықтан депутаттар жолдарды сапалы жөндеуге қатысты өзекті мәселені жиі қарастыру үшін депутаттық комиссия құру, оған Д.Серікбаев атындағы ШҚМТУ-дың арнайы мамандарын қосу туралы шешім қабылдады. Комиссия алғашқы тексеруді Семей – Қарауыл жолының жөнделген учаскелерінен бастамақ, содан соң кезек орташа жөндеу жүріп жатқан өзге де жолдарға келеді.
Облыстық мәслихаттың хатшысы Владимир Головатюк мұндай мәселе әр ауданның жолында бар екенін атап, комиссияның жақында өтетін бірлескен мәжілісінде бұл өзекті мәселені тағы бір рет қарауды ұсынды. Онда барлық жол учаскелерінде жүргізіліп жатқан жөндеу жұмыстарына қатысты жан-жақты есеп сұралмақ. Сонан соң жұмыс тобы бекітілген кестеге сәйкес, әр бөліктердегі жолдардың сапасын тексеруге шығатын болады.

Дәурен Аллабергенұлы