Салтанатты шеруге 15 мыңдай адам қатысты

Еліміз үшін зор маңызға ие Қазақстан халқының Бірлігі күні жүзден астам ұлыстар ауызбіршілікте өмір сүріп жатқан Шығыс өңірінде кең көлемде аталып өтті. Өскемен қаласында бұл мерейлі мереке ерекше сән-салтанатпен, көтеріңкі көңіл күйде, асқақ рухта тойланды. Облыс орталығындағы Республика алаңына жиналған халықты облыс әкімі Даниал АХМЕТОВ құттықтады.
«Мен – Қазақстанның патриотымын» деп аталатын мерекелік шеру Астана көшесінен басталды. Ұйымдастырушылардың айтуынша, биылғы салтанатты шеруге 15 мыңнан астам адам қатысқан екен. Айтса айтқандай-ақ, көшеге сыймай қозғалған шерудің алды Республика алаңына жеткенде соңы әлі Астана көшесінде келе жатқан болатын.
Биылғы шеруге әрбір мекеме ерекше дайындықпен келіпті. Әр кәсіпорын өздерін айшықтап, ерекшелеп тұратын футболкалар мен арнайы киімдерін киіп шыққан. Еліміздегі бірлік пен татулықты насихаттайтын транспаранттарын биік ұстаған көңілді топтың жүздерінен қуаныштың лебі есіп тұрды. Айтпақшы, осы шеруде аспанға Ассамблеяның 20 жылдығына орай 20 мың аппақ шар мен 20 кептер ұшырылғанын да естеріңізге сала кетейік.
Алаңнан алғашқы болып үрмелі аспаптарын құйқылжытып 5518 әскери бөлімінің сымдай тартылған сарбаздары өтті. Одан соң еліміздегі бірлік пен татулықтың айқын көрінісі саналатын облысымыздағы этномәдени орталықтар мен Достық үйлерінің өкілдері шықты. Олар бүгінде Қазақстанды өздерінің ортақ үйі деп біледі. Ел иесі, жер иесі саналатын қазақ халқы алмағайып замандарда шартараптан бас сауғалаған, тағдыр тәлкегімен босып келген басқа жұртты бауырына басты. Өзінің тоз-тозы шыққанына қарамастан, басқаның қайғысына да ортақтығын танытты. Кеңестік жүйе қыспағымен қазақ даласын паналаған бөтен жұрт осында мәңгілік тұрақтап қалды. Тәуелсіздік тұсында да қазақ халқының даналығы, кеңдігі мен сыйластығы этностық, әлеуметтік, діни және де шығу тегіне қарамай, жаңа мемлекеттің барша азаматының ұйысуына себепші болды.
Дәл осы кезде алаңдағы көңілді әуенді мотоциклдер моторының күшті дауысы басып кеткен болатын. Облыс орталығындағы мереке атаулыдан қалмайтын сауықшыл байкерлер шықты ортаға. Темір тұлпарлар легі мұнымен де аяқталған жоқ. «Бипек Авто», «Азия Авто» мекемелерінің су жаңа көліктері де шеруге қатысты. Ары қарай шеруді Өскемендегі алдыңғы қатарлы ірі зауыттар мен кәсіпорындар реті жалғастырып әкетті. «Қазцинк» ЖШС, «ҮМЗ» АҚ, «Өскемен ТМК», Қазақстан монет сарайы, Өскемен арматура зауытының және тағы басқа көптеген танымал өндіріс орындарының қызметкерлері мен жұмысшылары алаңмен жүріп өтті. Одан басқа Өскемендегі барлық жоғары оқу орындары мен колледждер, мектептер, мемлекеттік мекемелер, банктер мен шағын кәсіпорындар, жалпы, мерекелік шеруге барлығы 88 кәсіпорын мен ұйым қатысқан.
Қазақстан халқы Ассамблеясының 20 жылдығы мен еліміздегі Бірлік күніне орай өтіп жатқан салтанатты шерудің басы-аяғы орталық алаңға жиналып болған сәтте шерушілерді төрдегі сахнадан облыс әкімі Даниал АХМЕТОВ құттықтады. Аймақ басшысы өзінің құттықтау сөзінде еліміздің басты байлығы татулық пен бірлік екендігіне тоқталып өтті.
– Қазақстан халқының Бірлігі күні мерекесі бүгінде бейбіт өмір мен ынтымақта тұрмыс кешіп отырған ел тұрғындары үшін ыстық ықылас пен достық ниеттің дәстүріне, жарқын болашаққа деген сенімнің бастауына және көпшіліктің асыға күтер шаттық мейрамына айналды. Бұл күн – әрбір Қазақстан азаматы үшін Отанға деген сүйіспеншілік сезімнің, азаматтық борыш пен жалпыұлттық келісімнің мерекесі. Халық бірлігі мерекесі күні ел азаматтары ұлт пен ұлыстың өткен кезеңдегі тарихы мен оның сабақтастығын дәріптеп, әлемдік қауымдастық тарапынан мойындалған еліміздегі қоғамдық келісім мен этносаралық толеранттылықты паш етеді. Қазақстанның басты жетістігіне айналған қоғамдық келісім елдің нәтижелі әлеуметтік-экономикалық, қоғамдық-саяси дамуының кепіліне және негізіне айналды. Таяуда елімізде өткен кезектен тыс Президент сайлауы ел бірлігін көрсетіп, ұлысты ұйыстыра түсті. Халқымыздың әлем алдындағы абыройын тағы бір асқақтатып өтті. Еліміздің бүгін жетіп отырған жетістігі – Елбасымыз Нұрсұлтан НАЗАРБАЕВТЫҢ сарабдал саясатының салтанатты көрінісі. Сіздер сайлауға біркісідей қатысып, үлкен белсенділік таныттыңыздар. Сол үшін де өз алғысымды білдіргім келеді. Мерекелеріңіз құтты болсын! Болашағымыз баянды болып, Қазақ елінің айбыны арта берсін! – деді аймақ басшысы өзінің құттықтау сөзінде.

Салтанатты шеруде сап түзей келген жерлестеріміз де өздерінің мерекелік тілектерін білдіріп жатты.
– Бүкіл Қазақстан халқын бүгінгі 1 мамыр – ынтымақтастық, достық, бірлік күнімен құттықтаймын! Көңіл күйіміз өте жақсы, ауа райы да тамаша. Ассамблеяның жасап жатқан игі істері өте көп. Шығыс Қазақстан облысында 100-ден астам ұлттар бар, 11 Достық үйі жұмыс істеуде. Оның барлығы Елбасының қолдауымен іске асып жатыр. Халықтар арасында орныққан достық, бірлік, бейбітшілік те Елбасының арқасында болып отыр, – дейді Қазақстан халқы Ассамблеясының мүшесі Майра Бейсеқанова.
Алаңдағы мереке концертсіз өткен бе?! Өңіріміздің белді-белді деген өнер ұжымдары мен күміс көмей әншілері көктем мерекесін ары қарай әнмен әспеттеп, күймен көмкеріп әкетті. Қала тұрғындары да ерекше көп жиналыпты, түс ауа алаңда ине шаншыр орын қалмады. Өз күшіне сенгендер кір тасын көтеріп, сайыс десе, делебесі қозатындар армрестлинг алаңында білек сынасты. Арқан тартысып жатқандар да жетерлік. Дойбы, шахматтың да қызығы осы жерде. Әдеттегідей қолөнер шеберлерінің бұйымдары халық назарына ұсынылды.
Түстен кейін алаңда жұрт назарын өзіне бұрған ерекше шара – «Автоэкзотика – 2015» көрме-сайысы өтті. Қатысушылар «Автодыбыс», «Ретроклассика», «Тюнинг» «Салон», «Подкапотное пространство» аталымдары бойынша сынға түсті.
«Шығыс марафоны» автоклубы ұйымдастырған көрмеге облысымыздың барлық аудандары мен елді мекендерінің көлікқұмарлары келіп қатысты. Көрменің мақсаты – қаламызда қандай әдемі көліктердің жүргенін көрсету, көліктің қозғалыс құралы ғана емес, сонымен бірге тарихи құндылық екенін, темірді күтсе, тарихи жәдігерге айналатынын жұртқа көрсету екен.
Көрмеге Nissan Skyline, Toyota FunCargo, Honda Accord, Toyota Tundra, Ford Mustang, Mazda MX3 сияқты бүгінгі күннің ерекше өзгертіліп жасалған көліктері мен бірге 1972 жылы шыққан «ГАЗ 24» сияқты көлік те қатысты.
Мерекелік күннің кешкі алаңын өскемендік жастар өздері иемденді десе де болады. Сахнада «Студенттер көктемі-2015» байқауының гала-концерті өтті, концерт соңы Семейден келген ерекше өнер ұжымының лаулаған отпен билеп, қызыл жалынды сахнада ойнатқан ерекше шоуымен аяқталды.
Қазақстан халқының Бірлігі күні Өскемен қаласындағы барлық саябақтар қысқы демалыс маусымынан кейін өз жұмыстарына кірісті. «Металлург», «Жамбыл», «Жастар» және «Сәулетай» саябақтарында мерекелік концерттер өтіп, балаларға арналған «Мен бейбітшілікті саламын» атты асфальтты алаңқайлардағы сурет байқаулары, басқа да түрлі конкурстар ұйымдастырылды.
Осы мереке күні бала-шағасын ертіп, саябақтарға келген жұртшылықтың санында шек болмады. Әсіресе, «Металлург» саябағындағы ойын-сауық аттракциондарына тартылғандардың қарасы көп. Сондай-ақ, шаһар тұрғындары мен қонақтары этноауылдың аспан астындағы мұражайлары мен хайуанаттар бағына барып, сондағы мерекелік шараларға қатысты.
– Бүгін – еліміздегі ұлық мейрамдардың бірі, Қазақстан халқы бірлігі мен достығының арқасында жылдан-жылға өсіп-өркендеп келеді. Қараңыздаршы, бүгін саябақта қаншама ұлттың өкілдері жүр, балалар асыр салып ойнауда, осы мамыражай өмірдің қадірін түсіне білген жөн. Күннің көзі де ерекше елжіреп, жайма-шуақтанып тұр, бүгін отбасымызбен қыдырыстап жүрміз, түстен кейін туысқандардың үйлеріне барып, қонақшылап қайтпақпыз. Бірлік күнімен бүкіл Шығыс Қазақстан жұртшылығын құттықтаймын! – дейді қала тұрғыны Раушан Райымханова.
Атап өтерлік тағы бір жайт, осы Бірлік күні аясында, келесі күні Өскеменде субұрқақтардың салтанатты ашылу рәсімі болып өтті. Сағат 11-де Республика алаңындағы, Амфитеатр маңындағы және Гагарин бульвары бойында орналасқан фонтандар іске қосылды. «Субұрқақтар шеруі» аталған осы мерекелік шара аясында концерттік бағдарламалар мен сауда-саттық шаралары ұйымдастырылды. Ал Үлбі мен Ертіс өзеніндегі үш субұрқақ сәл кейінірек, су деңгейі төмендеген кезде жұмыс істемек.

* * *
Қазақстан халқының Бірлігі күні мерекесі облыс орталығы Өскеменнен өзге өңірдегі барлық қалалар мен аудандарда барынша лайықты деңгейде, жоғары дайындықпен, ұлттар достығын паш ете отырып, мерекеленді.
Қазақстан халқының Бірлігі күні Семейдегі Орталық алаңға қазақ үйі мен түрлі ұлттық-мәдени бірлестіктердің шатырлары тігілді. Шатырлардың астында әр ұлт, атап айтсақ, неміс, орыс, татар, өзбек және тағы басқалар өздерінің салт-дәстүрлерін, сәндік-қолданбалы өнерін, киімдерін, музыкалық аспаптарын, тұрмыстық және қолөнер бұйымдарын көрсетіп, билерін билеп, әндерін шырқады. Қала жұртшылығына шығармашылық ұжымдардың қатысуымен мерекелік концерт ұсынылды. Мерекеге қатысушыларды қала әкімі Айбек Кәрімов құттықтады.
– Бұл күн – біздерге Отанымызға деген сүйіспеншілік пен патриоттық сезімнің, азаматтық борыш пен жалпыұлттық келісімнің шынайы көрінісін көрсетуге арналған мереке, – деді қалалық мәслихаттың хатшысы Бейсенбек Ақжалов. Бұл – қазақтың кең байтақ даласын мекен еткен 130-дан аса ұлт пен ұлыстың ынтыма¬ғын одан әрі нығайтып, арман-тілегін бір ар¬наға тоғыстыратын ұлық мереке.Тәуелсіздігімізді алған сәттен бастап, тұрақтылықты, азаматтық татулық пен келісімді нығайту мемлекеттің ішкі саясатының негізгі ұстанымына айналды. Президентіміз Нұрсұлтан НАЗАРБАЕВТЫҢ Жарлығымен биыл Қазақстан ха묬қы Ассамблеясының жылы болып жарияланды. Бұл жыл – елі¬міз үшін ерекше жыл. Биыл біз Ұлы Жеңістің 70 жылдығын, Конституцияның 20 жылдығын және Қазақ хандығының 550 жылдығын атап өтетін боламыз. Мереке құтты болсын!
– Біз болашақ ұрпақ үшін жауаптымыз. Қазақстан халқы Ассамблеясының маңызы аса зор, – деді Семейдегі корей халқының атынан Пак Ли Жу. – Елбасымыз Нұрсұлтан НАЗАРБАЕВТЫҢ ұсынысымен қолға алынған Ассамблея жұмысына бүгінде халық дән риза. Қоғамдық келісім мен саяси тұрақтылық – біздің ең ма¬ңызды байлығымыз! Бұл жетістікті бағалау, оны сақтау жолында аянбай еңбек ету әрбір Қазақстан азаматының мін¬де¬ті болып табылады.
– Бүгінгі таңда Ассамблея көпұлтты қоғамдағы этнос¬аралық қарым-қатынасты үйлесімді реттеп, ел бірлігін сақ¬тап келеді, – деді поляк қызы Анна Демидович. – Еліміздің ұлтаралық келісім мен берекелі бірлікке негізделген бағыт-бағдарын әлемдік қауымдастық жоғары бағалап отыр.

Дарын Нұрсапаров,
Ержан Әбіш,
Раушан Нұғманбекова