Рождество мейрамымен құттықтады

Кеше түнгі сағат 23.30-да облыс әкімі Даниал АХМЕТОВ Өскемен қаласындағы Стрелка шағын ауданында орналасқан православтардың Қасиетті Андрей храмында жұртшылықты Рождество мерекесімен құттықтады.
Салтанатты шараны Өскемен және Семей Епархиясының епископы Амфилохий ашқан соң облыс әкімі құттықтау сөз сөйледі.
– Құрметті жерлестер! Рождество – тарихы тереңде жатқан ұлық мейрам. Елбасымыз халқымыздың осы дәстүрін құрметтей отырып, оны мемлекеттік мереке деп жариялады. Рождество – бұл кемел келешекке деген сенімді үміттің мейрамы, ол баршамызды жақсылыққа үндейді. Жаратушыға деген сенім бізге жәрдем береді, адал, таза әрі мықты болуға көмектеседі. Біз қазір болашағы жарқын қоғамды құрып жатырмыз. Бірлігіміз бекем, әлем мойындаған Елбасымыз бар. Президенттің салиқалы саясаты арқасында көпұлтты Қазақстанда ислам және христиан діндері үйлесім тауып отыр. Біздер – қазақстандықтар өз елімізді сүюге, бір-бірімізді құрметтеуге тиіспіз. Шіркеу адамдарды ұлтқа, нәсілге бөлмейді, керісінше халықты біріктіреді. Мен облыс басшылығы атынан сіздерді осынау қасиетті мерекемен құттықтаймын. Отбасыларыңызға, жақындарыңызға, бала-шағаларыңызға, ортақ үйіміз – Қазақстанға бейбітшілік пен бақыт тілеймін! – деді аймақ басшысы.
Облыс әкімі Даниал АХМЕТОВ бүгінгі таңда Шығыс Қазақстан аумағында шамамен 130 ұлттың өкілдері тұратынын, облыс басшылығы тарапынан олардың бейбіт өмір сүруі үшін барлық мүмкіндіктер жасалып жатқанын да атап өтті. Әр ұлт өз салт-дәстүрін, ділі мен дінін сақтау құқығына ие болу үшін этно-мәдени бірлестіктер құрылған. Олардың жалпы саны жүзден асады. Жыл сайын аймақта жаңадан мешіттер мен шіркеулер ашылуда.
– Қазақстан көпұлтты ел болғаннан кейін Мемлекет басшысының негізгі саясаты сол ұлттардың арасындағы татулық пен бірлікті, ынтымақты нығайтуға бағытталып отыр. Сол саясаттың нәтижесінде мемлекетіміз дүние жүзіне танылды, экономикамыз дамып, халықтың әл-ауқаты артты, – деген аймақ басшысы халықтың әрқашан осындай бірлікте болуы керектігін айырықша атап өтті. Ол сондай-ақ, еліміздегі тұрақтылықты нығайтуға өз үлестерін қосып жүрген барлық азаматтарға алғысын білдірді.
«Бүкіл Қазақстан халқы дініне, тіліне қарамастан Рождество мерекесін біркісідей тойлайды» – деген Өскемен және Семей Епархиясының епископы Амфилохий осында жиналған қауымды құттықтауға арнайы келген облыс әкіміне барша православ христиандарының атынан ризашылығын білдіріп, оған Мәскеу және Бүкіл Русь патриархы Кирилдің және өзінің Рождестволық жолдауын табыс етті.

Ержан Әбіш