Риддердегі ахуал тұрақталып келеді
Риддер жылу электр орталығында техногендік апат салдарын жою жұмыстары жалғасуда. Соңғы ақпарат бойынша стансадағы №6 жоғары қысымды қазандықта болған апат жойылды.
Шаһар басшылығының хабарлауынша, қысқа уақытта қазандық іске қосылып, жылу беру басталады. Яғни, көп ұзамай, шаһардың тұрғын үйлеріндегі температуралық режим қалпына келеді деген сөз.
Естеріңізге сала кетейік, 10 қараша күні түнгі сағат 01.00 шамасында Риддер жылу орталығындағы №6 қазандық температура 65 градусқа дейін көтерілуі себепті апатты жағдайда сөндірілген болатын.
Жергілікті жерде жұмыс істеп жатқан төтенше жағдай штабының мәліметіне сүйенсек, қазір ЖЭО қазандығындағы температура 57/44 градус мөлшерінде. Ал сыртқы ауа температурасы – 2 градус.
«Багер жылу орталығы штаттық режимде жұмыс істейді. №6 қазандықтағы апат жойылды. Гидравликалық сынақтар жүргізіліп, сағат 8.00-де қазандық агрегатын жағу басталды. Алдағы уақытта қазандық желіге қосылып, жылу беріледі. Қала бойынша энергия тұтыну шамамен – 9 МВт (бұған дейін 12-19 МВт аралығында болған). Бұл үйлердегі температуралық режим қалпына келіп, тұрғындар электр құрылғыларын азырақ қолдана бастағанын көрсетеді», делінген арнайы штаб хабарламасында.
Тағы бір айта кетер жайт, бүгінде Риддерге мазут толтырылған қосымша төрт цистерна жеткізіліпті.
Сондай-ақ штаб өкілдері кеншілер қаласындағы төтенше жағдай режимі үйлердегі температура толық қалпына келген соң ғана алынатынын ескертті.
Қазір қаладағы үйлерде температура +18 градустан +24 градусқа дейін көтерілген. ЖЭО-ның төрт қазандығы іске қосылып, жылу беру +70 градусқа дейін артты. Дегенмен қалада жылумен қамтамасыз ету жұмыстары толық қалпына келмейінше төтенше жағдай режимі алынбайтынын айтты мамандар.
Риддер әкімі Дмитрий Горьковойдың сөзіне қарағанда, төртінші және бесінші қазандықтардың жұмысын қалпына келтіру іс-шараларының жоспары әзірленді, жөндеуге қажетті жабдықтар жеткізілді. Бір аптадан кейін төртінші қазандық іске қосылады, ал бесіншісін жөндеуге біраз уақыт керек.
Сол сияқты, бүгінде қала халқын қайта есептеу мәселесі де алаңдатып отырғаны анық. Табиғи монополияларды реттеу комитеті өкілдерінің сөзінше, тұрғындардың бұл талаптары орынды, себебі риддерліктердің арасында коммуналдық қызметтер үшін алдын ала төлем жасап қоятындары аз емес.
– Қазір ПИК және кондоминиум өкілдері жылу энергиясының жетпей қалған сомасын анықтауда, содан кейін бұл ақпаратты жылумен қамтамасыз ететін компанияға жолдайды, – деп атап өтті Дмитрий Горьковой. – Егер ЖЭО тарапы бұдан бас тартса, онда тұрғындардың құқығын қорғау департаментіне шығамыз. Жақында Риддерде қалыптасқан жағдайды білу мақсатында Энергетика министрлігі Атомдық және энергетикалық қадағалау мен бақылау комитетінің төрағасы Сұңғат Есімханов та келіп қайтқан болатын.
Мамандардың айтуынша, қазір Риддер халқының дені басынан дау арылмаған ЖЭО-ны коммуналдық меншікке қайтару бастамасын қолдап отыр. Қала тұрғындары бұл жөнінде петиция да жазып, облыс әкімінің көмегіне жүгінген. Себебі ЖЭО-ның басшылығында ауыс-түйіс болмаса, мұндай жағдай қыстың қытымыр аязында да қайталануы мүмкін деп алаңдайды риддерліктер.
Осыдан бұрын жазғанымыздай, алдағы уақытта Риддер жылу орталығы коммуналдық меншікке қайтарылуы мүмкін. Қазір аймақ басшылығының тапсырмасы бойынша бұл бағытта қажетті жұмыс жүргізілуде. Дегенмен қазір бәрінен бұрын Риддер халқын қыс бойы жылумен үздіксіз қамтамасыз ету маңызды болып тұр.
Сәрсен Қабылым
