Ресей кубогында алтын алды

Соңғы жылдары радиоспорт елімізде ерекше қарқынмен дамып келеді. Бұл жарыс түрі адамдарды ептілікке, сын сәтте ұшқыр тәсіл қолдануды қажет етеді. Жақында жерлесіміз Александр Кочергин радиоспорттан Ресей Кубогына қатысып, алтын медальға ие болды.

Мәскеу қаласында 21-26 маусым аралығында спорттық радиопеленгациядан Ресей кубогы өтіп, оған елімізден бірнеше саңлақ қатысқан еді. Аталмыш жарысқа біздің отандасымыз, Азияның 11 дүркін чемпионы Александр Кочергин де қатысып, өз шеберлігінің нәтижесінде алтыннан алқа тақты.

– Мен спорттың бұл түрімен 1964 жылдан бері айналысып келемін. Енді Моңғолияда шілде айында өтетін Азия чемпионатына қатысуды жоспарлап отырмын. Облыстан үш спортшы барады. Бұл сайысқа қатысуға облыстық дене шынықтыру және спорт басқармасы қолдау көрсетпек, – деді Александр Кочергин.

Сондай-ақ, ағымдағы жылдың мамыр айында спорт ардагері Ресей біріншілігіне қатысып, 4 алтын медальдың төртеуін де еншілеген еді. Отандасымыз қыркүйек айында Еуропа чемпионатына қатысуды ұйғарып отыр. Мақсаты белгілі, тағы да жеңістің биік тұғырынан көріну. Біз жерлесімізге алдағы уақытта да табыс тілейміз.

Өкен Есімбек.
Өскемен.