Ramazan Live тelegram-боты іске қосылды
«Шығыс ақпарат» медиа-холдингінің бастамасымен және облыстық «Халифа Алтай» мешітінің қолдауымен «Ramazan Live» Telegram-боты іске қосылды.
Бұл туралы Өңірлік коммуникациялар қызметі алаңында өткен брифингте Қазақстан мұсылмандары діни басқармасының Өскемен аймағы бойынша өкіл имамы, облыстық «Халифа Алтай» мешітінің бас имамы Ермек қажы Мұқатай мен «Шығыс ақпарат» медиахолдингіне қарасты SMM департаменті басшысы Елжан Қайырқанов БАҚ өкілдеріне толық ақпарат таратты.
Аталмыш жобадан облыстың қалалары мен аудандары бойынша намаз және ораза кестесі, ауыз ашу және бекіту дұғаларынан бөлек, садақа жайында, Рамазан айында ораза тұтуға қатысты жиі қойылатын сұрақтарға жауап табуға болады.
– Қадірлі жамағат! Келіп жеткен Рамазан айы, тұтқан оразаларыңыз, берген пітір-садақаларыңыз қабыл болсын. Live» Telegram-боты халықтың жедел түрде ақпарат табуына және өздерін мазалаған жеке сұрақтарына нақты жауап алуына үлкен мүмкіндік береді. Қазақстан мұсылмандары діни басқармасына қарасты «Муфтият» баспасынан Рамазанға байланысты, «Оразаға қатысты 200 сұрақ» кітабы екі тілде шығарылып жатыр. Дегенмен, кітапты барлығы оқи бермейді ғой, әсіресе жастар. Ал ұялы телефон үнемі әркімнің қолында болғандықтан кез келген уақытта осы ботты қолдана алады. Сонымен бірге сұрақ-жауап бөлімі үнемі толықтырылып, жетілдіріліп отырады. Алда Ораза айт, Құрбан айт мерекелеріміз бар. Соған қатысты дүниелер де осында жарияланады. Аталған ботта ҚМДБ тарапынан таратылатын барлық ақпарат қамтылады, – деді Ермек қажы Мұқатай брифингте.
Жаңа жобаны жасап шығарушылар бұл бастаманың жастар арасында кең танымал болатындығына сенімді.
– Бұл жоба көптен бері ойымызда жүрген болатын, іске асырудың орайы енді келгендей. Негізгі мақсат – мобильді жүйенің көмегімен ұялы телефон арқылы әлеуметтік желілерде діни құндылықтарды жастар арасында кеңінен тарату. Идея бір жарым күннің ішінде жүзеге асты, әрі қаржы жұмсауды да қажет етпейді. Осы ретте ұсынысымызға бірден қолдау танытқан облыстық мешіттің басшылығына, ұжымына алғысымыз шексіз, – деді Елжан Қайырқанов.
Алдағы уақытта бұл жобаны одан әрі дамыту да жоспарланып отыр. Бас имамның айтуынша, Рамазан айы аяқталғаннан кейін де бұл боттың қызметі жалғасын табады. Яғни, күнделікті өмірде кездесетін ислам дініне қатысты сұрақтарды қамтып, барлығына бірдей жауап ала алатындай етіп кеңейтілмек.
Дәурен Аллабергенұлы
