Қолдан жасалған ғажайыптар
Өскемендегі Пушкин атындағы облыстық кітапханада «Қолдан жасалған ғажайыптар» көрме-жәрмеңкесі ашылды.
Көрмеде сәндік-қолданбалы өнер бұйымдары: киізден және моншақтан жасалған суреттер, акварель бояуларымен салынған суреттер, гипстен жасалған вазалар, тоқылған бұйымдар, 3D принтерде жасалған жұмыстар (сырғалар, ойыншықтар) ұсынылды. Бұл ерекше бұйымдарды қаламыздағы «Ақниет» мектеп-интернатының тәрбиеленушілері жасаған екен.
Ерекше қажеттілігі бар балаларға білім беретін бұл мектеп шәкірттердің шығармашылық қабілетін де ұдайы шыңдап келеді. Оқушылар түрлі бағыт бойынша республикалық және халықаралық деңгейдегі конкурстарға, фестивальдар мен олимпиадаларға белсенді қатысады. Бірнеше рет «Абилимпикс» халықаралық қозғалысының ұлттық чемпионатында жүлдегер болды.
Сондықтан «Қолдан жасалған ғажайыптар» көрмесі өскелең ұрпаққа қай қырынан болса да өнегелі іс-шара.
Облыстық кітапханада 2013 жылдан бастап «Кедергісіз кітапхана» жобасы жұмыс істейді. Жоба мүмкіндігі шектеулі жандар мен қарттарға әлеуметтік-мәдени ақпараттың қолжетімділігін қамтамасыз етуді, мүмкіндігі шектеулі жандарды әлеуметтендіру және білім беру тетіктерін жетілдіруді, бос уақытын ұйымдастыруды көздейді.
Ерекше балалардың туындылары қойылған көрме-жәрмеңке 24 сәуірге дейін жұмыс істейді.
Назгүл Амантайқызы
