«Qalam.kz» оқырманға құнды дүниелер ұсынады

ҚМДБ-ның Өскемен өкілдігі өзінің «qalam.kz» ислам ағартушылық порталын іске қосты. Ондағы негізгі мақсат –өкілдіктердің тыныс-тіршілігін кең ауқымда көрсету, ислам құндылықтарын халыққа ұсыну, ақпаратты жедел жеткізу.

Ең бастысы, бұл электронды портал діни тақырыпта жеделқабыл ақпараттармен қоса, сараптамалық, танымдық һәм ағартушылық бағыттағы материалдарды беруді мұрат санайды.

Сайт барынша оңтайландырылған. Ғибратты сөздер, ислам ғұламаларының насихат баяндары мен тағылымдары «Қайнар көз» айдарында берілсе, қазақ ойшылдарының тағылымға толы өсиеттері «Ғибратнамада» жарияланады. Әртүрлі рәсімдер бойынша «Ғұламалалар кеңесінің» пәтуалары порталдың «Пәтуа» айдарынан орын алса, «Тарих парағы» айдарынан тарихымызға қатысты құнды жазбалар мен деректерді табуға болады. «Дін мен дәстүр» бөлігінен дініміз бен салтымыздың, дәстүріміздің жауһарларымен танысуға мүмкіндік бар.

Сонымен қатар, дінтанушы ғалымдарымыздың өзекті мақалалары да сайтта күнделікті жарияланып тұрады.

Өкілдіктің хабарлауынша, «qalam.kz» ислами ағартушылық порталы оқырмандардың рухани сұранысын қанағаттандыру үшін тың ізденістермен қызмет атқаруға бекініп отыр.

Қуан Сейіт