Полиция формасы қанша теңге?

Облыстық полиция департаменті «Еңбек-Өскемен» кәсіпорнымен қызметтік киім тігуге 228,2 миллион теңгеге шарт жасасты. Айта кетейік, бұл кәсіпорын сотталғандарды жұмыспен қамту мақсатында құрылған. Онда тұтқындар жұмыс істейді.
Мемлекеттік сатып алу сайтында көрсетілген дерекке сүйенсек, полиция департаменті патрульдік полиция, командалық құрам және учаскелік инспекторларға арналған киім-кешек сатып алмақ.
Атап айтсақ, бір данасы 17 мың теңгеге бағаланған 750 пуловер, 32 655 теңгеден ұзын жеңді 350 күнделікті костюм, 31 600 теңгеден қысқа жеңді 350 күнделікті костюм, 15 мың теңгеден 350 ерлер шалбары, 40 мың теңгеден 400 жылы күртеше, 15 мың теңгеден 400 ұзын жеңді жейде, 13 мың теңгеден 400 қысқа жеңді жейде, бес мың теңгеден 750 маусымдық бейсболка (күнқағарлы қалпақ), 6500 теңгеден қой терісінен тігілген құлақшын, алты мың теңгеден 350 фуражка, төрт мың теңгеден жаздық 750 бейсболка сатып алу жоспарланған. Бұдан басқа, 27 600 теңге бағамен 350 ер адамның маусымдық күртешесін, 53 115 теңгеден 350 ер адамның жылы костюмін, 2000 теңгеден 1700 күнделікті футболка, 19 317 теңгеден 750 қысқа қонышты бәтеңке, 29 мың теңгеден 750 қысқа қонышты етік сатып алынбақ.
Сатып алынатын тауарлар тізбесінде 8259 погон бар (800 теңгеден). Оның ішінде полиция полковниктеріне 200 жұп, майорларға – 259 жұп, капитандарға – 2300 жұп, аға лейтенанттарға – 3000 жұп, лейтенанттарға 2500 жұп пагон.
Тағы да 21 мың теңгеден 909 жиынтық жабдық (тоғасы бар былғары белбеу, тапанша қабы, сақтандыру бауы, оқсауыт, кісен, «Черемуха» құралдарына арналған қаптар, шамға арналған бекіткіш, радиостанция қабы, тоқыма белбеу) сатып алынады.
Жарық шағылыстыратын жолағы бар ұзын жеңді ер адамның 400 костюмі 32 655 теңгеден бағаланған. Жарық шағылыстыратын жолағы бар қысқа жеңді 400 костюм – 31 600 теңге, 400 жылы костюм – 59 670 теңге, жарық шағылыстырғыш 400 сигналдық кеудеше қолғабымен – 9100 теңге.
Киімдерде ISHKI ISTER ministrligi, PATRULDIK POLISIA, SHYGYS QAZAQSTAN OBLYSY POLISIA DEPARTAMENTI деген жазулар болады.
Өнімге қойылатын талап қатаң. Техникалық сипаттамада киімнің түсі, матасы және тігіс түріне дейін барлығы жазылған.
Айта кету керек, бұл кәсіпорын мұндай ірі тапсырысты алғаш рет осы полиция департаментінен алып отыр.
Кәсіпорын киім тігуден бөлек басқа да қызмет түрлерін ұсынады. Мәселен, табиғи тасты өңдеу, құрылыс-монтаждау жұмыстары, ағаш өңдеу, металл өңдеу, жобалық-сметалық құжаттама әзірлеу, пластикалық терезелер жасау, жиһаз дайындау. Бұдан басқа, киім-кешек, арнайы киім, су өткізбейтін матаға арналған киім-кешек, төсек-орын жабдықтары мен аяқ киім тігетін жеке тігін цехтары бар. Өндіріс орындары түзеу мекемелерінде орналасқан.
Тасқын Болатұлы