Педагогтармен пікірлесті
Президенттікке кандидат Мейрам Қажыкен Маңғыстау облысының Жаңаөзен қаласына барып, Білім-Инновация лицей-интернатында сайлаушылармен кездесті.
Саяси бағдарламасын таныстырып, педагог қызметінің маңызын атап өтті.
– Мен өзім мұғалім, профессормын. Сондықтан бұл жұмыстың қаншалықты қиын болатынын білемін, – деді М.Қажыкен.
Мұғалімдер үміткермен саладағы жалақыны көтермей жүктемені ұлғайту, сыбайлас жемқорлық, тұрғын үй алу мәселелерін талқылады.
Мейрам Қажыкен бағдарламасында жас мамандарға, үй алуға қаражаты жеткіліксіз отбасыларына, халықтың басқа да топтарына үй беру жоспары жазылғанын айтты.
– Менің ұстанымым мынада – жергілікті органдар көппәтерлі үй салу үшін мердігер компанияға жер учаскесін береді. Сондықтан құрылыс салушы тұрғын үйдің 15%-на дейін мемлекетке бөлуі керек. Яғни, әкімдіктер тұрғын үйден пәтерлер алады. Оны кезекте тұрғандарға береді.
Жұмысқа орналасу кезіндегі сыбайлас жемқорлыққа келетін болсақ, мен бұл өзекті мәселемен заңды түрде қатал және қатаң күресу керек деп санаймын. Істі тіпті құқық қорғау органдарына дейін жеткізу керек, – деді кандидат.
