Оқу-жаттығу ойдағыдай өтті

Еліміздің барлық өңірлерінде «Қыс-2015» командалық-штабтық оқу-жаттығу жұмыстары өтіп жатыр. Біздің облыстың да апаттық-құтқару қызметтері мен құралымдары өз мүмкіндіктерін сынақтан өткізіп көрді.
Өскемен әуежайында өткен оқу-жаттығу жұмыстарының алғашқы кезеңі тәжірибелік пысықтауларға арналды. Сақадай сай сапта тұрған құтқару техникаларын облыс әкімінің орынбасары Димитрий Гариков аралап көріп шықты.
«Қыс-2015» жаттығу жұмыстарының негізгі бөлігі екінші кезеңге құрылған болатын. Ол үшін шартты түрде апаттық сценарий құрылып, құтқарушылар сценарий желісі бойынша қимылдады.
Шартты жоспарға сәйкес облыста бірнеше күн қолайсыз ауарайы жағдайы сақталуда – қар, боран, қатты жел. Өскеменнің әуежайында «Як-40» ұшағы әуеге көтерілер алдында ұшыру-қондыру жолағының шетінен шығып кетті. Әуе техникасы шассиінің негізгі тірегі зақымданған. Нәтижесінде ұшақтың қанаты жерге соғылып, бортта өрт шықты. Негізгі есік жабылып қалған. Бортта 30 жолаушы мен төрт экипаж мүшесі бар.
«Дабыл» сигналы түсе салысымен апаттық ақпарат ТЖ бойынша аумақтық органдарға таратылды. Төтенше жағдай орнына № 2 өрт сөндіру бөлімінің бөлімшелері, Шығыс өңірлік аэро-ұтқыр жедел құтқару жасағының құтқарушылары, апаттар медицинасы орталығы жіберілді. Сондай-ақ, құрамына жергілікті билік органының өкілдері кірген комиссия мен облыстық төтенше жағдайлар департаментінің басшылары келді.
Құтқарушыларға әуежайдың апаттық-құтқару тобының да көмек қолын созды. Әр бөлімше алға қойған міндеттерін асқан жауапкершілікпен орындап, барынша шапшаң қимылдады. Негізгі мақсат – өрт сөндіру кезінде бортта қамалып отырған жолаушыларға зардап шектірмеу.
Апаттар медицинасы орталығының қызметкерлері зардап шеккендерге медициналық және психологиялық көмек көрсету үшін уақытша эвакуация пунктін ұйымдастырды. Жергілікті Қызыл жарты ай ұйымының мамандары қажетті гуманитарлық көмек мәселелерін шешті.
Оқу-жаттығу жұмыстарының екі кезеңіне барлығы 69 техника бірлігі қатысты. Облыстық ТЖД басшысының міндетін атқарушы Александр Ломыгиннің айтуынша, құтқарушылар өздеріне жүктелген міндетті ойдағыдай атқарып шыққан.

Дарын Нұрсапаров