Он шақырым оңбай тұр

Теректі ауылы бір кездері Марқакөл ауданының орталығы болған. Тұрмысы мен тіршілігін жылдан-жылға түзеп келе жатқан жерлестерімнің жанына батқан бір-ақ мәселе бар. Ол – жол сапасы.

Небәрі он шақырым болатын Майқапшағай–Зайсан–Теректі бағытындағы ұзақ жолдың титімдей ғана бір бөлігінің сапасы жүргенді жаңылдырып, көргенді түңілдіріп, сапар соңына таяп қалған жолаушының сабырын сарқып, төзімін тоздыратынын өз басымнан өткердім. Теректінің тұрғын үй-коммуналдық шаруашылығын басқаратын Амантай Шорманұлының айтуынша, жолдың нақ осы бір бөлігіне 1992 жылдан бері жөндеу жүргізілмеген екен. Әбден тозығы жеткен жол теліміне қашан жөндеу жүрері де белгісіз.

Аталмыш бағыттағы жолдың сапасына жауапты зайсандық жол жөндеушілердің сыңайына қарасақ, бұл бөліктің жөнделуі келесі жылға қалмақ, себебі қаржыға тіреледі. Теректіліктердің санасында бұл жол биылдан қалса, жылдар бойы жөндеусіз жатуы мүмкін деген күдік те жоқ емес. Бұл күдікті Амантай Шорманұлы да растап отыр. Қара Ертісті тел емген Зайсан ауданының мердігерлері міндеттерін кешіктірмей орындаса, туған өлкесіне сағына жеткен мен сияқты жүздеген марқалықтардың батасын алар еді. Біздің тілек, Теректінің жолына жауапты орындар жауапкершілікпен қараса екен.