Олимпиада чемпиондары Өскеменге келді

Биыл ашылған Өскемендегі спорт мектеп-интернатында атақты бапкер Геннадий Сапунов пен даңқты балуан Дәулет Тұрлыханов бастаған бірқатар Олимпиада чемпиондары жеткіншектермен жүздесіп, ашық сұхбат құрды.
– Біз Өскеменге облыстық грек-рим, еркін күрес және әйелдер күресінің президенті Марат Мұзапаровтың шақыруымен келдік, – деп бастады сөзін Г.Сапунов, – Марат Өмірбекұлы Өскеменде жаңадан ашылған спорт-интернатының балаларымен кездесуді өтінді. Мұндағы қаз-қатар орналасқан Жекпе-жек сарайын, О.Рыпакова атындағы жеңіл атлетика манежін, суда жүзу бассейнін көргенде таңғалдық. Облыс орталығында мұндай заманауи спорт кластерінің құрылуы болашаққа жол ашпақ. Өйткені, мұндай, спорттың оннан астам түрімен бір жерде жаттығу жасайтын заман талабына сай кластер Қазақстанды былай қойып, Ресейдің өзінде жоқ деуге болады. Күні ертең бұл жерден спорт жұлдыздары шығып жатса, таңғалмаймыз.
Геннадий Сапунов классикалық күреспен 18 жасынан жаттыққан. Күреске жан-тәнімен берілген ол аз уақытта табысқа жете бастайды. КСРО чемпионатына 9 рет қатысады. 1968 жылы тұңғыш рет КСРО чемпионы атанып, алтыннан алқа тақты. 1963, 1965 жылдары Әлем, 1967 жылы Еуропа чемпионы деген құрметті атаққа ие болды. Сосын бапкерлікке бет бұрады. Ол жетекшілік ететін КСРО құрамасы Олимпиада ойындары мен Әлем чемпионаттарында үнемі топ жарып жүрді.
Кездесуге сондай-ақ, 1988 жылғы Олимпиада ойындарының чемпиондары: әзірбайжан Камандар Маджидов, Оңтүстік Кореяның азаматы Ким Ен Нам, Олимпиада ойындарының күміс және қола жүлдегері, КСРО-ның 7 дүркін чемпионы Дәулет Тұрлыханов, Барселона Олимпиадасының қола жүлдегері, Әлем чемпионы, беларусь Сергей Демишкевич өздерінің спортқа қалай келгені, шаршап-шалдықса да ел намысын жоғары қойып, аянбай тер төккендерін әңгімелей келе қазіргі кезде немен айналысып жүргендерін де айтып берді.
Бір қызығы, кәріс Ким Ен Нам қазақша жатық сөйлей алады екен, шәкірттерге оқу мен спортты қатар алып жүруде сәттілік тіледі.
– 1980 жылы Жақсылық ағаларың (Үшкемпіров) Мәскеуде Олимпиада шыңын бағындырғаннан кейін біз оқитын мектепке келіп, кездесу өткізді. Сол кезде ол кісіге көптеген сұрақтар қойып, қатты қызығушылығымызды білдірген едік. Көздерінен от ұшқындаған қатарластарым шіркін, біз де атақты балуан болсақ деп армандадық. Қызығушылық бізді алға жетеледі, күндіз-түні кілемде арпаластық, ақыры нәтижеге қол жетті. Осындағы 300 орындық мектеп-интернаттан да келешекте Олимп шыңын бағындыратын ұландар шығатынына сенімім мол. Ол үшін қажымай еңбек етіп, алға ұмтылу керек – деді Дәулет Болатұлы.
Бұдан кейін болашақ чемпиондар даңқты ағаларымен суретке түсіп, қолтаңбаларын алды. Кездесу барысында танымал әнші Медеу Арынбаев гитарамен ән шырқап, көпшілік көңілін көтерді.

Оңдасын Елубай,
«Қазақстанның құрметті спорт қайраткері»