Өскемендік аспаз құпиясымен бөлісті
Өскемендегі «Пицца блюз» дәмханалар желісінің басқарушылары Виктория Донская мен Лариса Костарева дәмханаларда тәжірибеден өтіп жатқан колледж студенттеріне тамақтану саласына қалай келіп, қалай мықты аспаздардың қатарына қосылғандарын айтып берді. Дәмді ас дайындаудың шеберлері студенттерді аспаз мамандығының білгірі болуға үйретіп жатыр.
Виктория мен Лариса – өңірлік кәсіпкерлер палатасы жанындағы тәлімгерлік мектебінде оқып, сертификат алған білімді де білікті тәлімгерлер.
Аспаздың оқуын оқыған Виктория Донская 2004 жылы Өскемендегі дәмханалардың біріне жұмысқа тұрады. Содан бері оның өмірі ас әзірлеумен байланысты болып келеді.
– Тағылымдамадан өткенен кейін дайын өнімді безендіруші болдым. Жыл бойы қонақтарымыздың тапсырысы бойынша тағамдарды безендірдім. Осының бәрі маған өте қызықты болды. Шедеврлерді аспаз ғана жасай алады. Мен де аспаз болу үшін оқуға түстім. Дипломды алған соң қызметім жоғарылап, аспаз болдым. Бұл қызметте істеп жатқаныма 15 жылдан астам уақыт болыпты, – дейді Виктория аспазшы болу өнер екенін айтып.
Ол осы уақыт ішінде көптеген студенттерге тәлімгер болған, кейін олардың бәрі сол тамақтандыру орнында жұмысқа қалған.
– Тәлімгердің студенттер өміріндегі маңыздылығын түсіне отырып, балаларға кәсіби тәжірибемді үйретіп, көрсетіп қана қоймай, үлгі болуға тырыстым. Тәлімгер шәкірттер үшін әрі ана, әрі ұстаз. Сенің әрекеттеріңнен, кеңестеріңнен және жай ғана мақұлдауыңнан балаларда жұмыс істеуге деген, ең бастысы, тағамды сапалы етіп жасап шығаруға деген құлшыныс пайда болады. Ал, сол студент біздің кәсіпорында жұмыс істеу үшін қалып жатса, онда бұл біздің еңбегіміздің еш кетпегені, бірге жеткен нәтижеміз болып табылады, – дейді Виктория Донская.
Виктория студенттерге аспаздық өнерді үйретіп қана қоймай, әкімші ретінде даяшыларды да дайындап жүр.
Оның айтуынша, тәлімгерліктегі басты және маңызды нәрсе – түсіндіру, айту, көрсету және ести білу. Егер колледж студенті бүкіл академиялық кезеңде үш жыл қатарынан бір кәсіпорынға келсе, бұл – тәлімгердің жетістігі.
Тамағы тіл үйірген Виктория Донская кәсіпқойлар бірден көрінетініне сенімді. Викторияның айтқанындай, тағамды дайындаудың барлық кезеңдерін бірдей қабылдайтын студенттер бар: олар кесуге, жасау процесіне және безендіруге үлкен қызығушылықпен кіріседі. Ондай адамдар кәсіпте қалады. Анасы мәжбүрлеген немесе әжесі кеңес бергендердің көбі қалмайды, колледжді тек білім алу үшін ғана бітіреді.
– Колледждерде жүзеге асырылып жатқан дуалды оқыту жүйесі өз нәтижесін беріп келеді. Кәсіпкер қызметкерді таңдауға және оны өз қажеттіліктері бойынша оқытуға құқылы. Бұл болашақ қызметкерді алдын ала дайындауға, тағылымдамасыз-ақ жұмысқа алуға өте ыңғайлы, – дейді Виктория Донская.
Викторияның әріптесі Ларисаның пікірі де осындай. Әр оқушыға өзіндік көзқарас қажет.
– Оған оның біздікі, өзіміздікі екенін көрсетуге тырысасың. Шынында да өз балаңызға қарағандай көзқарас болу қажет, оларға үйретіп, айтып, қателіктерін көрсету керек. Студенттер ренжімейтіндей етіп түсіндіруге, олардан да көп нәрсе талап етілетінін жеткізуге тырысасың, – дейді «Пицца блюз» кафесінің менеджері Лариса Костарева.
Bar BQ мейрамханасының аспазшысы Елена Зеленина тәлімгерлер бәрін үйретіп, көрсетіп, егжей-тегжейлі түсіндіріп отырғанын айтады. Олардың көмегінсіз кім-кімге де қиын.
Колледж студенті Дана Жақсылықова тәжірибеден өтуге тәлімгерлердің алдына келгенде өзінің дұрыс жерге түскенін бірден түсінген.
– Маған бәрі бірден ұнады, мен бұл жерден кеткім келмеді. Кәсіби маман болу қиын емес: тәжірибелі тәлімгерлерді тыңдау керек, жалқау болма, сонда бәрі ойдағыдай болады Қазір мен бәліштер жасап жатырмын. Мен көп нәрсені үйренген кең профильді маман болғым келеді, – деген Дана тәлімгерлік жүйе оларға барлық қиындықтар мен қорқыныштарды жеңуге көмектесіп жатқанын айтады.
Жанаргүл Мұқатай
