Облыс әкімінің орынбасарлары тағайындалды

Кезекті кеңейтілген отырыста облыс әкімі Даниал АХМЕТОВ аймақ бойынша жаңа кадрлық ауыс-түйістер туралы мәлім етті, деп хабарлайды облыстық ақпараттық орталығы.
Президент Әкімшілігінің келісімі бойынша, облыс әкімінің өкімімен Шығыс Қазақстан облысы әкімінің аграрлық сектор жөніндегі орынбасары болып Көкпекті ауданының бұрынғы әкімі Дүйсенғазы Мусин тағайындалды.

Аталмыш салада тәжірибесі мол Д. Мусин Қазақ ауыл шаруашылығы институтын (1979) агроном мамандығы бойынша тәмамдаған. Еңбек жолын Жарма ауданы, Ленин атындағы колхозда агроном болып бастап, бас агроном, аудандық ауыл шаруашылығы бөлімінің меңгерушісі, «Қалбатау асыл тұқымды мал зауыты» ААҚ зауытының басқарма төрағасы, президенті қызметтерін атқарған. 2001-2009 жылдары Жарма ауданының, 2009 жылдан бүгінге дейін Көкпекті ауданы әкімі болып еңбек етті.
Ауыл шаруашылығы саласында атқарған жемісті еңбегі үшін «Қазақстан Республикасының еңбек сіңірген қайраткері» құрметті атағымен марапатталған. «Құрмет» орденінің кавалері.
Курчатов қаласының әкімі Димитрий Гариков облыс әкімінің орынбасары болып, аймақта құрылыс және тұрғын үй-коммуналдық шаруашылығы мәселелері бойынша жетекшілік ететін болды.

Д.Гариков еңбек жолын Бородулиха ауданынан бастаған. «Коммуналды шаруашылық» мемлекеттік коммуналдық көпсалалы кәсіпорын басшысы, аудандық тұрғын үй-коммуналдық шаруашылық бөлімінің меңгерушісі, аудан әкімінің орынбасары, Шығыс Қазақстан облысы жолаушы көлігі және автомобиль жолдары басқармасының бастығы қызметін атқарған. 2011-2013 жылдары Семей қаласы әкімінің орынбасары қызметінде болып, тұрғын үй-коммуналдық шаруашылығы, сумен қамтамасыз ету, құрылыс, автокөлік жолдары және байланыс жұмыстарына жетекшілік еткен. Осы уақытқа дейін Курчатов қаласының әкімі қызметін атқарды.