Мәрттігімен ауылдастарының алғысына бөленіп жүр

Тарбағатай өңіріне белгілі азамат Тілеухан Аймұханбетов 1996 жылдың маусым айында қолдағы бар малын салып қожалық құрды. Ата-бабасының аруағы қолдасын деп, қожалықтың атын «Баба Қасқақ» қойды.

Әуелі екі гектар жерге бау-бақша егумен айналысып, қай кәсіптің де өз нәсібі бар екеніне көз жеткізді. Жастайынан төрт түліктің жайын жетік меңгерген Тілеухан аға мал шаруашылығына шындап бет бұрды. Қазір қолдағы малдың басы едәуір өсіп қалды. 100 сиыр, 80 жылқы, 300-ден аса қой бар. Қазір барды қанағат тұтып отыратын уақыт емес, мал басын өсіріп, оның тұқымын асылдандыруға мән беруде.

Осыны ескерген Тілеухан ақсақал баласы Қуантай екеуі батыл қадамға тәуекел етіп, «Жұмыспен қамту-2020» бағдарламасы аясында төмен пайызбен үш млн. теңге несие алып, 22 бас қазақтың ақ бас сиырын сатып алды. Осы алған малдың барлығынан төл өргізу ойында бар.

Ендігі жерде ет әлеуетін арттыру мақсатында мал бордақылау алаңын салуды жоспарлаған болатын, міне, құрылыс та басталып кетті. Әзірге жұмыс қарқыны жаман емес, жыл соңына қарай бордақылау алаңы дайын болады. Еңбекқор жан ортаншы баласы Қуантайды осы салаға түбегейлі тартты. Әке жолын қуған баласы – бұл күнде шаруашылықтың тетігін меңгеріп жүрген білікті азамат. Шаруашылықтағы техниканың барлығын өзі жөндейді, барлығын жете меңгерген.

– Былтырға қарағанда жемшөптің мол болғаны қажет, – дейді Қуантай. – Мал басы көбейген, оның үстіне асыл тұқымды мал аса күтім қажет етеді, қазірдің өзінде 200 тонна шөп өткен жылдың қорынан қалып отыр. Жеңілдетілген жанар-жағармай жеткілікті. Шаруашылықта екі комбайн, үш трактор дайын тұр.

Қазіргі күні үш трактормен мал азығын дайындап жүрген шаруашылық жетекшісі тағы да бір қуатты трактор алуды көздеп отыр. Биылғы түсім мол болары сөзсіз, өңірде ылғал мол. Ақсақалдың шабындық жері толығымен қоршалған. Тілеухан ағаның қарауында жұмыс істейтін жігіттер де уақытпен санаспайды. Шаруа қожалығы арқылы нәпақасын айырып отырғандардың ақысын жемейді. Ауылдың дәл қасындағы өзен жағасында Тілеухан ағаның бақшасы жайқалып тұр, жеміс-жидектің барлық түрі өседі. Барлығы бала-шағаның қамы. Үйдегі апамыз екеуі – 10 бала тәрбиелеп өсірген ұлағатты жандар.

Еселі еңбек етіп жатқан ағамыз кезінде республикаға аты шыққан қырықтықшы болған. Дүрілдеп тұрған кеңес кезеңінде қой қырқудан республиканың екі дүркін чемпионы болған.

Шаруашылық жылқы тұқымын да асылдандырып жатыр. Қазір Тілеуханның қорасында ағылшын, араб, жәбе, Қостанай өңіріне танымал сәйгүліктер тұқымдары тұр. Тілеухан ағамыз саятшылықтан да құр алақан емес. Талай қансонардан қанжығасы майланып қайтқан белгілі саятшы. Осы ауладан тазының, маң төбеттің талайын көресіз.

Тілеуханның мәрттігін ауылдастары жақсы біледі. Ауылдағы қандай мерекелік шараға қол ұшын беруді парыз санайтын Тілеухан ауылдастарының алғысына бөленіп жүр. Ауылдағы тұрмысы төмен отбасыларына көмек көрсету жыл сайынғы міндеті десе болғандай. Еңбектері де елеусіз қалып жатқан жоқ. Міне, шаруасын дөңгелетіп отырған Тілеухан Аймұханбетовтің осындай еңбегі елге өнеге болмақ.