Мөлдір-облыс құрамасының мүшесі
Үржар ауданындағы Көлденең орта мектебінің 9 сыныбын бітірген Мөлдір Бейсенова қазір Өскемендегі Экономика және қаржы колледжінде 1-ші курста оқиды. Мөлдір мектеп қабырғасында-ақ спортқа бейімділігін танытып, волейболдан өткен аудандық, облыстық чемпионаттарда тамаша нәтижелер көрсеткен еді. Өз командасы сапында жүлдегер де, чемпион да болған. Қазір ол волейболдан Шығыс Қазақстан облысының 2000-2001 жылғы жасөспірімдер арасындағы құрама командасының мүшесі.
Үстіміздегі жылдың 22-28 наурыз аралығында Астана қаласында қыздар арасында волейболдан Қазақстан Республикасының көктемгі чемпионаты өтті. Барлық облыстардың командалары қатысқан бұл сайыста біздің қыздар жүлделі үшінші орынға ие болып, олжалы оралды. Бұл жеңіске үржарлық спортшы да елеулі үлес қосты. Үржар ауданының жанкүйерлері талантты жерлестері – Мөлдірді мақтан тұтады.
Бейсенғазы Ұлықбек
Үржар ауданы
