Министрлік құруды ұсынды
Президенттікке кандидат Қарақат Әбденнің Түркістан қаласының жұртшылығымен жүздесіп, өзінің сайлауалды бағдарламасын таныстырды.
Кездесуде қоғамдағы өзекті сұрақтар мен туризмді дамыту мәселелері талқыланды.
Қ.Әбден атап өткендей, тарихи-мәдени ескерткіштер мен мәдени мұра нысандары көп Түркістанның туристік әлеуеті зор.
– Түркістанның тарихи маңызын, осындағы киелі жерлердің көптігін ескере, ішімдік сатудан бас тартқан алғашқы қалалардың бірі атануына барлық мүмкіндік бар, – деді ол.
Сондай-ақ Қ.Әбден отбасы және демография министрлігін құруды ұсынды. Кандидат атап өткендей, қазір отбасы мәселесі түрлі ведомстволардың арасында шашырап жүр.
– Отбасы және демография мәселелерімен айналысып жүрген ведомстволардың арасында өзара байланыс жоқ. Отбасы институтын бұлайша қолдау мүмкін емес. Бізге ең алдымен отбасы, оның тұтастығы, бақытты болуы маңызды, – деді кандидат.
Үміткер халық санының өсуі мен берік отбасы – кез келген ел ұмтылатын басты мақсат екенін айтты.