MakerSpace – жаңалықтар алаңына айналады
Өскемендегі А.Пушкин атындағы облыстық кітапханада MakerSpace шығармашылық алаңы ашылды. Облыстық кітапхана мен Қазақстандағы АҚШ елшілігінің бірлескен жобасы аясында ашылған шығармашылық алаңның ашылу салтанатына АҚШ елшісінің баспасөз, мәдениет және білім мәселелері бойынша кеңесшісі Энтони Пахигян қатысты.
Ұйымдастырушылардың айтуынша, MakerSpace жобасы мемлекет басшысының таяуда халыққа арнаған «Қазақстанның үшінші жаңғыруы: жаһандық бәсекеге қабілеттілік» Жолдауында айтылған ІТ білімнің қалыптасуына, 3D-принтинг сияқты перспективті салалар мен \”Цифрлы Қазақстан\” бағдарламасының жүзеге асуына ықпал ететін көрінеді. Мұны өз сөзінде облыстық мәдениет, мұрағаттар және құжаттама басқармасы басшысының орынбасары Раушан Қаппасқызы да ерекше атап айтты.
Кітапхананың жаңадан ашылған MakerSpace алаңына келушілер енді үш өлшемді принтер мен сканер, заманауи компьютер-моноблоктар, 3D-қалам жинағы мен түрлі инженерлік жинақтарды пайдаланып, шығармашылықпен айналыса алады. Сонымен қатар, мұнда кез келген пайдаланушы кинестетикалық құм, түрлі-түсті қамыр және басқа да шығармашылық материалдармен жұмыс істеп эстетикалық әсер алса, екінші жағынан 3D-принтер, робот құру негіздерін үйреніп, физика мен электроника саласында өз қабілеттерін ұштайды.
Мейкерлер қозғалысының негізі – тәлімгерлік. Қазіргі күні кітапханада менторлар командасы (тәлімгерлер, тренерлер) жасақталған. Олар шығармашылық алаңына келушілерге кеңестер мен нұсқаулар береді, заманауи құралдар мен қызметтің жаңа түрлерін игеруге әрдайым көмектеседі. Сондай-ақ, кітапхананың MakerSpace алаңында алдағы уақытта баршаға арналған үйірмелер, экспресс-курстар, шеберлік-кластары, көрмелер мен шығармашылық кездесулер өткізу де жоспарланып отыр. Осы жобаның үйлестірушісі Әйгерім Тілеуханова MakerSpace – бұл жаңалықтарды есту үшін емес, сол жаңалықтардың себепшісі болуға ықпал ету үшін құрылған орталық екенін айтады. Бір атап айтарлығы, орталықта бәрі тегін. Жаны жаңалыққа құмар жастар бұл жерде бәрін тегін үйреніп, керемет жетістікке жете алады.
Мейрамтай Иманғали
