Қымбатшылық, қайда барасың?
Елімізде азық-түлік, сүт өнімдері, көкөніс, сұйық май, киім-кешек, әсіресе жаңа туған нәрестелердің жөргегі мен киімдері, кеңсе тауарлары, жуғыш заттардың бағасы ай сайын аспандап, халықтың құтын қашырып тұр. Басқасын былай қойғанда, елімізде ұн бағасы биыл 45 пайызға қымбаттады.
Сарапшылардың айтуынша, ұн бағасының мұндай рекордтық көрсеткішке көтерілуі осыдан он жыл бұрын болған екен. Жоғары сұрыпты бидай ұнының бөлшек саудадағы бағасы өткен қазан айында (бір келісі үшін) 369 теңге, бірінші сұрыпты ұн бағасы 245 теңге болған. Жоғары сұрыпты ұн бағасы Астанада 447 теңге болған. Сарапшылардың пікірінше, ең арзан ұн Семейде, Павлодарда көрінеді. Біздің Өскеменде де жоғары сұрыпты ұнның бағасы елордадағыдай болып тұр. Тіпті Өскемендегі бағалар ірі мегаполис Астанадан асып түспесе, кем түспейді. Облыс орталығының тұрғындары Өскеменде азық-түлікпен қатар күнделікті тұтынатын тауарлар, киім-кешек бағалары да Астананың бағасымен бірдей екендігін айтады.
- Жалақымыз алты жылдан бері өскен жоқ. Алатын еңбекақымыз 170 мың теңге. Киім дүкенінде сатушы болып істеймін. Бұл еңбекақым осыдан екі -үш жыл бұрын әжептәуір ақша болатын. Қазір түкке жетпей қалды. Жаңа жылдан соң зейнетақы, жәрдемақылардың өсуімен бірге азық-түліктен бастап бәрі қымбаттағанның үстіне қымбаттайды. Бұрын әйтеуір, арзан әрі тоқ тамақ деп нан өнімдерін көп алушы едік. Қазір ұннан жасалған тағамның бәрі қымбаттап кетті, – дейді Шынар есімді өскемендік тұрғын.
Иә, студент біздерге де қымбатшылық алқымнан алып тұр. Бұрын азық-түлік дүкеніне кіргенде бір мың теңгеге екі-үш зат алушы едім, қазір оған жарты келі печенье мен бір нан ғана ала аласың. Азын-аулақ азық-түлікке үш-төрт мың теңге кеткенін естіп, сатушы қате есептеп қойды ма екен деп қайта санатып шықсаң да, бәрібір сол баға болады.
Бұрынғы өзімнің бала кезімдегі 80-90 теңгелік балмұздақтың бағасы қазір 400-500 теңгеге жетті. Екі жыл бұрын бір литр айран 300 теңге болғанда уайымдап қалып едік, енді сөрелерде 700 теңге болып самсап тұр. Қымбатшылық, қайда барасың?
Алина Уалханова, студент
