Күршімнің барысы анықталды

Күршімдегі спорт кешенінде қазақ күресінен «Қазақстан барысы» республикалық турниріне қатысуға жол ашатын іріктеу сайысы мәреге жетті. Бәсекеде аудан көлеміндегі айтулы жарыстарда топ жарып жүрген білекті жастар бақ сынасты.
Жарысты «Нұр Отан» партиясы Күршім аудандық филиалы төрағасының бірінші орынбасары Б.Нұрымова ашып, жас спортшыларға сәттілік тіледі. Бұдан соң денешынықтыру және спорт бөлімінің басшысы Қ.Бақтияров пен білім бөлімінің әдіскері Н.Жанбосынов балуандарға құттықтау тілектерін арнап, шынайы ықыластарын білдірді.
Ересектер арасындағы барын сала айқасып, табан тірей тартысқан айтулы сайыстың қорытындысында 90 келі салмақ дәрежесіндегі бар қарсыласын даусыз еңсерген Думан Нұрмышев бас жүлдені иеленіп, «Түйе балуан» атағын жеңіп алды. Ақбұлақтық Бауыржан Нұғымановтың мерейі екінші орынды алып өсті десек, күршімдік Айбек Сейітбеков қанжығасына үшінші орынның жүлдесін байлады.
Сайыста жеңімпаз атанған жастар аудан әкімінің және «Нұр Отан» партиясы Күршім аудандық филиалының Құрмет грамоталарымен және ақшалай сыйлықтарымен марапатталды.
Ересектер арасында өткен аудандық «Қазақ барысы» іріктеу сайысының жеңімпазы Думан Нұрмышев 9-10 сәуір аралығында Семей қаласында ту көтеретін облыстық іріктеу турнирінде аудан намысын қорғайтын болады.

Хасен Зәкәрия
Күршім ауданы.