Көпір құрылысы кептеліс туғызбауы тиіс

Кеше аймақ басшысы Даниал АХМЕТОВ облыс орталығындағы ірі сауда кешендерінің «Қазақстанда жасалған» акциясына атсалысу барысын тексеріп, Ертіс көпірін қайта жарақтау құрылысымен танысты.
Бажов көшесіндегі «АДК», Әуезов даңғылындағы «Колос», Өтепов көшесіндегі «Багратион» сауда орталықтарына бас сұққан облыс басшысы сөрелердегі тауар мен азық-түліктің сапасы мен бағасына, отандық және жергілікті құрамның үлесіне назар аударды.
«АДК» сауда орталығының азық-түлік бөлімін аралаған аймақ басшысы мұндағы тауардың негізгі бөлігі жергілікті өнім екеніне баса назар аударды. Ал нан мен ет өнімдері, түрлі салаттар мен тіскебасарлар сауда орталығының өз цехында дайындалады. Сондықтан кешендегі аспазхана қалалықтар жиі тамақтанатын орынға айналған. Алдағы уақытта ет өнімдерінің түрін көбейту жоспарлануда. Сауда орталығының басшылығы облыс әкімінен жергілікті сапалы ет өндірушілермен байланыс орнатуға көмектесуді өтінді.
-Біздің облыста қазақтың ақбас сиыры, герефорд, блэк ангус сынды асыл тұқымды мал етін өндіруші шаруашылық құрылымдары бар. Сондықтан мәрмәр етті сырттан іздеудің қажеті жоқ. Бұл бағытта сізге жақсы ұсыныстар тізімін беруге болады, – деген аймақ басшысы сөредегі Ресейдің қатты ірімшіктерін «Е.Зайтенов» шаруа қожалығының өнімдерімен алмастыруды ұсынды.
Ал «Колос» супермаркетінің басшысы Зоя Асинцеваға семейлік «Kondiz» ЖШС-мен байланыс орнатуды ұсынған облыс басшысы аталмыш кәсіпорынның печенье өнімдері өте сапалы деген пікірін айтты. Айлық тауар айналымы 30 млн. теңгеге жететін супермаркет тауарларының 70 пайызы Қазақстанда жасалған. Облыс басшысы супермаркет басшысына «Қазақстанда жасалған» стеллаждарын көрнекі етіп рәсімдеуді тапсырды.
Дәл осындай ескерту «Багратион» сауда үйінің өкілдеріне де айтылды. Сондай-ақ, облыс басшысы сауда нүктесінің басшылығын сатып алушыны тауарға жақындатудың соны тәсілдерін ойластыруға шақырды. Марал етінен бастап өзге де ауыл шаруашылық өнімдерін сататын сауда үйінің айлық тауар айналымы әзірге алты млн. теңгенің шамасында.
Облыс басшысы Ертіс арқылы өтетін көпірді жөндеу жұмыстарымен де танысты. Құрылысшылар көпірге жалғанатын жаңа бөлік төселіп бітуге жақын екенін, ескі бөлікті жөндеу үшін ондағы қозғалысты тоқтатып, көлік ағынын жаңа бөлікке ауыстыруды жоспарлап отырғандарын жеткізді. Аймақ басшысы мұндай тәсіл құрылысшыларға қолайлы болғанымен, тұрғындар үшін кептелістер арқылы қиындық туғызатынын айта келе, жобаны қайта қарап, халыққа да қолайлы жолын ойластыруды тапсырды.
– Құрылыс жобасын ойластырған кезде ең әуелі халыққа қолайсыздық туғызбау жағын ойлау керек. Ал сіздер ұсынып отырған жоба ертеңгі күні көлік кептелісін бірнеше шақырымға созатыны анық. Сондықтан жобаны қайта қарау керек. Бұл мәселеге қала басшылығы тікелей араласуы тиіс, – деді аймақ басшысы.

Есімжан Нақтыбайұлы