Қос азаматтығы үшін жауапқа тартылды
Биылғы қараша айында көші-қон қызметкерлері Риддер қаласының 21 жастағы тұрғыны 2020 жылдың шілдесінде Ресей азаматтығын алғанын, алайда ол туралы тиісті орындарға мәлімдемегенін және Қазақстан азаматтығын жоғалтуды уақтылы рәсімдемегенін анықтады.
Қазақстан заңнамасы бойынша кез келген басқа елдің азаматтығын алған адам күнтізбелік 30 күн ішінде қазақстандық үлгідегі төлқұжат пен жеке куәлікті тапсыруға және азаматтығынан айырылғанын тіркеуге міндетті.
Алайда еліміздің кейбір тұрғындары басқа мемлекеттің азаматтары бола тұра Қазақстанға еркін кіріп, тұру үшін қазақстандық құжаттарды пайдаланады. Құқық қорғау органдары мамандарының айтуынша, азаматтар Қазақстанның әлеуметтік, зейнетақы және басқа да жеңілдіктерін пайдалану үшін азаматтығын ауыстырғаны туралы хабарлауға асықпайды екен.
– Жыл басынан бері облыстық полиция департаменті 50-ден астам «қос азаматтық» фактісін анықтады. Сот шешімі бойынша құқық бұзушы риддерлік азамат ӘҚБК-ның 496-бабы 2-бөлігі бойынша әкімшілік жауапкершілікке тартылып, 200 АЕК көлемінде айыппұл төледі. Қазақстан азаматының төлқұжаты тәркіленіп, ол Қазақстан азаматтығынан айрылды, – деді облыстық полиция департаменті көші-қон қызметі басқармасы бастығының міндетін уақытша атқарушы Ринат Шкибаев.
Көші-қон қызметі Ата Заңымызға сәйкес Қазақстан азаматы басқа мемлекеттің азаматы болып саналмайтынын ескертеді.
Кәмал Естай
