Көптің өтінішіне құлақ асты
Президенттікке Жалпыұлттық социал-демократиялық партиясы атынан үміткер Нұрлан Әуесбаев Ақтөбе қаласында және Ақмола облысының Ақмол ауылында болды.
Ақтөбенің Жаңақоныс-4 және Батыс-2 тұрғын аудандарында инфрақұрылым мәселесі бар. Мәселен, Жаңақоныс-4 тұрғын үй алабының жұртшылығы газдың берілуін күтіп жүр. Тұрғындар жолдың нашарлығына да арыздануда.
Халықпен жүздесуде ЖСДП үміткері өз бағдарламасында қазақстандықтардың өмір сапасы стандартын енгізуді көздейтінін атап өтті. Түрлі деңгейдегі әлеуметтік қолдаудың желісін құруға ниетті екенін білдірді. Тұрғындарды өзіне және өзінің әлеуметтік теңдік бағдарламасына дауыс беруге шақырды.
Нұрлан Әуесбаев Ақмол ауылының тұрғындарын сайлауалды бағдарламасымен таныстырды. Мемлекет алдында тұрған басты мәселе жемқорлықпен күрес екенін атап өтті. Ол үшін алдымен саяси реформаларды іске асырып, Мәжіліс рөлін күшейту керек.
ЖСДП-дан үміткер сайлауалды бағдарламасында әлеуметтік саясатқа ерекше көңіл бөлінгенін атады. Медицина және білім беру салаларына ЖІӨ-ден жылына ең кемі 5-7%-ды бөлуді ұсынды. Бұл аталған салалардың дамуына септігін тигізеді.
