Көрпе құрау техникасын үйретті
Отбасылық бақыттың кілті неде? Отбасылық құндылық дегенді қалай түсінесіз? Өскемендегі Достық үйі– Қоғамдық келісім орталығында жас қыз-келіншектерге арналған шеберлік сабағы өтті.
Іс-шара барысында отбасылық өмірде тәжірибесі бар, үлкен де тату отбасының ұйытқысы болып отырған әйел-аналар өздерінің құпияларымен бөлісті. Олар жас қыз-келіншектерге қонақты күту, дастархан жасау, ыдыс-аяқтарды дұрыс ұстау туралы кеңестерін ортаға салды. Тіпті келіндерге орамалды қалай тағып, әртүрлі киімдермен әдемі етіп қалай үйлестіруге болатыны туралы да айтты. Сонымен қатар қолы алтын шеберлер жас қыз-келіншектерге құрақ көрпені құрау техникасын үйретті. Жалпы, құрақ көрпе – үй интерьеріне керемет жайлылық сыйлап қана қоймай, үйдің ішін ұлттық нақыштағы эксклюзивті бұйымдармен байыта түседі.
- Отбасылық өмірде менің үлкен тәжірибем бар. Бүгін қыз-келіншектерге кеңес беріп, оларға жаңа нәрсе үйреткеніме қуаныштымын. Ата-бабаларымыздан қалған салт-дәстүріміз ұрпақтан-ұрпаққа берілуі тиіс, – дейді «Ақ ниет» вокалдық ансамблінің жетекшісі Гүлшат Смағұлова.
Облыстық Достық үйі – Қоғамдық келісім орталығы баспасөз қызметінің жетекшісі Айзада Бибулова кез келген өркениетті қоғам үшін мұндай шаралардың өте қажет екенін, мұндай кездесулер ұрпақтар сабақтастығына жол ашатынын айтады.
Мейрам Екпін