Кодекстің жобасын таныстырды
Облысымызға жұмыс сапарымен келген еңбек және халықты әлеуметтік қорғау бірінші вице-министрі Ақмәди Сарбасов Глубокое ауданына барып, ондағы еңбек ұжымдарымен және аудан активімен кездесті. Кездесу барысында министрлік өкілі жиналғандарға Мемлекет басшысының биылғы Жолдауында айтылған тапсырмаларды іске асыру барысы және Әлеуметтік кодекс жобасы туралы айтып берді.
Айта кетейік, бүгінде облысымызда Президент Жолдауының еңбек және халықты әлеуметтік қорғау саласына қатысты негізгі бағыттарын, сондай-ақ Әлеуметтік кодекс жобасының нормаларын түсіндіру мақсатында арнайы мобильді топ жұмыс жүргізуде. Ауданға ат басын тіреген бірінші вице-министр Алтай кентіндегі «Шығыстүстімет» ЖШС «Ертіс кенішінің» еңбек ұжымымен кездесіп, жұмысшыларды толғандырған сұрақтарға жауап берді.
– Кеншілердің жұмысы өте ауыр екенін білеміз. Осыны ескере отырып, біз әрбір маманға Әлеуметтік кодексте азаматтарды әлеуметтік тұрғыдан қолдаудың қандай іс-шаралары заңнамалық деңгейде бекітілетінін, түрлі тәуекелдер туындаған жағдайда мемлекет тарапынан нендей көмек көрсетілетінін жеткізгіміз келді. Бұл ретте, елімізде біртіндеп азаматтардың жекелеген осал санаттарын қолдаудан қазақстандық отбасын нығайтудың базалық жағдайларын жасауға көшу үдерісі жүретінін айтқым келеді. Бүгінгі сапарымыздың негізгі мақсаты да – осы, – деді А.Сарбасов.
Бұдан кейін бірінші вице-министр бастаған делегация мүшелері кеніштің жұмысымен танысып, оқу полигонын да көріп қайтты.
Артынша Глубокое кентінде аудандық мәслихат депутаттарының, мемлекеттік органдар басшыларының, жастар мен үкіметтік емес ұйымдар өкілдерінің, ардагерлер мен көпбалалы аналардың қатысуымен алқалы жиын өтті. Жиын барысында Ақмади Сарбасов халықты әлеуметтік тұрғыдан қорғау іс-шараларын күшейту туралы егжей-тегжейлі айтып, тұрғындарды қызықтырған сұрақтарға жауап берді.
Сәрсен Қабылым
