Кеше облыс әкімдігі, «Қаражыра» АҚ мен өңірдегі көмір қоймалары иелерінің арасында жылыту маусымы аяқталғанға дейін көмір бағасын көтермеу жөніндегі меморандумға қол қойылды.

Облыс әкімінің орынбасары Серік Ақтановтың айтуынша, бүгінде өңір халқының 88 пайызы қара отынмен қамтамасыз етілген. Еліміздің үш өңірінде бұл көрсеткіш 60 пайызды ғана құрайды.

– Облысты көмірмен қамтамасыз етіп отырған негізгі кәсіпорын «Қаражыра» АҚ. Кәсіпорынның көмірі Өскемен қаласында «ВЭУС» ЖШС, Семей қаласында «Жігер» ЖШС теміржол тұйықтарына жеткізіледі. Бүгін қол қойылған меморандум бойынша, аталмыш кәсіпорындар жылыту маусымы аяқталғанша көмірдің бағасын көтермеуге міндеттелді,-деді облыс әкімінің орынбасары.

Өз кезегінде облыс әкімдігі қоймаларда сатылатын көмір бағасының көтерілмеуін, ауыл тұрғындарына да осы бағамен жеткізілуін қадағалайды. Сондай-ақ көмір жеткізушілердің де бағаны негізсіз көтеруіне тосқауыл қоймақ.

«Қаражыра» АҚ бас директоры Марғұлан Макишевтің айтуынша, облысқа жоспарлы 851 мың тонна көмірдің орнына биыл 955 мың тонна жеткізілген. Демек, 104 мың тоннаға артық.

– Көмір соның өзінде жетпей жатыр. Оның себебі, «Қазақстан теміржолы» АҚ көмірге жеткіліксіз вагон бөлген. Сұралған 412 вагонның орнына 330 вагон ғана берілген. Ал кен орнында көмір жоқ емес, бар. Өндірілген көмірдің тек 10 пайызы экспортқа шығарылады. «Қазақстан теміржолы» АҚ осы аптада ғана вагон санын 420-ға жеткізді,-дейді кәсіпорын басшысы.

Сондай-ақ кәсіпорын басшысы жыл сайын өңірде көмір өндіру көлемі артып келе жатқандығын атап өтті. Кен орнында 2016 жылы 6 миллион, өткен жылы 7 миллион тонна көмір өндірілген. Биыл бұл көрсеткіш 8 миллион тоннаға жеткен.

– Көмір сапасының төмендеуіне көрсеткіштің артуы әсер етіп отыр. Алайда, біз сапасыз көмірді қайтарып алудан бас тартпаймыз,-деді М.Макишев.

Лаура Тілеубайқызы