Көмір бағасы көтерілетін болды

Семейде Табиғи монополияларды реттеу агенттігінің Шығыс Қазақстан облысы бойынша департаментінің директоры Қайрат Оразбаевтың қатысуымен тұрғын үй-коммуналды шаруашылық, қысқа дайындық мәселелеріне орай жиын өтті.

Жиында «Қаражыра» көмір кенішіндегі көмір бағасының қымбаттауына орай, Семейде жылу төлемақысы 5-7 пайызға өсетіні мәлім болды. Қайрат Оразбаев бұл қадамға еріксіз барып отырғандарын айтты.

– Мұны халықтың қалтасы көтере алады, себебі, соңғы жылдары Семейдің әлеуметтік әл-ауқаты біршама түзелді. Бүгінде бұл қала экономикалық және әлеуметтік даму жағынан еліміздегі алдыңғы саптағы шаһарлардың тізіміне еніп отыр. Жылу бағасының қымбаттауы семейліктер үшін ауыр соқпауға тиіс, – деді ол. Департамент директоры сондай-ақ, коммуналдық сала қызметкерлерінің жалақысы аздығын, маман тапшылығын, қызметкерлердің көбі зейнет жасында екенін сөз етті.

Кездесу соңында “Терможаңғырту” бағдарламасына тоқталып, барлық проблемалар алдағы уақытта шешілетініне сенім білдірді.