Кішкентай әлемнің құпиялары

Шығыс Қазақстан Өнер музейінің кіші залында Ренат Мансуровтың «Кішкентай әлемнің құпиялары» атты  жеке фотокөрмесі ашылды. Автор бұл көрмесінде Шығыс Қазақстанның флорасы мен фаунасын макрофотография техникасында  ұсынды.

Мейрамтай ИМАНҒАЛИ

Кейде біз аяғымыздың астында кішкентай әлем бар екеніне мән бере  бермейміз. Жыбырлаған жәндіктердің де өз тіршілігі бар. Бұл көрмеден көбелек, қоңыз бен аралардың, шыбындардың «портреттерін» тамашалауға болады. Фотограф Ренат Мансұров кішкентай әлемнің құпиясын, беймәлім тұстарын көрерменге ерекше бір сүйіспеншілікпен ұсыныпты. Тегінде кішкентай әлемнің құпияға толы тіршілігін таспаға түсіру үшін де үлкен жүрек керек шығар. 

Өскемен қаласының тұрғыны  Ренат Раисұлы Мансуров –  жиырма жылдық тәжірибесі бар кәсіби фотограф.  Ол фотоөнер саласындағы халықаралық деңгейдегі беделді атақтардың иегері.  Еуразиялық көркемсурет одағының және Қазақстанның кәсіби фотографтар қауымдастығының мүшесі.  MIFA халықаралық фото-сыйлығының лауреаты.  2012 жылы Р.Мансуров Астанада өткен «Жаңа мыңжылдықтың астанасы»  атты халықаралық фото суретшілер кездесуі мен көрмесіне қатысып, лауреат атаныпты.

– Бұл менің алғашқы жеке көрмем. Мұнда мен соңғы жұмыстарымды көрермен назарына ұсындым. Макроәлем – менің жанымның қалауы.  Ешқандай да коммерциялық жоба емес. Жәй ғана өзім көрген сұлулықты, таңғажайып әлемді өзгелермен бөліскім келді, – дейді фотографтың өзі.

Көрмеге қойылған картиналардың ішінде тек  жәндіктердің «портреті» ғана емес, өсімдіктердің де суреті бар. Мысалы, қарапайым ғана дала гүлдерінің өзі  адамға керемет бір қуаныш сыйлайды. Ең бастысы, осыншама сұлулықты тамашалау үшін алысқа сапар шегудің мүлдем қажеті жоқ. Мұның бәрі өзіміздің туған өлкеміздің туындылары.

Макрофото –  бұл ешқандай да жаңалық емес. Бірақ бұл тақырыптағы фотокөрме Шығыс Қазақстанда алғаш рет өтіп отырғанын атап айтқанымыз жөн. 

Ренат Раисұлы бұл өнерге қызығушылық білдірушілерді қолдауға, өз тәжірибесімен бөлісуге әрдайым дайын. Ол YouTub арнасында  «Фото кітап» каналын тұрақты жүргізеді. Оның фотосурет өнері туралы жарияланымдары отандық, ресейлік журналдарға жиі басылады.

Көрменің вернисажында автор өзінің шығармашылық жоспарлары мен макроәлемдегі «Фотоаңшылық» ерекшеліктері туралы әңгімеледі. Басқосу, әсіресе, әуесқойлар мен фотоөнер мамандары үшін  өте қызықты болды.

Ренат Мансуровтың «Кішкентай әлемнің құпиялары» көрмесін  24 қарашаға дейін тамашалауға болады.