Жазғы демалысыңды қалай өткізесің?
Қас қағым сәтте жаз да келіп жетті. Жаз – балалар асыға күтетін мезгіл. Жаз басталысымен оқушы қауымның арманына арқау болатын демалыс орындары да есіктерін айқара ашады. Біз оларға «Жазғы демалысты қалай өткізесің?» деген сауал қойдық.
Өскемендегі №47 мектептің 2-сынып оқушысы Темірлан Үйданов:
– Жазғы демалыста өзімнің сүйікті спортым – каратэдан жаттығуға барамын. Каратэмен шұғылданғанды жақсы көремін. Ауылдағы ата-апама барып, демалысты қызықты өткіземін.
Қасым Қайсенов кентіндегі Р.Мәрсеков атындағы орта мектебінің 5- сынып оқушысы Зере Қайымжанова:
– Жаз – сүйікті жыл мезгілім. Жазда отбасымызбен демалыс орындарына барғанды ұнатамыз. Жүзуді, күнге қыздырынғанды жақсы көремін. Демалыстан бөлек, ағылшын тілі сабағына барып, білімімді толықтырамын.
Өскемен қаласындағы №16 орта мектебінің 4-сынып оқушысы Әлихан Арнұрұлы:
– Осы жазда достарыммен велосипед теуіп, аулада ойнаймын. Сабағымды қайталап, кітап оқимын. Өзімді дамыту үшін түрлі үйірмелерге барғым келеді.
Катонқарағай ауылындағы қазақ орта мектебінің 7-сынып оқушысы Арна Нұрғабденова:
– Жаз ең ұзақ та қызықты демалыс уақыты. Жазда ата-анаммен бірге теңізге демалуға барғанды ұнатамын, онда жылы суға түсіп, волейбол, футбол ойнаймын, ролик теуіп, көңіл көтеремін. Осы жаз көңілді өтеріне сенімім мол.
Облыстық мамандандырылған IT мектеп-лицейінің 3-сынып оқушысы Талант Оразаев:
– Отбасымызбен осы жылы жағажайларда, тауда демаламыз. Қаланың шулы күнделікті тұрмысынан тынығып, жаңа оқу жылына үлкен дайындықпен келемін. Сондай-ақ достарыммен жазғы лагерьге баруды жоспарлап отырмыз.
Глубокое кентіндегі О.Бөкей атындағы қазақ орта мектебінің 3-сынып оқушысы Жәмила Қадыр:
– Жазғы демалысымды ауылда өткіземін. Серуендеп, велосипед теуіп, ауыл маңындағы суға, жазғы лагерьге барамын. Жаз соңында Алматыдағы туысқандарыма қонақтап барамын. Осы жаз керемет өтеріне сенемін!
Зайсан қаласындағы Х.Мұстафина атындағы мектеп-лицейінің түлегі Зере Рауанова:
– Осы жаз маған көп өзгеріс алып келді. Мектеп бітіріп, үлкен өмірге аяқ баспақпын. ҰБТ-ны ойдағыдай тапсырып, грант ұтып алу – арманым. Мектептегі соңғы жылымызда сыныптастарымызбен бірге саяхаттауды жоспарлап отырмыз. Одан кейін жаңа оқу жылына жаңа арманмен, жаңаша көзқараспен қадам басамыз.
Дайындаған – Әнел Абзалбекова
