\”Izoterm\” бұйымдары сұранысқа ие
Глубокое ауданының әкімі Қалихан Байғонысов бізге телефон шалып, еліміздегі құрылыс ғимараттарына аса сапалы, бір өзі бірнеше кірпіш орнына жүретін минерал мақтадан жасалған материалдарды жасайтын «IZOTERM» серіктестігінің жұмысымен танысуға шақырды. Аудан басшысының сөз ауанынан аңғарғанымыз, елімізде мұндай аса сапалы отандық өнімдерді шығаратын кәсіпорын жоққа тән екен.
Бізді кәсіпорынның бас директоры Андрей Черепанов пен техникалық директор Александр Кушкарев қарсы алды. Аумағы атшаптырым алып зауыттың ішіне ендік. Бір кездері бұл жерде Ертіс мыс балқыту зауыты болған. Он шақты жыл бұрын ол жабылып қалған соң аталмыш кәсіпорын басшылары зауыт ғимараты мен
Ұлан ауданының Қасым Қайсенов кенті маңындағы ондаған гектар жерді сатып алған. Ал ол жерде мақта бұйымдары зауытына аса қажет габрадиабас тасы өндіріліп, одан тиісті шикізат алуға болады екен. Кәсіпорын басшылары «IZOTERM» материалын жасау күрделі екенін, оған финол-смола, даламид, кокс қажет екені, сонда ғана өз өнімдерінің сапалы болатынын айтты.
-Алдағы тамызда зауытқа 10 жыл толады. Қазір бізде 320 адам жұмыс істейді. Шынын айту керек, жұмыс оңай емес, оған екінің бірі шыдай бермейді. Жалақылары жақсы. Отандық өнімге деген сұраныс керемет, тапсырыс бірнеше ай бұрын түседі, сондықтан өнімді қайда жібереміз деп бас қатырмаймыз. Финол-смоланы Ресейдің төменгі Тагиль қаласындағы «Уралхимпласт» компаниясынан, ал коксты көрші Алтай өлкесіндегі Заринск қаласындағы «Полиос» фирмасынан, ал орайтын пленкаларды Новосібір қаласындағы «Астро» кәсіпорнынан және Өскемендегі кәсіпорыннан аламыз,-деді кәсіпорынның бас директоры А.Черепанов.
-Сіздердің кәсіпорын шығаратын мақталарға сұраныс күшті екенінен хабардармыз. Бұл материалдар құрылыс ғимараттарын салуға ғана қолданыла ма?
-Тек тұрғын үй құрылысы емес, минерал-мақта бұйымдары кәсіпорындар мен басқа да құрылысқа таптырмайтын материал. Бағасы да қымбат емес, мәселен, бір шаршы метр материал 500 теңге тұрады. Көлденеңі 5 сантиметр болатын мақта екі кірпішті ауыстыра алады. Кәсіпорын көлденеңі 5-20 сантиметр болатын материалдарды шығарып жатыр. 20 сантиметрді екіге көбейтсеңіз, бір өзі сегіз кірпішті алмастыра алады деген сөз. Бұл өнімдерді ғимараттың іші мен сыртына да пайдаланады. Экологиялық таза, жылы әрі сапалы өнімдер шығару көлемін алдағы уақытта ұлғайтсақ деген ой бар,-дейді техникалық директор Александар Кушкарев.
Атқарылып жатқан жұмыстар пультпен басқарылады. Дәл ортада алып пеш тұр. Бір жарым мың градус ыстықта балқитын габрадиабас тасы ұнтақталған соң оған кокс араластырылып, финол-смола қосылады екен. Жұмысшылар өз ісіне жауапкершілікпен қарайды. Ал дайын өнімдер арнайы қоймада сақталып, сосын Қазақстанның барлық өңірлеріне теміржол арқылы жөнелтіледі. Айына 20-25 мың тонна бұйым шығаратын кәсіпорын алдағы уақытта өз қуатын арттыруды көздеп отыр. Себебі белгілі, сапалы бұйымдарға деген сұраныс күн сайын артып келеді.
Оңдасын Елубай
Глубокое ауданы.
