ИНВЕСТИЦИЯЛЫҚ ЖОБАЛАРДЫ ИГЕРУДЕ КӨШ БАСТАП КЕЛЕМІЗ

Кеше Өскеменге Премьер-Министрдің орынбасары – Индустрия және жаңа технологиялар министрі Әсет ИСЕКЕШЕВ жұмыс сапармен келіп, облыс Әкімі Бердібек САПАРБАЕВПЕН бірге бірқатар кәсіпорындарды аралап көрді.

Жаңа кәсіпорын ішкі сұранысты толық қамтиды

Алдымен облыс орталығында ресейлік «АВТОВАЗ» ААҚ-мен серіктестік негізінде салынып жатқан «Азия Авто Қазақстан» АҚ-ның толық циклді автомобиль құрастыру зауытының және автокомпоненттер өндіретін технопарктің құрылысымен танысты. Еліміздегі ең ірі көлік кластерінің бірінен саналатын бұл жоба республика аумағындағы толық циклді автомобильдерді өндіру бойынша тұңғыш ресейлік-қазақстандық бірлескен кәсіпорын және ресейлік-қазақстандық табысты кооперацияның мысалы болып табылады.
«БИПЭК авто» компаниялар тобының директорлар кеңесінің төрағасы Анатолий Балушкиннің айтуынша, кластердің іске қосылуымен аймақта жаңадан қосымша жұмыс орындары ашылып, қазынаға қомақты қаржы түспек.
– Бір апта бұрын ғана бас жоспарға қол қойдық. Қазір карьерді рәсімдеу бойынша жұмыстар атқарылуда. Алдағы уақытта темірбетонды комбинат салу жоспарда бар. Өндіріс құрылысына екі мыңға тарта адам тартылады. Бұған қоса зауыт іске қосылғанда көліктерді дәнекерлеу, бояу және құрастыру қуаттылықтарына 4 мың адам тартылса, қосымша 8 мың адам аралас кәсіпорындарға алынады, – деген Анатолий Балушкин жаңа кәсіпорын жылына 150 мыңға дейін автомобиль құрастырып шығаруға қуатты екенін жеткізді.
Бұл жобаның жалпы құны 74,5 млрд. теңгені құрап отыр. Оның 14,5 млрд. теңгесі меншік қаражат болса, қалған сомасы қаржылық институттардан несиеге алған. Нысанды қолданысқа беру мерзімі келесі жылға жоспарланған.
– Кейінгі уақытта елімізде автоөнеркәсіп қарқынды даму үстінде. Республика аумағында екі кластер құрылған. Олар: Шығыс Қазақстан және Қостанай облыстарындағы машина құрастыру зауыттары. Өскемендегі жаңа кәсіпорынның жылдық қуаты 150 мың көлік шығаруға әлеуетті. Бұл жоба негізінен жекеменшік қаражат есебінен орындалады. Ал Үкімет болашақ зауыттың бүкіл инфрақұрылымын жүргізу, ұзақ мерзімді несие беру жағынан көмектеседі. Сонымен қоса кадрларды даярлауға және өнімдерді экспортқа шығаруға мемлекет қолдау көрсетеді, – деп нақтылаған Премьер-Министрдің орынбасары Әсет ИСЕКЕШЕВ алда тұрған міндеттерді де айтып өтті.
Оның пікірінше, ендігі міндет – екінші бесжылдыққа межеленген істерді мықтап қолға алу. Мұнда Президент тапсырмасына сәйкес, басым бағыттарға ие санаулы салаларға ерекше көңіл бөлініп, мемлекеттік қолдау көрсетіледі. Мәселен, машинақұрастыру (автоөндіріс, электр қондырғылар), тау-кен металлургия кешені, туризм, азық-түлік өндірісі салаларының тынысы ашыла түспек.
Келесі міндет – инвесторлармен қарым-қатынасты белсендіру. Бүгінгі күні біздің облыста индустрияландыру бағдарламасы шеңберінде бес шетелдік компания қызметтерін жүргізуде. Олардың ішінде «Азия Авто Қазақстан» жобасына қатысушы алпауыт «Рено-Ниссан» компаниясын, сондай-ақ, металлургия саласындағы әлемдік көшбасшылардың бірі – кореялық «Posco» мен геологиялық барлау жұмыстарына маманданған «Рио Тинто» концернін ерекше атап өткен абзал. Аталмыш ірі кәсіпорындар іске жергілікті шағын және орта бизнес өкілдерін тартып, олардың өсіп-өркендеуіне барынша оң ықпалын тигізеді.
Экспорт демекші, мамандардың есебіне қарағанда кәсіпорын жұмысының алғашқы жеті жылында өндіру көлемі 500 мың автомобильді құрайды деп күтілуде. Шығарылатын көліктердің жартысынан көбісі Ресейдің Сібір, Қиыр Шығыс аймақтарына және Орталық Азия мен күнгей Кавказ елдеріне экспортталмақ.
Болашақ кәсіпорын қатарындағы бірінші үлгілер «LADA Granta» және «LADA Kalina» автомобильдері болады.

Титан шығаратын зауыт 2016 жылы іске қосылады

Премьер-Министрдің орынбасары ат басын байлаған келесі нысан – «ТМК» АҚ-ның кореялық серіктестермен тізе қосып жүзеге асырып жатқан «ПОСУК Титаниум» ЖШС-нің титан құймаларын шығару инвестициялық жобасы. Жобаның жалпы құны – 7,384 млрд. теңге. Қаржыландырушылар: «POSUK Titanium», «POSCO Co.LTD», «Kolur Holding AG» және «Өскемен ТМК» АҚ. Мәртебелі меймандарға жобаны жан-жақты таныстырған бастамашылар зауытты 2016 жылы іске қосатынын жеткізді. Олардың айтуынша, жаңа кәсіпорын жылына 4,1 мың тонна титан прокатын (титанға деген ішкі сұраныстың 60%-ы) шығаратын болады. Ол жерде 80 тұрақты жұмыс орны ашылады. Бүгінгі күні жобаны жүзеге асыруда ешқандай проблема жоқ.
Облыс Әкімі Бердібек САПАРБАЕВ астаналық қонақтарға Ертістің сол жағалауында орын тепкен «Айтас МП» ЖШС-нің құс етін тереңдетіп өңдейтін зауытын көрсетті.
Кәсіпорын басшысының айтуынша, жобаны іске асыру үшін 2 млрд. теңгеге жуық қаржы жұмсалыпты. Оның ішінде жеке қаржы 608,8 млн. теңге болса, екінші деңгейлі банктерден алынған несие – 1170,2 млн. теңге.
Мекеме тәулігіне 40 тонна, жылына 12 мың тонна етті қалдықсыз, тереңдетіп өңдеп шығарады. Өнімдер ассортименті – 150 түрге бөлінеді, сол сияқты құс етінің өнімдері және ет, шұжық, деликатестермен жартылай фабрикаттар әзірленеді. Бұл өнімдердің бәрі халықаралық және ұлттық стандарттарға сай келеді. Ет өңдейтін құрылғылар Германия, Австрия, Польша секілді еуропалық елдердегі алдыңғы қатарлы өндірушілерден сатып алынған. Өскемен құс фабрикасынан әкелінген тауық еті мұнда дайын өнімге айналады. Құс етін өңдеу зауытында бүгінгі күні екі жүзден астам адам еңбекпен қамтылған.

Серік Әбілхан