Ілгері басқан іргелі оқу орны
Айжанат Бақытқызы
Шығыс өңіріндегі алғашқы Өскемен педагогикалық институты, бүгінде еліміздегі жетекші гуманитарлық жоғары оқу орнына айналған Сәрсен Аманжолов атындағы Шығыс Қазақстан университеті 70 жылдық мерейтойын атап өтті. Атаулы күнге орай ұйымдастырылған салтанатты жиынға Ғылым және жоғары білім министрі Саясат Нұрбек, Парламент Мәжілісінің депутаты, университет түлегі Ерлан Сайыров, облыс әкімі Даниал Ахметов қатысып, ақжарма тілектерін жеткізді.
Мерекелік іс-шара Құрметті ректор Юмаш Кәрімұлы Уәлиевтің мемориалдық тақтасына гүл қою рәсімінен басталды. Ол кісінің бастамасымен бірнеше жатақхана және №1 оқу корпусы бой көтерген болатын.
Мерейтой қонақтары А.Трунов атындағы фитнес-орталықпен, жаңадан ашылған зертханалармен танысты. Университет базасында құрылған «Dana bala» инклюзивті білім беру орталығының жұмысын көрді. Профессор Б.Мамыраев атындағы ғылыми кітапхана және Ұлттық ғылым академиясының академигі, химия ғылымдарының докторы А.Ғазалиев атындағы конференц-зал ашылды.
Ғылым және жоғары білім министрі Саясат Нұрбек өзін университеттің ғылыми қызметкерлерінің еліміздің әлеуметтік-экономикалық дамуына нақты үлес қосатын жобалары таңғалдырғанын атап өтті.
– Университет ұжымын 70 жылдық мерейтоймен құттықтаймын. С.Аманжолов университеті соңғы екі жылда педагог кадрларды даярлайтын 70 университеттің арасында ұлттық біліктілік тестілеуінде бірінші орынды иеленді. Ғылыми-зерттеу жобаларын қаржыландыру 16 есеге ұлғайды. Университеттегі студенттер саны соңғы төрт жылда төрт мыңнан тоғыз мыңға дейін өсті. Жаңа зертханалар ашу жағынан да көш бастап тұр. Университетке тұрақтылық пен өркендеу, оқытушыларға сұранысқа ие мамандарды даярлауда мол табыс, ал студенттерге оқуда жаңа жетістіктер тілеймін, – деді Саясат Нұрбек.
Сала министрі елімізде демографиялық өсім байқалатынын атап өтті. Сондықтан осындай маңызды кезеңде академиялық инфрақұрылымға назар аудару қажет. Цифрландыру жұмыстарына басымдық берілетін болады.
Тағы бір маңызды жаңалықтың бірі – әлемдегі ең ірі онлайн білім беру платформасы Coursera-мен келісімшарт жасалған. Соның аясында өңірлік университеттерде 50 цифрлық зертхана ашылады.
Мерейтой соңында Саясат Нұрбек университет студенттеріне дәріс оқитынын жеткізді.
– 70 жыл деген аз уақыт емес. Осы жылдар ішінде педагогикалық білім беру саласында елеулі жетістіктерге қол жеткізіп, соның нәтижесінде оқу орны еліміздің жетекші университеттері арасында лайықты орын алып отыр. Университет уақыт талабына жауап бере алатын, бәсекеге қабілетті, жоғары білікті мамандарды даярлап келеді. Түлектерінің арасында белгілі ғалымдар, мемлекет қайраткерлері мен ірі кәсіпорын басшылары бар. Сапалы білім берудегі осы игі дәстүр жалғасатынына сенімдімін, – деді құттықтау сөз сөйлеген облыс әкімі Даниал Ахметов.
Сонымен қатар салтанатты жиын кезінде Парламент Мәжілісінің депутаты Ерлан Сайыров, университеттің бұрынғы ректорлары Ережеп Мәмбетқазиев, Бейбіт Мамыраев және ардагер ұстаздар игі тілектерін білдірді.
Іс-шара барысында университеттің 70 жылдығына орай жарық көрген «Ғасырдан ғасырға» энциклопедиясы таныстырылды. Келушілер жоғары оқу орнының тарихы жайлы фотокөрмені, ғылыми орталықтардың жетістіктері мен «Ғылым әлемі» зертханасының көрмесін және университет ректорларының жеке коллекцияларынан кітапханаға сыйға тартқан кітаптарының көрмесін тамашалады.
Мерейтой «Қазіргі сын-қатерлер жағдайындағы ғылым мен білімнің өзекті мәселелері» тақырыбындағы «Уәлиев оқулары – 2022» халықаралық ғылыми-тәжірибелік конференциясы және «Диалектика, білім, жаһандық перспективадағы адам» халықаралық ғылыми-әдістемелік семинарымен жалғасты.
Университеттің жақсы аты ісіне адал, берекелі ұжымның еңбегінің арқасында қалыптасқаны сөзсіз. Сондықтан шара соңында университет ғалымдары мен үздік оқытушылары сала министрлігі мен облыс әкімінің грамотасымен, алғыс хаттарымен және жоғары оқу орнының 70 жылдығына арналған мерекелік медальдармен марапатталды.
Айта кету керек, бүгінде білікті ректор Мұхтар Төлегеннің басшылығымен білім ордасы қарқынды дамып келеді. Университеттің еліміздің 130 көпсалалы жоғары оқу орындары арасында ұлттық біліктілік тестілеуінің нәтижесі бойынша екі мәрте бірінші орын алуы, 40-тан астам PHD докторының шығуы – соның айқын дәлелі.
Сонымен қатар университетте соңғы төрт жылда студенттер саны 2,5 есе артты. Түлектердің жұмысқа орналасуы 98%-ға жетті. Жоғары оқу орнында мемлекеттің қолдауымен 64 ғылыми жоба іске асырылуда
