Халықтар достығы шығармаларына өзек болды

Шығыс Қазақстан өнер музейінде Қазақстан Тәуелсіздігінің 25 жылдығына арналған балалар шығармашылығының «Бір ел – бір халық» атты 16-шы облыстық көрме-байқауы өтті. 7 мен 18 жас аралығындағы жас суретшілер бұл көрмеге өздерінің 185 жұмыстарын ұсынды.
Биылғы жылдың тақырыбы ауқымды, әрі, күрделі болды, алайда, байқауға қатысушылар оны ойдағыдай орындап шықты. Өз білімдерін көрсете отырып, балалар қызғылықты жұмыстар ұсынып, кескіндемеде, графикада, сәндік-қолданбалы өнерде шеберліктерінің деңгейі жоғары екендігін көрсетті.
Тарих, салт-дәстүр, мереке, фольклор, Қазақстан рәміздері тақырыптарына «Беташар», «Қоштасу», «Айтыс», «Наурыз мерекесі», «Мерекелік дастарқан», «Қазақтың қымызы», «Біздің қуаныш», «Қозы Көрпеш пен Баян сұлу» сияқты көп жұмыстар ұсынылған екен. Ол жұмыстардың барлығынан да балалардың өз істеріне шынайы беріле, қызыға атқарғандықтары сезіліп тұр. Қазақстандағы көпұлттылық, этносаралық қатынас тақырыбы көрмеге қатысушылардың бүкіл шығармашылықтарына өзек болған. Бұл бағыт әсіресе, «Бір шаңырақ астында», «Достық биі», «Мерекелік ас», «Мәңгі бірге», «Біз – бір елдің балаларымыз», «Өзбек биі» жұмыстарында кеңірек ашылған.
Жас суретшілердің көптеген жұмыстары туған табиғаттың әдемілігін паш етеді. Олар табиғаттың сыртқы көрінісін ғана емес, белгілі бір мезгілдерге тән өзіндік ерекшеліктерін тап басып, дәл байқай білген. Олар: «Туған өлкенің күзі», «Туған дала төсінде», «Көктем лебі», «Бақтар гүлдеді», «Қысқы пейзаж». Балалар Қазақстанның жануарлар әлемін де ұмыт қалдырмаған.
Ашық, пластикалық образдарды, күрделі, көппішінді композициялардағы тапқырлықты, жұмыстарға әр, көтеріңкі көңіл күй, қанық реңк пен әуезді әуен беріп тұрған әсем бояуларды көргенде бейжай қалудың өзі мүмкін емес. Көрме соншалықты жарқын, мазмұнды, қатысушылардың тым жастығына қарамай, терең мағыналы болды. Сондықтан да КСРО және Қазақстан Суретшілер одағының мүшесі Николай Аштема жетекшілік еткен қазылар алқасына жүлделі орындарды анықтау оңай болған жоқ.
[center]